كولىكتى وسىدان ءبىر جىل بۇرىن عانا قولعا تۇسىرگەن نۇرپەيىس قونىسبايدىڭ ايتۋىنشا, ەسكىنىڭ كوزى قازىر جوندەۋدە. قوزعالتقىش كۇشىن ارتتىرىپ, ونى-مۇنىسىن رەتكە كەلتىرۋ ۇستىندە ەكەن. نەگىزى ءجۇرىپ كەلىپ توقتاعان. بىراق بۇرىنعى قوزعالتقىش كۇشى ءسال باسەڭىرەك, وسى كۇننىڭ ۇدەسىنەن شىعا بەرمەيتىن بولعاندىقتان, ەپتەپ ارتتىرىپ, جەتىلدىرىپ جاتقان بەتى. ونىڭ وزىندە بوتەن كولىكتىڭ ەمەس, ءسال جەتىلدىرىلگەن «موسكۆيچتىڭ» موتورىن اۋىستىرىپ سالادى. سويتكەن سوڭ كەلەر جىلى وسىنداي ەسكى كولىكتەردىڭ جارىسى – رەترو-رالليگە قوسىلماقشى. ونداي جارىستار موڭعوليادا ءجيى وتەدى دەسەدى.
ەسكى دە جاڭا كولىكتىڭ ازىرگە ولقى تۇسى جوق. زاماناۋي تەمىر تۇلپارلارمەن اۋلاعا قاتار قويسا, ارينە, ەل اۋەلى وسىمەن سۋرەتكە تۇسۋگە تىرىسادى.
«انامنىڭ ايتۋىنشا, مەن تۋعاندا اۋىلدا جالعىز «موسكۆيچ» بار ەكەن دە, اكەم پەرزەنتحاناعا سونىمەن كەلگەن عوي. العاش مىنگەن كولىگىم ەسەبىندە وسى اڭگىمە قۇلاعىمدا قالىپتى. مۇمكىن قىزىعۋشىلىق سودان تۋعان شىعار. بۇلاردىڭ ءتۇپ-توركىنىن زەرتتەپ ءجۇرىپ, «موسكۆيچتىڭ» اتاسى نەمىستەردىڭ «وپەلى» ەكەنىن ءبىلدىم. ەكىنشى دۇنيەجۇزىلىك سوعىس اياقتالعان سوڭ, جەڭىلگەن ەلدىڭ ايىپ-شامىنىڭ وتەۋى رەتىندە ورىس جەرىنە توركىندەگەن ەكەن. اتالارىمىز قىزىعىن كورىپ باقتى عوي بۇلاردىڭ», دەيدى كولىك يەسى ن.قونىسباي.
