سالتاناتتى شاراعا قر عىلىم جانە جوعارى ءبىلىم ءمينيسترى ساياسات نۇربەك, قازۇۋ ديرەكتورلار كەڭەسىنىڭ توراعاسى قايرات ءمامي, قازۇۋ باسقارما توراعاسى-رەكتورى جانسەيىت تۇيمەباەۆ, قر سەناتىنىڭ دەپۋتاتى بيبىگۇل جەكسەنباي, الماتىداعى قحر باس كونسۋلى تسزيان ۆەي مەن وزگە دە تانىمال تۇلعالار قاتىستى.
شارادا مينيستر ساياسات نۇربەك جاستاردى ارنايى قۇتتىقتاپ, وقۋدا تابىس تىلەدى.
«قازۇۋ تەك ءبىلىم ورداسى ەمەس, تۇلعا قالىپتاستىراتىن, بىلىكتى مامان دايارلايتىن, عىلىم مەن يننوۆاتسيانىڭ ورتالىعى. مەملەكەت باسشىسى قاسىم-جومارت توقاەۆ: «جاستار وتانشىل, ءبىلىمپاز, ەڭبەكقور, ۇنەمشىل, ءادىل ءارى جاناشىر بولۋى شارت», - دەپ اتاپ وتكەن بولاتىن. پرەزيدەنت ايتقان قاسيەتتەردى بويىنا سىڭىرگەن جاس بۋىندى تاربيەلەۋدە قازۇۋ-دىڭ ءرولى زور. ۋنيۆەرسيتەت تەك تەوريالىق ءبىلىم بەرىپ قانا قويماي, ستۋدەنتتەردى ومىرلىك ۇستانىمدارى ايقىن, جاۋاپكەرشىلىگى جوعارى, باسەكەگە قابىلەتتى مامان رەتىندە قالىپتاستىرۋدا اۋقىمدى جۇمىستار اتقارۋدا», - دەدى مينيستر.
قازۇۋ-دىڭ باسقارما توراعاسى – رەكتور جانسەيىت تۇيمەباەۆ: « ۇلى ۇستاز, ويشىل ءال-ءفارابيدىڭ ء«ىسىم وڭسىن دەسەڭىز, سول ءىستىڭ مامانى بولىڭىز» دەگەن قاعيداسىن ەستەن شىعارماڭىزدار. سىزدەردىڭ تاربيەلى شاكىرت بولىپ, بىلىكتى مامان, ەلىن سۇيەتىن تۇلعالى ازامات بولىپ شىعاتىندارىڭىزعا سەنەمىن», – دەدى رەكتور.
جاڭا وقۋ جىلىندا قازۇۋ-عا باكالاۆريات, ماگيستراتۋرا جانە دوكتورانتۋرا باعىتى بويىنشا بارلىعى 11 530 ستۋدەنت قابىلداندى.
باكالاۆرياتقا وقۋعا تۇسكەن جاستاردىڭ ىشىندە 116 «التىن بەلگى» يەگەرى مەن 27 حالىقارالىق وليمپيادا جۇلدەگەرى بار. بيىل 2500-دەن استام شەتەلدىك ستۋدەنت ءال-فارابي اتىنداعى قازۇۋ-دى تاڭداعان.
كەش بارىسىندا العاش رەت قازۇۋ فيليالدارىندا ءبىلىم الاتىن ستۋدەنتتەر دە ءوز ونەرلەرىن پاش ەتتى.
سالتاناتتى كەش قازاق ەستراداسى جۇلدىزدارىنىڭ ءان شاشۋىمەن جالعاسىپ, جاستاردىڭ بي كەشىنە ۇلاستى.
