جامبىل وبلىسىنىڭ اكىمى ەربول قاراشوكەەۆ قورداي اۋدانىنداعى «شوقپار-گاگارينسكوە» جشس تاۋ-كەن بايىتۋ كومبيناتىنىڭ قۇرىلىسىن باستاۋ راسىمىنە قاتىستى.
بۇل جوبا – مەملەكەت باسشىسى قاسىم-جومارت توقاەۆتىڭ وڭدەۋ سالاسىنا ينۆەستيتسيا تارتۋ جانە ءىرى, ورتا, شاعىن ينۆەستورلارمەن ءوزارا تىعىز بايلانىس ورناتۋ جونىندەگى تاپسىرمالارىن جۇزەگە اسىرۋعا نەگىزدەلگەن.
اتالعان باستامانى وتاندىق ينۆەستور جۇزەگە اسىرۋدا. كاسىپورىندا جىلىنا 500 مىڭ توننا كەن ءوندىرۋ جوسپارلانىپ وتىر. جالپى ينۆەستيتسيا كولەمى – 47 ملرد تەڭگە.
بيىل 10 ملرد تەڭگە كولەمىندەگى قارجى ەسەبىنەن قىزمەتكەرلەرگە ارنالعان جاتاقحانا مەن زاۋىتتىڭ قۇرىلىسى باستالادى دەپ كۇتىلۋدە. قازىرگى تاڭدا گەولوگيالىق بارلاۋ جۇمىستارى جۇرگىزىلىپ جاتىر.
قۇرىلىسقا 100-دەن استام ادام تارتىلادى. كومبينات تولىق ىسكە قوسىلعاننان كەيىن 400-دەن 500-گە دەيىن جاڭا جۇمىس ورنى اشىلادى.
ينۆەستيتسيالىق جوبانى جۇزەگە اسىرۋ ماقساتىندا جەرگىلىكتى اكىمدىك تاراپىنان 1 101 گەكتار جەر تەلىمى ءبولىنىپ, ۋاقىتشا 44 شاقىرىم ەلەكتر جەلىسى تارتىلدى.
«شوقپار-گاگارينسكوە» جشس ديرەكتورى سەميون حان ءوندىرىس وشاعىندا كەز كەلگەن پوليمەتالل كەنىن وڭدەۋگە قابىلەتتى بىرەگەي تەحنولوگيا قولدانىلاتىنىن اتاپ ءوتتى.
