بيىل جيىن-تەرىم ماۋسىمىندا جانار-جاعارمايدان تاپشىلىق بولعان جوق. اقتوبە وبلىسىندا بيداي, ارپا ءوسىرىپ, مال ازىعى داقىلدارىن ەگەتىن شارۋاشىلىقتار نەگىزىنەن ايتەكە بي, مارتوك, قارعالى, حرومتاۋ اۋداندارىندا شوعىرلانعان. اسىرەسە مارتوك اۋدانى ءداندى, مايلى داقىلدار, مال ازىعى تۇرلەرىن وسىرۋگە ماشىقتانعان شارۋاشىلىقتارمەن ەرەكشەلەنەدى. اۋداندا جەردى قۇنارلاندىرۋدىڭ اگروتەحنيكالىق تاسىلدەرىن جاقسى مەڭگەرىپ, تامشىلاتىپ سۋارۋ ءادىسىن قولداناتىن شارۋاشىلىقتار سانى باسىم. بيىل كوكتەمدە 158 407 گا القاپقا ءتۇرلى داقىلدار ەگىلسە, ونىڭ 96 740 گەكتارىن ءداندى داقىلدار ەگىستىگى قۇرادى. 53 649 گا بيداي, 25 584 گا ارپا, 1 165 گا س ۇلى, 656 گا تارى, 2 259 گا بۇرشاق ەگىلدى. وسىلايشا, وڭىردەگى استىقتى اۋدانداردىڭ ءبىرى سانالاتىن, جەرى قۇنارلى مارتوك اۋدانىنىڭ ەگىستىك القاپتارىن ءارتاراپتاندىرۋ جۇمىستارى بيىل دا جالعاستى.
تاعى ءبىر نازار اۋدارارلىعى, بۇرىن وسىرىلمەگەن مايلى داقىلدار القابى ۇلعايىپ كەلەدى. ماسەلەن, وسى كوكتەمدە 11 754 گا جەرگە كۇنباعىس, 5 643 گا ماقسارى ەگىلىپ, تامشىلاتىپ سۋارۋ ءادىسىن قولدانۋ ارقاسىندا ءونىم بىتىك شىقتى. مايلى داقىلدار اقتوبەدەگى ماي زاۋىتتارىنا جىبەرىلەدى نەمەسە سىعىمدالعان مال ازىعى تۇرىندە ەكسپورتقا شىعارىلادى. ايتا كەتۋ كەرەك, شارۋاشىلىقتار كومباين, كوپ كەشەندى تراكتور جۇرگىزۋشىلەرىن مارتوك اۋدانى تۇرعىندارىنىڭ اراسىنان تاڭدايدى. بىلىكتى مەحانيزاتورلار جيىن-تەرىم ۋاقىتىندا لايىقتى باعالانادى. ءالى دە جاقسى كومباين جۇرگىزۋشىلەرى مەن مەحانيزاتورلارعا سۇرانىس كوپ.
وسى اۋدانداعى ەكى ءىرى ءسۇت فەرماسىنىڭ ساۋىن سيىرلارىنا قاجەت قۇنارلى جەمشوپ بازاسىن ۇلعايتۋ وزەكتى بولىپ تۇر. ويتكەنى اقتوبە قالاسىنىڭ تۇرعىندارىن ساپالى سۇتپەن قامتاماسىز ەتىپ وتىرعان قوس فەرمانىڭ بىرنەشە مىڭ باس ساۋىن سيىرىن قىردىڭ شوبىمەن تويىندىرۋ مۇمكىن ەمەس. وسى ماقساتتا بىرنەشە جىل بۇرىن ەلەك وزەنىنىڭ اڭعارلارى مەن كولتاباندارىندا بىرجىلدىق شوپتەرمەن قاتار, كوپجىلدىق ءشوپ تۇقىمدارىن ەگۋ تاجىريبەسى قولعا الىندى. اۋداندا جىلما-جىل وزەن اڭعارلارىنان الىس ەمەس 43 618 گا القاپقا مال ازىعى داقىلدارى ەگىلەدى. ونىڭ 24 752 گەكتارىنا بىرجىلدىق, 3 060 گەكتارىنا كوپجىلدىق شوپتەر تۇقىمدارى سەبىلىپ,
2 670 گەكتارىنا سۇرلەمدىك جۇگەرى وتىرعىزىلادى. اگروتەحنيكالىق شارالاردىڭ ارقاسىندا مال ازىعىن وسىرەتىن شارۋاشىلىقتار ارتىلعان ونىمدەرىن باسقا جاققا ساتۋعا مۇمكىندىك الدى. كولتاباندارعا سەبىلگەن كوپجىلدىق شوپتەر تامىرلارى تەرەڭدەپ, بىتىك شىققاندىقتان, قايتا-قايتا وتىرعىزۋدىڭ قاجەتتىلىگى بولماي قالدى. اۋداندىق اۋىل شارۋاشىلىعى ءبولىمىنىڭ مالىمەتىنە قاراعاندا, شىلدە-تامىز ايلارىندا بۇرىن ەگىلگەن 12 136 گا كوپجىلدىق شوپتەر القابىنان مول ءونىم جينالعان. وسىلايشا, جەردى ءتيىمدى پايدالانۋ ارقاسىندا جەتكىلىكتى جەمشوپ قورى جاساقتالدى, جوڭىشقا, ەركەكشوپ, ارپا مەن س ۇلى اۋىلدىق وكرۋگتەرگە ارزان باعامەن ساتىلدى.
قازاننىڭ العاشقى ونكۇندىگىندە اۋداندا 249 گا جەردەن كارتوپ, 212 گەكتاردان ءسابىز, قىرىققابات, قىزىلشا جينالعان. قىسقا ساقتالاتىن كوكونىستەر اۋدان تۇرعىندارىنىڭ قاجەتىن وتەپ قانا قويماي, وبلىس ورتالىعىنداعى دۇكەن سورەلەرى مەن بازارلارعا كوتەرمە باعامەن جەتكىزىلە باستادى. قازان ايىنىڭ العاشقى ونكۇندىگىنە دەيىن اۋداندا 116 167,1 توننا ءداندى داقىل جينالدى. شارۋالار بيدايدىڭ ءار گەكتارىنان شامامەن 12 تسەنتنەردەن ءونىم الدى. قازانداعى مالىمەتكە قاراعاندا, 62 198,8 توننا بيداي, 1 367,2 توننا س ۇلى, 504,5 توننا تارى, 710 توننا جۇگەرى, 1 188,6 توننا بۇرشاق, 44 توننا زىعىر قامباعا قۇيىلدى.
ەڭبەك ونىمدىلىگى جۇمىستى ءساتتى ۇيىمداستىرۋ مەن جاڭارتىلعان تەحنيكالاردىڭ ارقاسىندا قول جەتكىزىلەتىنى بەلگىلى. سول سەبەپتەن دە قاشاندا اۋىل شارۋاشىلىعى تەحنيكاسىن جاڭعىرتۋ ماسەلەسى كۇن تارتىبىنەن تۇسپەيدى. تەحنيكانىڭ قىمباتتاۋى, قاجەتتى جابدىقتاردى جەتكىزۋدەگى كەدەرگىلەرگە قاراماستان, بۇل جۇمىس ۇنەمى جالعاسىپ كەلەدى. مارتوك اۋدانى اكىمى مەدەت ىسقاقوۆتىڭ حابارلاۋىنشا, وتكەن جىلى شارۋاشىلىقتارعا 173 اۋىل شارۋاشىلىعى تەحنيكاسىن ساتىپ الۋ جوسپارى قويىلعان ەكەن. سونىڭ ناتيجەسىندە, بيىل 10 تراكتور, 15 جەر وڭدەيتىن تەحنيكا, 25 دانسەپكىش, 3 ەگىستىك كەشەنى, 5 استىق وراتىن كومباين, 48 مال ازىعىن دايارلايتىن تەحنيكا ساتىپ الىنعان. الداعى جىلى شارۋاشىلىقتاردى تەحنيكالىق جاراقتاندىرۋ جالعاسا بەرەدى. شارۋاشىلىقتار جاڭا تەحنيكانى كوبىنەسە ليزينگ ارقىلى ساتىپ العان.
اۋداندا 90,1 مىڭ توننا مال ازىعىن دايىنداۋ جوسپارلانسا, وسى كورسەتكىش قازان ايىندا 101%-عا ورىندالىپ, 91 145,4 مىڭ توننا جەمشوپ شارۋاشىلىقتار مەن جەكە تۇرعىنداردىڭ قوراسىنا ءۇيىلدى. بۇل جاقتا قىس ەرتە تۇسەدى. قاراشانىڭ قارا سۋىعى مەن لايساڭى مالدى ەرتەرەك قوراعا قاماتىپ, ءساۋىردىڭ سوڭىنا دەيىن قورادان شىعارتپايتىندىقتان, جەمشوپ قورى التى ايعا جەتكىلىكتى ەتىپ جينالادى. ويتكەنى قىسقى بوراندار مەن ۇسكىرىك ايازداردا جول جابىلسا, اۋىلدار جەمشوپسىز قالادى.
اقتوبە وبلىسى
