اتالعان ءراسىم بارىسىندا ەلىمىزدىڭ پاۆيلونى «Theme Development» («كورمە تاقىرىبىن اشۋ») نەگىزگى اتالىمى بويىنشا «س» ساناتىنداعى شاعىن پاۆيلوندار اراسىندا 1-ورىندى يەلەندى. بۇل ساناتقا 90-نان استام ەل كىردى. ءبىزدىڭ ەكسپوزيتسيا كورمەنىڭ باستى تاقىرىبىن مازمۇندى جانە ەرەكشە تۇردە اشقانى ءۇشىن جوعارى باعاعا يە بولدى.
كورمە باستالعان كۇننەن باستاپ قازاقستان پاۆيلونى جاپوندىقتار مەن شەتەلدىك تۋريستەر اراسىندا ۇلكەن قىزىعۋشىلىق تۋدىردى. پاۆيلون ەلىمىزدىڭ مادەنيەتى, ءداستۇرى مەن تاريحى, ينۆەستيتسيالىق, ەكونوميكالىق جانە يننوۆاتسيالىق دامۋى, سونداي-اق تسيفرلاندىرۋ, تەحنولوگيا جانە تۇراقتى دامۋ سالالارىنداعى مازمۇندى ءارى تارتىمدى ەكسپوزيتسياسىمەن ەرەكشەلەندى. وسى ورايدا حالىقارالىق جانە جاپون بۇقارالىق اقپارات قۇرالدارى پاۆيلون تۋرالى بىرقاتار ماقالا جاريالادى.
كورمە بارىسىندا پاۆيلون ىنتىماقتاستىق پەن ءوزارا تاجىريبە الماسۋدىڭ ماڭىزدى الاڭىنا اينالىپ, ەلىمىزدىڭ جاھاندىق قوعامداستىقتاعى اشىق ءارى سەنىمدى سەرىكتەس رەتىندەگى مارتەبەسىن نىعايتتى. پاۆيلون اياسىندا 9 ىسكەرلىك جانە مادەني ءىس-شارا ۇيىمداستىرىلدى. ەڭ ءىرى وقيعالاردىڭ ءبىرى – قازاقستاننىڭ ۇلتتىق كۇنى, ول 2025 جىلعى 10 تامىزداعى ۇلى ويشىل اباي قۇنانباي ۇلىنىڭ 180 جىلدىعىنا وراي ءوتتى. سول كۇنى «EXPO National Day Hall» الاڭىندا قازاقستان رەسپۋبليكاسىنىڭ تۋى كوتەرىلىپ, اۋقىمدى مەرەكەلىك كونتسەرتتىك باعدارلاما ۇيىمداستىرىلدى. شاراعا شامامەن 3 000 كورەرمەن قاتىستى.
پاۆيلون ء«ومىردى بىرىكتىرۋ» كلاستەرىندە ورنالاسىپ, شامامەن 1,5 ملن ادامدى قابىلدادى. ولاردىڭ قاتارىندا رەسمي دەلەگاتسيالار, حالىقارالىق ۇيىمدار, ديپلوماتيالىق ميسسيالار, بيزنەس, مەديا جانە شىعارماشىلىق قاۋىم وكىلدەرى بولدى.
پاۆيلونعا حالىقارالىق كورمەلەر بيۋروسىنىڭ (BIE) باس حاتشىسى ديميتري كەركەنتزەس رەسمي ساپارمەن كەلىپ, ونىڭ ۇيىمداستىرىلۋ دەڭگەيىن, مازمۇنىن جانە ەكسپوزيتسيالىق شەشىمىن جوعارى باعالادى.
دۇنيەجۇزىلىك «EXPO 2025 Osaka» كورمەسى 2025 جىلعى 13 ءساۋىر مەن 13 قازان ارالىعىندا ءوتتى. ءىس-شاراعا 160 مەملەكەت پەن 9 حالىقارالىق ۇيىم قاتىستى, ال جالپى كەلۋشىلەر سانى 28 ميلليونعا جۋىقتادى. التى اي بويى يۋمەشيما ارالى ء«بىزدىڭ ءومىرىمىز ءۇشىن بولاشاق قوعامىن قۇرۋ» تاقىرىبىنداعى جاھاندىق ديالوگتىڭ باستى الاڭىنا اينالدى.
«QazExpoCongress» ۇك» اق ءباسپاسوز قىزمەتى
