قازىرگى كەزدە قالادا جاساندى ينتەللەكت پەن «جاسىل» ەكونوميكانى دامىتۋ باعىتىنداعى ءىس-شارالار قولعا الىنعان. قالا اكىمى دارحان ساتىبالدى جۇمىس ساپارى اياسىندا شاھاردىڭ ءىرى كاسىپورىندارىنىڭ ءبىرى «Caspian Beverage Holding» اكتسيونەرلىك قوعامىنىڭ جۇمىسىمەن تانىسىپ, MOST IT Hub Almaty يننوۆاتسيالىق الاڭىنا باردى.
Caspian Beverage Holding زاۋىتى 1964 جىلى اشىلعان. قالا باسشىسى وندىرىستىك ۇدەرىستەر مەن كاسىپورىننىڭ ەكولوگيالىق باستامالارىمەن تانىستى. قازىرگى كەزدە كومپانيا تاۋلىگىنە 500 مىڭعا دەيىن سۋسىن بوتەلكەسىن شىعارادى. زاۋىتتا 500 ادام جۇمىس ىستەيدى. كومپانيانىڭ جىل سايىن تولەيتىن سالىعى شامامەن 2 ملرد تەڭگە. كاسىپورىن ورنىقتى دامۋ تەحنولوگياسىن بەلسەندى تۇردە ەنگىزىپ كەلەدى. سونىڭ ءبىرى اۋاعا تارايتىن زياندى شىعارىندىلاردى ەداۋىر ازايتۋعا مۇمكىندىك بەرەتىن كومىرقىشقىل گازىن قايتا وڭدەۋ تۇيىق تسيكلى. قالا باسشىسى اتاپ وتكەندەي, ەكولوگيالىق جاۋاپكەرشىلىگى جوعارى مۇنداي وندىرىستەر قالانىڭ ەكونوميكالىق دامۋىنا جانە تابيعاتتى ايالاۋعا نەگىزدەلگەن «جاسىل ەكونوميكانىڭ» وركەندەۋىنە ەلەۋلى ۇلەس قوسادى.
MOST IT Hub Almaty – ستارتاپتار مەن تەحنولوگيالىق كاسىپكەرلىكتى دامىتۋعا ارنالعان زاماناۋي يننوۆاتسيالىق ورتالىق. حابتا يننوۆاتسيالىق جانە عىلىمي جوبالاردى جۇزەگە اسىرۋعا باعىتتالعان 80-نەن استام IT-كومپانيا شوعىرلانعان. مۇندا اكسەلەراتسيالىق جانە ءبىلىم بەرۋ باعدارلامالارى, ۆەنچۋرلىق باستامالار مەن جاساندى ينتەللەكت زەرتحانالارى جۇمىس ىستەيدى.
كەزدەسۋدە قالا باسشىسى IT-سالانى جانە جاساندى ينتەللەكت تەحنولوگيالارىن دامىتۋ – پرەزيدەنت ايقىنداعان نەگىزگى باسىمدىقتاردىڭ ءبىرى ەكەنىن اتاپ ءوتىپ, «مەملەكەت باسشىسىنىڭ تسيفرلاندىرۋ مەن جاساندى ينتەللەكتتى دامىتۋ جونىندەگى تاپسىرمالارى اياسىندا ەڭ باستىسى, ستارتاپتاردى عانا ەمەس, ءومىر ساپاسىن جاقسارتاتىن, الماتىنى اقىلدى, ىڭعايلى ءارى قاۋىپسىز قالاعا اينالدىراتىن ناقتى شەشىمدەردى ەنگىزۋ. ءبىز قالا مەن تۇرعىندارعا پايدا اكەلەتىن IT-جوبالاردى قولداۋعا دايىنبىز» دەدى. ونەركاسىپ پەن IT-سەكتور تۇراقتى دامۋدىڭ نەگىزگى قوزعاۋشى كۇشى. جاڭا جۇمىس ورىندارىن اشۋعا ىقپال ەتىپ, ينۆەستيتسيا تارتىپ, مەگاپوليستىڭ تەحنولوگيالىق الەۋەتىن ارتتىرۋعا مۇمكىندىك بەرەدى.
الماتى
