«كوپتەن بەرى تەگىمدەگى «وۆ» جالعاۋىن الىپ تاستاعىم كەلىپ جۇرگەن. بىراق مەنىڭ اكەمنىڭ ەسىمى كەزىندە ورىستاندىرۋ كەزىندە بۇرمالانىپ, «حالىق» ءسوزى «كاليك» بولىپ كەتكەن. سونىڭ سالدارىنان مەنىڭ تەگىم دە «كاليكوۆ» بولىپ جازىلدى», دەيدى ول.
العاشىندا حالىققا قىزمەت كورسەتۋ ورتالىعىندا قىزمەتكەرلەر تەكتى «قالىق» دەپ جازۋدى ۇسىنعان. بىراق بۇل نۇسقا كوڭىلىنەن شىقپاعان سوڭ, ول ءتىل ءبىلىمى ينستيتۋتىنا بارىپ, رەسمي انىقتاما العان. عالىمدار «كاليك» ءسوزى قازاق تىلىندە جوق, ونىڭ تۇپنۇسقاسى «حالىق» دەگەن قورىتىندى بەرگەن. سونىڭ نەگىزىندە ول تۋ تۋرالى كۋالىگىن, جەكە كۋالىگىن, پاسپورتى مەن باسقا قۇجاتتارىن كەزەڭ-كەزەڭىمەن جاڭارتقان.
«مەنىڭ اقش ەلىنە 10 جىلدىق ۆيزام بار ەدى. سول ءۇشىن ۋايىمدادىم. بىراق ءبارى وڭاي ەكەن. ۆيزاسى بار ەسكى پاسپورت جارامسىز بولمايدى. تەك ونى مەرزىمى بىتكەنشە وزىڭىزبەن بىرگە ۇستايسىز. جاڭا پاسپورتپەن بىرگە كورسەتۋ جەتكىلىكتى», دەيدى ماقسات حالىق.
ديپلوم مەن باسقا رەسمي قۇجاتتارعا قاتىستى دا الاڭداۋدىڭ قاجەتى جوق. حالىققا قىزمەت كورسەتۋ ورتالىعى «ازاماتتىڭ اتى-ءجونى وزگەرگەنى راستالادى» دەگەن انىقتاما بەرەدى. سول انىقتاما بارلىق جەردە جارايدى.
«اتى-ءجونىڭىزدى قازاقشا جازىپ, ۇلتتىق بولمىسىڭىزعا ساي ەتۋ – ۋاقىت پەن تاباندىلىقتى تالاپ ەتەتىن شارۋا. بىراق قورقۋدىڭ قاجەتى جوق. ارقايسىمىز وسىلاي ارەكەت ەتسەك, تىلىمىزگە دە, ۇلتتىق ساناعا دا قۇرمەت ارتا تۇسەدى», دەيدى ول.
