مادەنيەت جانە اقپارات مينيسترلىگىنىڭ قولداۋىمەن وتكەن شىعارماشىلىق بايگەدە 18 بەن 35 جاس ارالىعىنداعى ونەرپازدار باق سىناپ, ەل وڭىرلەرىنەن كەلگەن 23 ۇمىتكەر ءوزارا مىقتىنى انىقتادى. قازىلار شەشىمىمەن ولاردىڭ اراسىنان سەگىز فيناليست ەكىنشى كەزەڭگە ويىستى. جۇلدەگە لايىق دەپ تانىلعان ديريجەرلەر قورىتىندى گالا-كونتسەرتتە ماراپاتتالدى.
بايقاۋ بارىسىندا ەرەكشە وقيعاعا كۋاگەر بولدىق. كاسىبي ديريجەرلەر ءمادي ومىرزاقوۆ پەن قۋانىش يسمايلوۆ قازىلار تاراپىنان جوعارى ۇپاي العانىنا قاراماستان, ءىنى-قارىنداستارىنا جول بەردى. ولاردىڭ بۇل شەشىمىن ناعىز ونەر ادامىنا ءتان دەگدارلىق دەپ باعالاعان «استانا وپەرا» مەملەكەتتىك وپەرا جانە بالەت تەاترىنىڭ ديريجەرى ابزال مۋحيتدينوۆ پەن قىزىلوردا وبلىستىق سيمفونيالىق وركەسترىنىڭ كوركەمدىك جەتەكشىسى جانە باس ديريجەرى ءمۇسىلىم امزە قوس ديريجەرگە استانا قالاسى اكىمدىگىنىڭ ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ سيمفونيالىق جانە قازاق وركەسترلەرىمەن بىرلەسىپ جەكە كونتسەرت وتكىزۋگە ارنايى جولداما ۇسىندى.
بايقاۋ قورىتىندىسىنا سايكەس, ارشات ءشارىپ پەن داۋرەنبەك سۇيىندىك ۇزدىك ونەرلەرى ءۇشىن ارنايى ديپلومدارمەن جانە قارجىلاي سەرتيفيكاتتارمەن ماراپاتتالسا, استانالىق دينا ارداق «ن.تىلەنديەۆتىڭ شىعارمالارىن ۇزدىك ورىنداعانى ءۇشىن» اتالىمىن جەڭىپ الدى. ونەر دوداسىندا قابىل ارنات, داۋلەت عابيتوۆ جانە اباي راقىشەۆ ءىىى ورىن يەلەنسە, ءالي ساپاربەك ءىى ورىندى ەنشىلەدى. بايقاۋدىڭ ەڭ باستى جۇلدەسى نۇرعالي اشىمحانعا بۇيىرىپ, وعان ءى ورىن ديپلومى مەن ءبىر ميلليون تەڭگەلىك سەرتيفيكاتتى مادەنيەت جانە اقپارات ۆيتسە-ءمينيسترى ايبەك سىدىقوۆ تابىستادى. بايقاۋعا قاتىسقان بارلىق ۇمىتكەر مادەنيەت جانە اقپارات ءمينيسترى ايدا بالاەۆانىڭ العىسحاتىمەن ماراپاتتالدى.
وركەستردىڭ كوركەمدىك جەتەكشىسى ءارى باس ديريجەرى, قازىلار القاسىنىڭ توراعاسى ءدىنزۋحرا تىلەنديەۆا بايقاۋ تەك جاس ديريجەرلەر سايىسى عانا ەمەس, ۇلى كومپوزيتور مۇراسىن تەرەڭ زەردەلەپ, جاس بۋىنعا جەتكىزۋدىڭ ەرەكشە مۇمكىندىگى ەكەنىن اتاپ ءوتتى.
الماتى
