فوتو: اقوردا
«بۇگىن ءبىز پارلامەنتتىك رەفورما بويىنشا جۇمىس توبىنىڭ العاشقى وتىرىسىنا جينالدىق. وزدەرىڭىز بىلەسىزدەر, وتكەن اپتادا ارنايى جۇمىس توبىن قۇرۋ تۋرالى وكىمگە قول قويدىم. پارلامەنتتىك رەفورما – ەلىمىزدىڭ الدىندا تۇرعان اسا ماڭىزدى, جاۋاپتى جۇمىس», دەدى پرەزيدەنت.
مەملەكەت باسشىسى جولداۋدا بۇل ماسەلە ازاماتتىق سەكتوردا, ساراپشىلار ورتاسىندا, سونداي-اق قازىرگى پارلامەنتتە جان-جاقتى تالقىلانۋى قاجەت دەپ ناقتى ايتقانىن ەسكە سالدى.
«بۇگىن, مىنە, ءبىرىنشى وتىرىسىمىزدا پارلامەنتتىڭ, پرەزيدەنت اكىمشىلىگىنىڭ, ۇكىمەتتىڭ جانە ساياسي پارتيالاردىڭ وكىلدەرى, زاڭگەرلەر, عالىمدار, قوعام قايراتكەرلەرى بار. ءبارى دە ەلگە تانىمال ازاماتتار, ءتۇرلى سالانىڭ ماماندارى. تاعى دا قايتالاپ ايتقىم كەلەدى: پارلامەنتتىك رەفورما – ەلىمىزدىڭ, حالقىمىزدىڭ تاعدىرىنا تىكەلەي قاتىسى بار ماسەلە. جۇمىس توبىنىڭ ءار مۇشەسى وسى تاريحي مىندەتتى دۇرىس ءتۇسىنىپ, بەلسەندى جۇمىس ىستەيدى دەپ سەنەمىن», دەدى قاسىم-جومارت توقاەۆ.
