سۋرەت: gov.kz
ەتنوسارالىق كەلىسىم تاقىرىبىن جاريالايتىن مەديا مامانداردىڭ كاسىبي ماشىعىن جەتىلدىرۋگە باعىتتالعان جوباعا ەل ايماقتارىنان 30-عا جۋىق باق وكىلى ارنايى شاقىرىلعان. ولاردىڭ قاتارىندا وڭىرلىك باسىلىمداردىڭ باس رەداكتورلارى مەن جۋرناليستەر, مەملەكەتتىك ۇيىمداردىڭ ءباسپاسوز حاتشىلارى بار. كەزدەسۋدە ماماندار ءوزارا تاجىريبە الماسىپ, ەتنوسارالىق قاتىناستارعا قاتىستى نازىك تاقىرىپتارمەن جۇمىس ىستەۋ داعدىلارىن دامىتۋ, بۇقارالىق اقپارات قۇرالدارىندا ەتنوساياسي تەرمينولوگيانى دۇرىس قولدانۋ سىندى ەتنوجۋرناليستيكانىڭ وزەكتى ماسەلەلەرىن سارالادى.
«بيىل كلۋبىمىز 70-تەن اسا ءىس-شارا ۇيىمداستىرۋدى جوسپارلاعان ەدى. كەزەكتى باسقوسۋ – سونىڭ اۋقىمدىلارىنىڭ ءبىرى. قىركۇيەك ايىندا استانادا ءبىر اپتالىق وقۋ ۇيىمداستىردىق. ەتنوستىق بۇقارالىق اقپارات قۇرالدارىنىڭ ءمانى, ونىڭ جۇمىس جاعدايى بۇگىنگى فورۋمعا وزەك بولىپ وتىر. پرەزيدەنت وڭىرلەردەگى جۋرناليستەر كلۋبتارىنىڭ جۇمىسىن جەتىلدىرۋ مەن جولعا قويۋدى تاپسىرعان ەدى. قوعامدىق تۇراقتىلىق پەن ءوزارا سىيلاستىق مەملەكەت ومىرىندەگى – باستى قۇندىلىقتاردىڭ ءبىرى. بۇل جولدا بۇقارالىق اقپارات قۇرالدارىنىڭ ءرولى ەرەكشە. باق وكىلدەرى ەل ىشىندەگى تاتۋلىقتى ناسيحاتتاپ, ەتنوسارالىق كەلىسىمدى نىعايتۋدا دانەكەر قىزمەتىن اتقارادى. ءار ماقالا مەن سيۋجەت – بەيبىتشىلىك پەن بىرلىكتىڭ ۇندەۋشىسى. سوندىقتان جۋرناليستەردىڭ جاۋاپكەرشىلىگى زور. اقپاراتتى تاراتۋدا ادىلدىك پەن پاراساتتىلىق تانىتۋ – قوعامدىق كەلىسىمنىڭ كەپىلى», دەيدى قحا جۋرناليستەر كلۋبىنىڭ توراعاسى, سەنات دەپۋتاتى الىشەر ساتۆالديەۆ.
ەتنوجۋرناليستيكا سالاسىنداعى باسىم باعىتتار سارالانعان جوباعا ەلىمىزدەگى «باس رەداكتورلار كلۋبى» دا ءۇن قوسقان. باسقوسۋدا ءسوز العان «باس رەداكتورلار كلۋبى» قوعامدىق بىرلەستىگىنىڭ جەتەكشىسى بيبىگۇل جەكسەنباي, قازىرگى الەۋمەتتىك جەلى كۇشەيگەن كەزەڭدە كاسىبي جۋرناليستيكاعا ۇلكەن بەلسەندىلىك كەرەگىن, جۋرناليست تەك ءتىلشى رەتىندە ەمەس, ساراپشى دەڭگەيىندە پىكىر ايتا الاتىن مامان بولۋى قاجەتتىگىنە توقتالدى.
ء«دال قازىرگى ۋاقىتتا باق-تىڭ ءرولى ەرەكشە. قازىر اقپاراتتىق قاۋىپسىزدىك ماسەلەسى وتە ماڭىزدى مانگە يە. بۇل تۇرعىدا جاڭالىقتى بۇقاراعا دۇرىس جەتكىزۋ, ەل بىرلىگىنە اسەر ەتەتىن نازىك ماسەلەلەرگە قالام تەربەگەندە اسقان ۇقىپتىلىقپەن, پايىم-پاراساتپەن ىسكە كىرىسكەن ءجون. كورشى ەلدەرمەن بايلانىسىمىز دا, ىشكى بەرىك تاتۋلىعىمىز دا ەڭ الدىمەن وسى اقپاراتتان باستالادى. قوعامداعى تۇراقتىلىق پەن بىرلىك قۇندىلىقتارىن ناسيحاتتاۋ ەتنوجۋرناليستيكاعا ۇلكەن جاۋاپكەرشىلىك جۇكتەيدى», دەيدى ب.جەكسەنباي.
ءىس-شارادا ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ دەكانى قانات اۋەسباي فاكۋلتەتتە ءۇش جىلدان بەرى ەتنوجۋرناليستيكا ءپان رەتىندە وقىتىلىپ كەلە جاتقانىن, كاسىبي جۋرناليستەردى دايارلاۋدا قوعامدىق كەلىسىم تاقىرىبى ۇدايى نازارعا الىناتىنىن اتاپ ءوتتى.
ال «مەدياكەڭىستىكتە ەتنوساياسي تەرمينولوگيانى قولدانۋ ەرەكشەلىكتەرى» تاقىرىبىندا ءدارىس وقىعان مام ەقدك ادىستەمەلىك قامتاماسىز ەتۋ جانە اقپاراتتىق-ءتۇسىندىرۋ جۇمىسىن ۇيىمداستىرۋ باسقارماسىنىڭ باس ساراپشىسى رايحان تىلەۋبەرگەنوۆا ەل ازاماتتارىنىڭ 30 پايىزىن ەتنوس وكىلدەرى قۇرايتىنىن, ەتنوستىق توپتار اراسىنداعى سىندارلى ديالوگتى دامىتۋ باق-تاعى ساۋاتتى ماتەريالدارمەن تىعىز بايلانىستى ەكەنىن تىلگە تيەك ەتتى.
ءىس-شارا شەڭبەرىندە انتيكريزيستىك PR مەن مەدياكوممۋنيكاتسيا باعىتىندا تاجىريبەلىك ترەنينگتەر ءوتىپ, ەتنوجۋرناليستكا دامۋىنداعى زاماناۋي ۇردىستەر تالقىلاندى. سونداي-اق قحا جۋرناليستەر كلۋبى مەن باس رەداكتورلار كلۋبى ىنتىماقتاستىق تۋرالى مەموراندۋمعا قول قويدى.
الماتى
