كۇزگى اعاش وتىرعىزۋ جۇمىسىنا مەملەكەتتىك قىزمەتشىلەر, ستۋدەنتتەر, ەرىكتىلەر, بەلسەندى جاستار, قالا تۇرعىندارى اتسالىستى. ءىس-شاراعا وبلىس اكىمى قۇمار اقساقالوۆ ارنايى كەلىپ قاتىسىپ, قالا تۇرعىندارىمەن جۇزدەسىپ, كوپپەن بىرگە كوشەت وتىرعىزدى.
«باعدارلاما اياسىندا ارقالىق قالاسىندا اۋقىمدى جۇمىس اتقارىلىپ جاتىر. قالادا بوس تۇرعان عيماراتتار قالپىنا كەلتىرىلىپ, جاڭا الەۋمەتتىك نىساندار, تۇرعىن ۇيلەر پايدالانۋعا بەرىلدى. سونىمەن قاتار كوپپاتەرلى 71 تۇرعىن ءۇيدىڭ قاسبەتى مەن توبەسىنە جوندەۋ جۇرگىزىلىپ, 21 مىڭ شارشى مەتر اۋماققا توسەمتاس توسەلدى. بوس تۇرعان 46 ەسكى عيمارات بۇزىلىپ, ىسىرىلىپ, قالانىڭ اجارى كىرىپ قالدى. ارقالىق پەن قالاعا قاراستى ەلدى مەكەندەردەن 95 مىڭ توننادان استام قوقىس شىعارىلدى. بۇل – تۇرعىندار مەن بيلىكتىڭ بىرلەسكەن ەڭبەگىنىڭ ناتيجەسى. وسىنىڭ ءبارى ارقالىقتى كوركەيتىپ, تازا ءارى زاماناۋي قالاعا اينالدىرۋ ماقساتىندا جاسالىپ جاتىر. بۇل باعىتتاعى جۇمىستار ءارى قاراي جالعاسادى», دەدى ق.اقساقالوۆ.
ەكولوگيالىق اكتسياعا ارقالىق جۇرتشىلىعىنا جاقسى تانىمال ۇستازدار اۋلەتى – قولداسباەۆتار وتباسى دا بەلسەندى اتسالىسىپ, ءوز اۋلەتتەرىنىڭ اتىنان اتاۋلى اعاش كوشەتىن وتىرعىزدى.
«كوپشىلىك ءىس-شاراعا ۇلىمدى, كەلىنىمدى, نەمەرەلەرىمدى ادەيى ەرتىپ كەلدىم. اكەم ءومىر بويى بالا وقىتىپ, ۇستازدىق ەتتى. ءوزىم ىبىراي التىنسارين اتىنداعى ارقالىق پەداگوگيكالىق ۋنيۆەرسيتەتىنىڭ دوتسەنتىمىن, ارداگەر ۇستازبىن. نەمەرەم ەرلان دا ۇستازدىق جولىن تاڭدادى. بۇگىن – ءبارىمىز ءۇشىن قۋانىشتى كۇن. ويتكەنى تازالىق اكتسياسى ەڭ الدىمەن وزىمىزگە كەرەك, حالقىمىزدىڭ ەكولوگيالىق مادەنيەتىن قالىپتاستىراتىن ىزگىلىككە باستايتىن ءمانى تەرەڭ, ماڭىزى زور ءىس-شارا. قولداسباەۆتار اۋلەتىنىڭ اتىنان ءۇش ءتۇپ قاراعاي كوشەتىن وتىرعىزدىق. ەندى بالالارمەن اقىلداسىپ, وسى كوشەتتەردى قۇر وتىرعىزىپ, تاستاپ كەتپەي, ءارى قارايعى كۇتىمىن ءوز موينىمىزعا الايىق دەپ وتىرمىز. ابدەن تامىر جايىپ, بويلاپ وسكەنشە وسى جەرگە ءجيى كەلىپ تۇرامىز. سۋارىپ, باپتايمىز. مەملەكەت باسشىسى تورعاي ءوڭىرى ۇكىمەتتىڭ ايرىقشا نازارىندا بولاتىنىن ايتتى. وسىنىڭ ءبارى ارقالىقتىڭ, جالپى تورعايدىڭ كەلەشەگى جارقىن ەكەنىن كورسەتەدى. بۇگىندە حالىقتىڭ جاعدايى جاقسارىپ, قالامىز جىلدان-جىلعا جاڭارىپ, گۇلدەنىپ, كوركەيىپ كەلە جاتىر», دەيدى ارداگەر ۇستاز زينا قولداسباەۆا.
تازالىق اكتسياسىنا, اسىرەسە, جەرگىلىكتى 4 كوللەدج بەن ارقالىق پەداگوگيكا ۋنيۆەرسيتەتىنىڭ وقىتۋشىلارى مەن ستۋدەنتتەرى بەلسەنە اتسالىستى. پوليتەحنيكالىق كوللەدجدىڭ ستۋدەنتتەرى احمەت بايتۇرسىن ۇلى ساياباعىنا 200-گە جۋىق اعاش كوشەتىن وتىرعىزدى.
«تازا قازاقستان» جالپىۇلتتىق ەكولوگيالىق اكتسياسى بۇگىندە قالىپتى ءومىر سالتىنا, داستۇرگە اينالدى. اكتسيا باستالعالى قالامىزدى كوركەيتۋگە, ءوزىمىز ءومىر ءسۇرىپ جاتقان ورتانى, اينالامىزدى تازا ۇستاۋعا باعىتتالعان سەنبىلىكتەر, بۇگىنگىدەي اعاش وتىرعىزۋ جۇمىستارى ءجيى ءوتىپ تۇرادى. جالپى, ارقالىق جاستارى پرەزيدەنت باستاماسىن قاشاندا قولدايدى. «تازا قازاقستان» باعدارلاماسى ەلدى مەكەندەردىڭ سانيتارلىق جاعدايىن جاقسارتۋدان باستاپ, جاسىل ايماقتاردى قالپىنا كەلتىرۋگە, ينفراقۇرىلىمدى جاڭعىرتۋعا دەيىنگى كەڭ اۋقىمدى مىندەتتەردى قامتيدى. ءبىزدىڭ تورعاي وڭىرىنە دە ەرەكشە نازار اۋدارىلىپ جاتىر», دەيدى قالالىق جاستار رەسۋرستىق ورتالىعىنىڭ باسشىسى دانيار قوجاحمەتوۆ.
جالپى, «تازا قازاقستان» باعدارلاماسى اياسىندا قوستاناي وبلىسىندا 22 مىڭعا جۋىق اعاش كوشەتى وتىرعىزىلعان.
قوستاناي وبلىسى,
ارقالىق قالاسى
