ءسۇت ءوندىرىسىنىڭ جاڭا كوشباسشىسى پايدا بولادى

جاڭا زاۋىت شۆەيتساريالىق تەحنولوگيامەن دايىندالعان ءتۇرلى ءسۇت ونىمدەرىن شىعارىپ, وتاندىق نارىقتى ساپالى ونىممەن قامتاماسىز ەتە وتىرىپ, رەسەي مەن بەلارۋستەن اكەلىنەتىن يمپورتتىق تاۋارلارعا لايىقتى باسەكە ۇسىنادى. جوبانىڭ ىسكە قوسىلۋى – ەلدىڭ سولتۇستىگىندە زاماناۋي اگروونەركاسىپتىك كەشەن قالىپتاستىرۋدىڭ سوڭعى كەزەڭى. بۇل قادام مەملەكەت باسشىسىنىڭ جولداۋىندا ايتىلعان وڭدەۋ سالاسىن دامىتۋ مىندەتتەرىمەن تولىق ۇندەسەدى.

زاۋىتقا ەۋروپانىڭ جەتەكشى كومپانيالارىنان زاماناۋي وندىرىستىك جەلىلەر اكەلىنىپ, ورناتىلىپ, ىسكە قوسىلدى. ولار ءونىم ساپاسى مەن قاۋىپسىزدىگىنىڭ جوعارى ستاندارتتارىن قامتاماسىز ەتەدى. ناتيجەسىندە, قازاقستاندا بۇرىن بولماعان قۋاتتى وندىرىستىك كەشەن قۇرىلدى. كاسىپورىن جىل سوڭىنا دەيىن تاۋلىگىنە 350 تونناعا دەيىن ءسۇت وڭدەي الادى.

قازىر زاۋىتتىڭ وندىرىستىك قۋاتى جىلىنا 51 مىڭ توننا تەرەڭ وڭدەلگەن دايىن ءونىم شىعارۋعا مۇمكىندىك بەرەدى. سونىڭ قاتارىندا: 7 مىڭ توننا ىرىمشىك, 12 مىڭ توننا سارى ماي, 12 مىڭ توننا قويۋلاتىلعان ءسۇت, 20 مىڭ توننا سارىسۋ كونتسەنتراتى مەن قىشقىل ءسۇت ونىمدەرى وندىرىلەدى. كاسىپورىندا كۇردەلى جاڭا ءونىم تۇرلەرى – قاتتى جانە جۇمساق ىرىمشىكتەردى شىعارۋ جولعا قويىلىپ جاتىر. ال الداعى جوسپارلاردا – دەنساۋلىققا پايدالى جانە سپورتتىق تاعامدار, سۇزبە, ءارتۇرلى قىشقىل ءسۇت ونىمدەرى مەن باسقا دا ونىمدەردىڭ جەلىلەرىن ىسكە قوسۋ بار.

«ساپاسى جوعارى ءسۇت ونىمدەرىن شىعاراتىن زاۋىت اشۋ – بۇل قازاقستاندىق نارىقتى دەرلىك جاۋلاپ العان بەلارۋس كومپانيالارىنا جاۋابىمىز. ولارمەن تەك ءوندىرىستى ۇلعايتۋ ارقىلى عانا ەمەس, ءونىمنىڭ وزىندىك قۇنىن تومەندەتۋ, ءدام ساپاسىن ارتتىرۋ مەن اسسورتيمەنتتى كەڭەيتۋ ارقىلى دا باسەكەلەسەمىز. مۇنداي اۋقىمدى جوبانى ىسكە اسىرۋ – بۇكىل سالانى دامىتۋعا ءارى ەل نارىعىنداعى وتاندىق وندىرۋشىلەردىڭ ۇلەسىن ارتتىرۋعا جاسالعان ۇلكەن قادام», دەيدى «Eurasian Milk» جشس باس ديرەكتورى اندرەي گريتسەنكو.

بۇگىندە وتاندىق دۇكەن سورەلەرىن نەگىزىنەن يمپورتتىق تاۋارلار جاۋلاپ العان. ال جەرگىلىكتى ءوندىرىس شەتەلدىك ونىمدەرمەن تەڭ ەمەس باسەكەدە توتەپ بەرە الماي, بىرتىندەپ قىسقارىپ, ءتىپتى جوعالىپ كەتىپ جاتىر. Eurasian Milk مامانىنىڭ ايتۋىنشا, يمپورتقا قارسى تۇرىپ, ءساتتى جۇمىس ىستەۋ ءۇشىن وندىرۋشىلەرگە وراسان ينۆەستيتسيا سالىپ, كۇردەلى زاماناۋي تەحنولوگيالاردى ىسكە قوسىپ, ولاردى تولىق رەتكە كەلتىرۋ قاجەت. سونىمەن قاتار كادرلاردى نولدەن باستاپ دايارلاۋ, ەۋروپالىق جەتەكشى تاجىريبەنى جەرگىلىكتى ماماندارعا ۇيرەتۋ, فەرمەرلەرمەن بايلانىس ورناتىپ, ولاردى وقىتۋ كەرەك. ياعني بۇل – ۇلكەن تاۋەكەلدى تالاپ ەتەتىن اۋقىمدى جۇمىس. قازىرگى جاعدايدا مۇنداي تاۋەكەلگە بارىپ, وسىنداي كولەمدى مىندەتتەردى موينىنا الۋعا كوپ كومپانيا دايىن ەمەس. ال Eurasian Milk بولسا, بۇل ماسەلەلەردى شەشۋ ءۇشىن قازىردىڭ وزىندە بەلسەندى جۇمىس جۇرگىزىپ جاتىر.

ءسۇت ونەركاسىبىندەگى سوڭعى جىلدارداعى ەڭ ءىرى جوبالاردىڭ بىرىنە سالىنعان بۇل ينۆەستيتسيا ينۆەستورلاردىڭ ەلدەگى ىشكى ءوندىرىستى دامىتۋعا باعىتتالعان مەملەكەتتىك ساياساتقا سەنىم بىلدىرەتىنىن كورسەتەدى. سونداي-اق پرەزيدەنت قويعان – ۇلتتىق ازىق-ت ۇلىك نارىعىنىڭ يمپورتقا تاۋەلدىلىگىن ازايتۋ مىندەتى مەملەكەت پەن بيزنەس كۇش بىرىكتىرگەن كەزدە جۇزەگە اساتىنىنا دەگەن سەنىمدى دالەلدەيدى.

Eurasian Foods Corporation حولدينگى (Eurasian Milk وسى حولدينگتىڭ قۇرامىنا كىرەدى) ءونىم ساپاسى جوعارى بولىپ, العاشقى كەزەڭدە مەملەكەت تاراپىنان قولداۋ كورسەتىلسە, قازاقستانداعى ءوندىرىستىڭ بولاشاعى زور دەپ ەسەپتەيدى. كومپانيانىڭ زاماناۋي ءوندىرىس قۇرۋعا قاجەتتى تاجىريبەسى دە, تەحنولوگياسى دا بار. جوبانىڭ ءبىرىنشى كەزەڭىن جۇزەگە اسىرۋعا 70 ميلليون دوللار ينۆەستيتسيا سالىنعان. كومپانيا قىزمەتكەرلەردى كۇردەلى جابدىقپەن جۇمىس ىستەۋگە وقىتىپ, ولاردىڭ بىلىكتىلىگىن ارتتىرادى, كاسىبي وسۋىنە جاعداي جاسايدى. ءوندىرىس ۇلعايعان سايىن جاڭا جۇمىس ورىندارى اشىلادى. زاۋىتتىڭ تولىق شتاتتىق قۇرامى – 415 ادام.

سوڭعى جىلدارى ەكونوميكالىق بايلانىستاردىڭ وزگەرۋى سالدارىنان ەۋروپالىق جابدىق ايتارلىقتاي قىمباتتادى, ال ونى دايىنداۋ مەرزىمى ەداۋىر ۇزاردى. بۇل جوبانىڭ باستاپقى كەزەڭىن ودان ءارى كۇردەلەندىردى. سوعان قاراماستان, قازىرگى تاڭدا 6000 شارشى مەتر وندىرىستىك كورپۋس تولىق سالىندى, قوسالقى ءوندىرىس ءۇشىن ينجەنەرلىك جانە تەحنولوگيالىق جابدىقتار دايىندالدى, كادرلىق قۇرام جاساقتالدى. ساراپشىلاردىڭ دەرەگىنشە, قازاقستاندا سارى ماي وندىرىسىندەگى وتاندىق ۇلەس بۇگىندە 33%-دان اسپايدى, ال 67% ءونىم – يمپورت. ىرىمشىك سەگمەنتىندە جاعداي ودان دا قيىن. نارىقتاعى وتاندىق ءونىمنىڭ ۇلەسى 10%-دان تومەن. قويۋلاتىلعان ءسۇت كاتەگورياسىندا يمپورتتىڭ ۇلەسى دەرلىك 100%.

پەتروپاۆلداعى كاسىپورىننىڭ ىسكە قوسىلۋى وسى ءونىم تۇرلەرى مەن باسقا دا باعىتتاردا يمپورتتى الماستىرۋعا ناقتى سەرپىن بەرىپ, ەلگە تەرەڭ وڭدەلگەن, جوعارى ساپالى وتاندىق ءسۇت ونىمدەرىن ۇسىنۋعا مۇمكىندىك بەرەدى. بۇدان بولەك, كاسىپورىن ەكسپورتتىق الەۋەتىن دە دامىتۋدى كوزدەپ وتىر. قازىردىڭ وزىندە ونىمدەر رەسەي, ازەربايجان, تۇرىكمەنستان جانە موڭعولياعا ەكسپورتتالۋدا.

«جاڭارتىلعان جاڭا كاسىپورىننىڭ اشىلۋى – الەمدەگى گەوساياسي تۇراقسىزدىققا قاراماستان, قازاقستاننىڭ ازىق-ت ۇلىك سالاسى ءوسىپ كەلە جاتقانىن كورسەتەدى. ەۋروپالىق ستاندارتتاعى ءسۇت ونىمدەرىن شىعاراتىن وڭدەۋ كەشەنىنىڭ پايدا بولۋى – كوپ جىل بويى كوزدەلگەن وتاندىق ءوندىرىستىڭ دەڭگەيى. Eurasian Milk زاۋىتىنىڭ ىسكە قوسىلۋى قازاقستان مەن شەتەل نارىقتارىندا پوزيتسيامزدى ايتارلىقتاي نىعايتۋعا مۇمكىندىك بەرەتىنىنە سەنىمدىمىن», دەدى اندرەي گريتسەنكو.

Eurasian Milk وڭىردە فەرمەرلىكتىڭ دامۋىنا دا نەگىز بولادى. قازاقستاندا ءسۇت وڭدەۋ سالاسىنىڭ وسۋىنە وندىرىستىك وڭدەۋگە جارامدى ساپالى ءسۇتتىڭ تاپشىلىعى كەدەرگى ەكەنى جاسىرىن ەمەس. ال ءىرى زاۋىتسىز ءسۇت ءوندىرىسىن دامىتۋ مۇمكىن ەمەس, ويتكەنى فەرمەرلەردە ءونىمىن تۇراقتى ءارى اقىلى تۇردە وتكىزۋ كەپىلدىگى بولۋى قاجەت.

Eurasian Milk وكىلدەرىنىڭ پىكىرىنشە, قازاقستاندىق فەرمەرلەردىڭ الەۋەتى ءالى تولىق پايدالانىلماعان. ەلدەگى ازىق-ت ۇلىك نارىعىن قازىر كورشى مەملەكەتتەردىڭ ءىرى تاماق وندىرىستەرى باقىلاپ وتىر. ولاردا اۋقىمدى ءوندىرىس, مىقتى شيكىزات بازاسى ءارى كوپجىلدىق تاجىريبە بار. ال وتاندىق وندىرۋشىلەرگە يمپورتپەن تەڭ دارەجەدە باسەكەلەسىپ, ءتىپتى جەڭىپ شىعۋ مىندەتى تۇر. باستى بۋىن – زاماناۋي ءوندىرىس – قازىردىڭ وزىندە قۇرىلدى جانە ءارى قاراي دامىتىلادى. ەندىگى ەڭ ماڭىزدى مىندەت – وتاندىق ءونىمدى نارىققا تۇراقتى شىعارۋ. بۇل وڭاي ەمەس, ويتكەنى ساۋدا جەلىلەرىنىڭ سورەلەرىن يمپورت ونىمدەرى بەرىك يەلەنىپ العان. سوندىقتان بۇل ماسەلەنى شەشۋدە مەملەكەت تە, بيزنەس تە بىرگە ارەكەت ەتۋى كەرەك. پرەزيدەنت قاسىم-جومارت توقاەۆ جولداۋىندا اتاپ وتكەندەي, «ۇكىمەت ەۋرازيالىق ساۋدانى دامىتۋدا ءادىل جاعدايلاردى تالاپ ەتە ءبىلۋى كەرەك, ال دەپۋتاتتار وتاندىق وندىرۋشىلەردى زاڭنامالىق باستامالار ارقىلى قورعاۋى ءتيىس».

سونداي-اق ءوندىرىس پەن فەرمەرلەر اراسىنداعى ۇيلەسىمدى ءارى بىرلەسكەن جۇمىس تا اسا ماڭىزدى. ءوز تاراپىنان Eurasian Milk بۇل باعىتتا بەلسەندى تۇردە جۇمىس ىستەپ جاتىر. كوپتەگەن جەتكىزۋشىنى تارتۋ ارقىلى ءارى سولتۇستىك قازاقستان وبلىسىندا ءسۇت ءوندىرىسى بويىنشا كلاستەر قۇرۋدى قولعا الۋدا. قازىردىڭ وزىندە كومپانيا فەرمەرلەرگە تىكەلەي قارجىلاي قولداۋ كورسەتىپ, مال ازىعىن ءوسىرۋ, تابىندى باسقارۋ سياقتى باعىتتاردا زاماناۋي تەحنولوگيالاردى ەنگىزۋ بويىنشا بىرگە جۇمىس ىستەپ كەلەدى. سونىمەن قاتار فەرمەرلەر ءۇشىن ەۋروپالىق ماماندار – ۆەتەرينارلار, اگرونومدار جانە ازىقتاندىرۋ تەحنولوگتارى قاتىساتىن تەگىن وفلاين كونسۋلتاتسيالار تۇراقتى تۇردە ۇيىمداستىرىلادى. ولار وتاندىق مال شارۋاشىلىعىنا ءتيىمدى ازىقتاندىرۋ راتسيوندارىن جاساپ, جانۋارلاردىڭ ونىمدىلىگىن ارتتىرۋعا كومەكتەسەدى.

ء«سۇت وڭدەۋ سالاسىن دامىتۋدىڭ ەڭ كۇردەلى بولىگى – ءدال وسى وڭدەۋ كەزەڭى. ويتكەنى ول ۇلكەن ينۆەستيتسيانى, زاماناۋي تەحنولوگيالاردى جانە جوعارى بىلىكتى مامانداردى تالاپ ەتەدى. وعان قوسا ءوزىن-ءوزى وتەۋ مەرزىمى ۇزاق, ءدامدى ءارى ساپالى ءونىمنىڭ تۇراقتى ءوندىرىسىن جولعا قويۋ, بۇكىل ءوندىرىس بويىنشا بىلىكتى كادرلار دايارلاۋ, ەڭ باستىسى – ساۋدا بەلگىسىن قالىپتاستىرىپ, وتاندىق سورەلەردەن يمپورتتى ىعىستىرۋ قاجەت. سولتۇستىك قازاقستان قۋاتتى جاڭا كاسىپورىننىڭ اشىلۋىمەن وسى كۇردەلى ءارى ۇزاق جولدىڭ العاشقى كەزەڭى ەڭسەرىلدى. ەندى ءدال سونداي ماڭىزدى سەرپىلىس ءسۇتتى مال شارۋاشىلىعى سالاسىندا دا بولۋى كەرەك», دەدى اندرەي گريتسەنكو.