اباي وبلىسى – اۋىل شارۋاشىلىعىن دامىتۋدا زور الەۋەتكە يە ءوڭىر. وڭىردە 11 مىڭعا جۋىق اگروقۇرىلىم جۇمىس ىستەيدى. بيىلعى جىلدىڭ قاڭتار-تامىز ايلارى ارالىعىندا اۋىل شارۋاشىلىعى ءونىمىنىڭ جالپى كولەمى 221 ملرد تەڭگەگە جەتىپ, رەسپۋبليكا بويىنشا ءتورتىنشى ورىندى يەلەندى. ناقتى كولەم يندەكسى 102,9 پايىزدى قۇرادى. جالپى جينالاتىن ەگىس كولەمى 782,1 مىڭ گەكتار بولسا, ونىڭ 80 پايىزى ورىلىپ, 265,2 مىڭ توننا استىق باستىرىلدى. سونىمەن قاتار 96,6 مىڭ توننا كارتوپ پەن 101,6 مىڭ توننا كوكونىس جينالدى.
ايماق باسشىسى مەملەكەت باسشىسى قاسىم-جومارت توقاەۆتىڭ اۋىل شارۋاشىلىعىنا ينۆەستيتسيا تارتۋ جونىندەگى تاپسىرماسىنا سايكەس وڭىردە اتقارىلىپ جاتقان جۇمىستار تۋرالى ايتتى.
«پرەزيدەنت بيىلعى جولداۋىندا ينۆەستيتسيا تارتۋدىڭ ماڭىزدىلىعىن اتاپ ءوتتى. وسى تۇرعىدا جىل باسىنان اۋىل شارۋاشىلىعىنىڭ نەگىزگى كاپيتالىنا 32 ملرد تەڭگە ينۆەستيتسيا تارتىلدى, بۇل وتكەن جىلدىڭ سايكەس كەزەڭىمەن سالىستىرعاندا 170% جوعارى. وسى باعىتتا 2030 جىلعا دەيىن وبلىسىمىزدا ازىرلەنگەن وڭىرلىك ينۆەستيتسيالىق جوبالارىنىڭ كارتاسىنا سايكەس 197,5 ملرد تەڭگە كولەمىندە 85 ءىرى اگروجوبا ىسكە اسىرىلادى. بۇگىنگى كەزدەسۋىمىزدىڭ نەگىزگى ماقساتى – اۋىل شارۋاشىلىعى سالاسىنداعى مەملەكەتتىك ساياساتتىڭ نەگىزگى باعىتتارىن ءتۇسىندىرۋ عانا ەمەس, سونىمەن قاتار, سىزدەردى تولعاندىرىپ جۇرگەن ناقتى ماسەلەلەردى بىرگە قاراستىرۋ, اشىق ديالوگ ورناتۋ», – دەدى وبلىس اكىمى.
كەزدەسۋ بارىسىندا اۋىل شارۋاشىلىعى سالاسىن ءارتاراپتاندىرۋ, ينۆەستيتسيا تارتۋ, وڭدەۋ كاسىپورىندارىن دامىتۋ جانە ەت كومبيناتى قۇرىلىسىنىڭ بارىسى سياقتى وزەكتى ماسەلەلەر تالقىلاندى. جيىنعا كەلگەن شارۋاشىلىق جەتەكشىلەرى وزدەرىن تولعاندىرعان ساۋالدارىن قويىپ, مينيسترلىك وكىلدەرىنە ۇسىنىس-پىكىرلەرىن جەتكىزدى.
مينيستر اگروونەركاسىپتىك كەشەننىڭ دامۋىنا قاتىستى ناقتى شارالارعا, مەملەكەتتىك باعدارلامالارعا جان جاقتى توقتالدى.
«اباي وبلىسىنا ارنايى كەلدىم. بۇگىن ءوڭىردىڭ شارۋاشىلىقتارى جەتەكشىلەرىمەن, فەرمەرلەرمەن اشىق, شىنايى اڭگىمە بولدى. ءبىراز سۇراقتارىنا جاۋاپ بەردىم. مەملەكەتتىك باعدارلامالار, كورسەتىلەتىن جەڭىلدىكتەر تۋرالى ايتتىم. شارۋالارعا مەملەكەت تاراپىنان قولداۋ بولادى. اباي وبلىسى – جاڭادان قۇرىلعان ءوڭىر. اۋىل شارۋاشىلىق الەۋەتى زور ايماق. وبلىستا ءىرى ەت كومبيناتى سالىنايىن دەپ جاتىر. ول ءۇشىن مال شارۋاشىلىعىن جوعارى دەڭگەيدە دامىتۋىمىز كەرەك. كاسىپورىننىڭ قۇرىلىسىن بارىپ كورەمىن. مينيسترلىك تاراپىنان ءتيىستى كومەك كورسەتىلەدى», دەدى ايداربەك ساپاروۆ.
اباي وبلىسى
