قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن وتكەن ەكى كۇندىك ونەر باسەكەسىندە ەلىمىزدىڭ تۇكپىر-تۇكپىرىنەن كەلگەن 23 ۇمىتكەر باق سىناپ, ولاردىڭ اراسىنان سەگىز فيناليست ەكىنشى كەزەڭگە وتكەن بولاتىن.
گالا-كونتسەرت شىمىلدىعى ن.تىلەنديەۆ اتىنداعى «وتىرار سازى» اكادەميالىق فولكلورلى-ەتنوگرافيالىق وركەسترىنىڭ ورىنداۋىنداعى «مەنىڭ بابام قاراساي» كۇيىمەن اشىلدى. كونكۋرس بارىسىندا قازىلار القاسىنىڭ تالقىلاۋىنان كەيىن ەرەكشە وقيعا ورىن العان بولاتىن. جوعارى باعاعا يە بولعان كاسىبي ديريجەرلار ءمادي ومىرزاقوۆ پەن قۋانىش يسمايلوۆ ىزگىلىك تانىتىپ, ءىنى-قارىنداستارىنا جول بەردى. بۇل قادامعا ريزا بولعان قازىلار القاسىنىڭ مۇشەلەرى ە.راحماديەۆ اتىنداعى مەملەكەتتىك اكادەميالىق فيلارمونياسى سيمفونيالىق وركەسترىنىڭ كوركەمدىك جەتەكشىسى, «استانا وپەرا» مەملەكەتتىك وپەرا جانە بالەت تەاترىنىڭ ديريجەرى, قازاقستاننىڭ حالىق ءارتىسى ابزال مۋحيتدينوۆ پەن قىزىلوردا وبلىستىق سيمفونيالىق وركەسترىنىڭ كوركەمدىك جەتەكشىسى جانە باس ديريجەرى, قازاقستاننىڭ ەڭبەك سىڭىرگەن قايراتكەرى ءمۇسىلىم بالتاباي ۇلى امزە قوس ديريجەرعا استانا قالاسى اكىمدىگىنىڭ ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ سيمفونيالىق جانە قازاق وركەسترلەرىمەن بىرلەسىپ جەكە كونتسەرت وتكىزۋگە ارنايى جولداما ۇسىندى.
ماراپاتتاۋ ءراسىمى ودان ءارى جالعاسىپ, ارشات ءشارىپ, داۋرەنبەك سۇيىندىك ۇزدىك ونەرلەرى ءۇشىن ارنايى ديپلومدارمەن جانە 200 000 تەڭگە سەرتيفيكاتتارمەن ماراپاتتالسا, استانالىق دينا ارداق «ن. تىلەنديەۆتىڭ شىعارمالارىن ۇزدىك ورىنداعانى ءۇشىن» نوميناتسياسىن جەڭىپ الدى. قازىلار القاسىنىڭ مۇشەلەرى ە.راحماديەۆ اتىنداعى مەملەكەتتىك اكادەميالىق فيلارمونياسى قازاق وركەسترىنىڭ كوركەمدىك جەتەكشىسى جانە باس ديريجەرى, قازاقستاننىڭ ەڭبەك سىڭىرگەن قايراتكەرى, «پاراسات» وردەنىنىڭ كاۆالەرى, پروفەسسور ايتقالي جايىموۆ پەن باۋىرلاس قىرعىز ەلىنەن كەلگەن بىشكەك قالاسى اكىمدىگى مادەنيەت باسقارماسىنىڭ حالىق اسپاپتار وركەسترىنىڭ باس ديريجەرى, قىرعىزستان رەسپۋبليكاسىنىڭ حالىق ءارتىسى باكىتبەك تيلەگەنوۆ ءىىى ورىن يەگەرلەرى قابىل ارنات, عابيتوۆ داۋلەت جانە راقىشەۆ ابايدى 400 000 تەڭگەنىڭ سەرتيفيكاتى جانە ارنايى ديپلوممەن ماراپاتتادى. ال قازىلار القاسىنىڭ توراعاسى ن. تىلەنديەۆ اتىنداعى اكادەميالىق فولكلورلى- ەتنوگرافيالىق «وتىرار سازى» وركەسترىنىڭ كوركەمدىك جەتەكشىسى جانە باس ديريجەرى, قازاقستاننىڭ ەڭبەك سىڭىرگەن قايراتكەرى, «پاراسات», «قۇرمەت» وردەندەرىنىڭ كاۆالەرى ءدىنزۋحرا تىلەنديەۆا ءىى ورىن تۇعىرىنان كورىنگەن ءالي ساپاربەكتى 600 000 تەڭگە سەرتيفيكات جانە ارنايى ديپلوممەن ماراپاتتادى. كونكۋرستىڭ ەڭ باستى جۇلدەسى نۇرعالي اشىمحانعا بۇيىرىپ, وعان ءى ورىن ديپلومىن جانە 1 000 000 تەڭگە سەرتيفيكاتتى قازاقستان رەسپۋبليكاسى مادەنيەت جانە اقپارات ۆيتسە-ءمينيسترى ايبەك سىدىقوۆ سالتاناتتى تۇردە تابىستادى. ەرەكشە ايتا كەتەتىن جايت, كونكۋرسقا قاتىسقان بارلىق ۇمىتكەرلەر قازاقستان رەسپۋبليكاسى مادەنيەت جانە اقپارات ءمينيسترى ايدا بالاەۆانىڭ العىس حاتىمەن ماراپاتتالدى.
گالا-كونتسەرتتە جەڭىمپازدار مەن لاۋرەاتتار ءوز ونەرلەرىن كورسەتىپ, جەڭىمپاز اتانعان نۇرعالي ءاشىمحان ن.تىلەنديەۆتىڭ «التىن ءدان» شىعارماسىنا ديريجەرلىق ەتتى. كەش سوڭىندا وركەستردىڭ كوركەمدىك جەتەكشىسى ءدىنزۋحرا تىلەنديەۆا ن.تىلەنديەۆتىڭ «ماحامبەت» كۇيىنە ديريجەرلىق ەتىپ, فينالدا ايگىلى «قۇستار ءانىن» بۇكىل زال بىرگە شىرقاپ, ۇلى كومپوزيتوردىڭ رۋحىنا قۇرمەت كورسەتىلدى. كونتسەرت سوڭىندا ونەرپازدارعا قر مادەنيەت جانە اقپارات مينيسترلىگىنىڭ ىقىلاس گ ۇلى تابىستالدى.
