فوتو: «وتباسى بانك»
اتالعان باعدارلاما العاش رەت 2024 جىلى جۇزەگە اسىرىلىپ, وعان 600 ميلليون تەڭگە بولىنگەن. سونىڭ ناتيجەسىندە 41 جاس قونىس تويىن تويلادى. ال بيىلعى جىلدىڭ ناۋرىز ايىندا باستالعان ەكىنشى كەزەڭىندە تاعى 65 جاس مامان باسپانالى بولدى. ەندى جوبا اياسىندا وبلىس بيۋدجەتى ەسەبىنەن 1,3 ميلليارد تەڭگە, ال سەرىكتەس «وتباسى بانك» تاراپىنان 331 ميلليون تەڭگە قاراجات قاراستىرىلىپ وتىر.
«جايىق جاستارى» – وڭىرىمىزدەگى جاس مامانداردى قولجەتىمدى باسپانامەن قامتۋدى كوزدەيتىن ماڭىزدى الەۋمەتتىك باستاما. بيىل بولىنگەن قوسىمشا قارجى ەسەبىنەن باسپانالى بولاتىن جاستار سانى ايتارلىقتاي ارتادى», دەدى وبلىستىق قوعامدىق دامۋ باسقارماسىنىڭ باسشىسى دارحان قادىراليەۆ.
باعدارلاما شارتتارى جەڭىلدەتىلگەن: تۇرعىن ءۇيدىڭ شەكتى باعاسى – 18 ملن تەڭگە, نەسيە مەرزىمى – 19 جىلعا دەيىن, پايىزدىق مولشەرلەمە – 5%(جىلدىق شىعىنى 5,2%-دان 5,7%-عا دەيىن). قاتىسۋشىلار 21–35 جاس ارالىعىندا بولىپ, سوڭعى ءبىر جىل بقو-دا تىركەۋدە تۇرۋى جانە زەينەتاقى اۋدارىمدارى بولۋى ءتيىس. سوڭعى بەس جىلدا تۇرعىن ءۇيى بولماعاندارعا عانا رۇقسات. باستاپقى جارنا – 10%, ياعني شوتتا كەمىندە 1,8 ملن تەڭگە بولۋى قاجەت. ءار بالاعا قوسىمشا ءبىر ۇپاي بەرىلەدى.
جوباعا دەنساۋلىق ساقتاۋ, ءبىلىم, مادەنيەت, سپورت سالاسى ماماندارى, مەملەكەتتىك قىزمەتشىلەر, باق وكىلدەرى, سونداي-اق «باتىس سۋ ارناسى», «جايىقجىلۋقۋات», «اقسايجىلۋقۋات» سياقتى كوممۋنالدىق كاسىپورىن قىزمەتكەرلەرى قاتىسا الادى.
«وتباسى بانك» بق فيليالىنىڭ ديرەكتورى نۇرجان قاليشانوۆتىڭ ايتۋىنشا, بۇعان دەيىن 106 جاس جاڭا پاتەر العان. ەندى تاعى 90-نان استام ادام باسپانالى بولادى. بۇل – وڭىردە جاستاردى تۇراقتاندىرۋعا, وتباسىلىق ينستيتۋتتى نىعايتۋعا باعىتتالعان ماڭىزدى قادام.
ءۇشىنشى كەزەڭ بويىنشا وتىنىمدەر جىل سوڭىنا دەيىن ونلاين قابىلدانادى. قۇجاتتاردىڭ دۇرىستىعى مەن تولەم قابىلەتى قاتىسۋشىنىڭ ءوز جاۋاپكەرشىلىگىندە. بۇرىنعى نەسيەلەر مەن ۋاقىتىلى جاسالماعان تولەم وتىنىمگە كەدەرگى بولۋى مۇمكىن.
باعدارلامانىڭ العاشقى قاتىسۋشىلارىنىڭ ءبىرى, ورالدىق مۇعالىم تورعىن يمانباەۆا قازىر ءۇش بولمەلى پاتەردە تۇرىپ جاتىر.
«بۇعان دەيىن پاتەر جالداپ, جاتاقحانادا تۇردىق. دەپوزيتكە اقشا جيناپ, بىراق پاتەرگە جەتكىزە الماي قينالدىق. «جايىق جاستارى» باعدارلاماسى جايلى ەستىگەن سوڭ تاۋەكەل دەپ قاتىسقان ەدىك. جولىمىز بولدى, قازىر ءوزىمىز تاڭداعان ءۇش بولمەلى پاتەردە تۇرىپ جاتىرمىز. ءۇيدى ءوزىمىز تاڭدادىق. ايىنا 117 مىڭ تەڭگە تولەپ, ءوز ۇيىمىزگە كىردىك. مۇنداي مۇمكىندىك ءۇشىن وبلىس پەن بانك باسشىلارىنا العىس ايتامىن», دەيدى ول.
«جايىق جاستارى» باستاماسى – ايماقتاعى جاستار ساياساتىنىڭ ناقتى ناتيجەسىن كورسەتەتىن ۇلگىلى جوبا. ول ءوز ەڭبەگىمەن تۇراقتى ءومىر قۇرۋعا ۇمتىلعان جاس بۋىنعا سەنىم مەن موتيۆاتسيا سىيلاپ وتىر.
