فورۋم اياسىندا مينيستر ەۋروپالىق كوميسسيانىڭ حالىقارالىق سەرىكتەستىك جونىندەگى كوميسسارى يوزەف سيكەلامەن جانە تاتۋ كورشىلىك پەن كەڭەيتۋ ماسەلەلەرىنە جونىندەگى كوميسسارى مارتا كوسپەن كەلىسسوزدەر جۇرگىزدى. كەزدەسۋ بارىسىندا تاراپتار ەنەرگەتيكالىق قاۋىپسىزدىك, «جاسىل» ەكونوميكاعا كوشۋ ماسەلەلەرىن تالقىلادى.
ەرلان اقكەنجەنوۆ قازاقستاننىڭ 2060 جىلعا دەيىن كومىرتەگى بەيتاراپتىعىنا قول جەتكىزۋدى ستراتەگيالىق ماقسات رەتىندە ايقىنداپ وتىرعانىن اتاپ ءوتتى. سونىمەن قاتار, ەلدىڭ «جاسىل» ەكونوميكاعا كوشۋ ۇدەرىسىندە پراگماتيكالىق ءارى تەڭگەرىمدى ۇستانىمدى باسشىلىققا الاتىنىن جەتكىزدى. ونىڭ ايتۋىنشا, بۇل پروتسەسس جاڭارتىلاتىن ەنەرگيا كوزدەرىن دامىتۋمەن قاتار, قازىرگى تاڭدا ءداستۇرلى گەنەراتسياعا نەگىزدەلگەن ۇلتتىق ەنەرگەتيكالىق جۇيەنىڭ سەنىمدىلىگىن قامتاماسىز ەتۋى ءتيىس.
ساپار بارىسىندا ينۆەستيتسيا تارتۋ ماسەلەسىنە ەرەكشە نازار اۋدارىلدى. مينيستر ەۋروپالىق قايتا قۇرۋ جانە دامۋ بانكىنىڭ (ەقدب) پرەزيدەنتى وديل رەنو-باسسومەن, فرانتسۋز دامۋ اگەنتتىگىنىڭ (AFD) ديرەكتورى سيريل بەلەمەن جانە يتاليانىڭ «Cassa Depositi i Prestiti» كومپانيالار توبى (CDP) باسشىلارىمەن كەزدەستى.
ساپاردىڭ نەگىزگى ناتيجەلەرىنىڭ ءبىرى – قازاقستان مەن ەۋروپانىڭ جەتەكشى قارجى ۇيىمدارى ەۋروپالىق قايتا قۇرۋ جانە دامۋ بانكى (EBRD) مەن ەۋروپالىق ينۆەستيتسيالىق بانك (EIB) اراسىندا ىنتىماقتاستىق تۋرالى مەموراندۋمدارعا قول قويىلۋى بولدى. قۇجاتتار جاڭارتىلاتىن ەنەرگيا كوزدەرىن دامىتۋ, ەلەكتر جەلىلەرىن جاڭعىرتۋ جانە قامبار-اتا گەس-1 سەكىلدى وڭىرلىك جوبالارعا ينۆەستيتسيا تارتۋعا باعىتتالعان.
سونداي-اق فورۋم اياسىندا گەرمان حالىقارالىق ىنتىماقتاستىق جونىندەگى قوعامى (GIZ) ۇيىمداستىرعان «ورتالىق ازياداعى سەرىكتەستىك ديالوگىنا» قازاقستان, قىرعىزستان, وزبەكستان, تاجىكستان جانە تۇرىكمەنستاننىڭ ەنەرگەتيكا مينيسترلەرى قاتىستى. باسقوسۋدا ەرلان اقكەنجەنوۆ وڭىرلىك ەلەكتر ساۋداسى, گيدروەنەرگەتيكا جانە جاڭارتىلاتىن ەنەرگيا ستاندارتتارى بويىنشا قازاقستاننىڭ ۇستانىمىن ءبىلدىردى.
– ءبىزدىڭ بريۋسسەلگە ساپارىمىز ەۋروپامەن ەنەرگەتيكالىق ارىپتەستىكتى تەرەڭدەتۋگە دەگەن ءوزارا قىزىعۋشىلىقتىڭ جوعارى ەكەنىن كورسەتتى. قازاقستان – سەنىمدى ەنەرگيا جەتكىزۋشى ەل جانە «جاسىل» ەنەرگەتيكا مەن سۋتەگى وندىرىسىندە ەۋروپا ءۇشىن ستراتەگيالىق سەرىكتەس بولۋعا دايىن. EIB جانە EBRD-پەن جاسالعان كەلىسىمدەر – ەلىمىزدىڭ ەۋروپالىق بيزنەسكە تۇراقتى ۇزاقمەرزىمدى جوبالارعا ارنالعان ينۆەستيتسيالىق تارتىمدىلىعىن ايقىندايدى, – دەدى قر ەنەرگەتيكا ءمينيسترى ەرلان اقكەنجەنوۆ.
