«بايتەرەك» ۇلتتىق باسقارۋشى حولدينگىنىڭ باسقارۋشى ديرەكتورى ءاليا مۇرزاعاليەۆانىڭ سوزىنشە, پرەزيدەنت بۇل سالانىڭ ەل ومىرىندەگى ورنى مەن ماڭىزىن ايقىنداي وتىرىپ, «اقىلدى قالا» كونتسەپتسياسىن كەڭىنەن ەنگىزۋ, ينفراقۇرىلىمدىق جوبالاردىڭ اشىقتىعىن تسيفرلىق فورماتتا جۇرگىزۋ, مەملەكەت پەن جەكە سەكتور اراسىنداعى سەرىكتەستىكتى كۇشەيتۋ قاجەتتىگىن ەرەكشە اتاپ ءوتتى.
«تاپسىرماعا سايكەس, «بايتەرەك» ۇلتتىق باسقارۋشى حولدينگى 2025-2029 جىلدارعا ارنالعان «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسىنىڭ قارجىلىق وپەراتورى بولىپ بەكىتىلدى. حولدينگتىڭ نەگىزگى ماقساتى – تۇرعىن ءۇي-كوممۋنالدىق شارۋاشىلىق جۇيەسىندەگى جوبالاردى قارجىلاندىرۋدىڭ بىرىڭعاي مودەلىن قالىپتاستىرۋ جانە ونى ءتيىمدى ۇيلەستىرۋ.
جەكە سەكتورداعى تابيعي مونوپوليا سۋبەكتىلەرى ءۇشىن قارجىلاندىرۋ دامۋ بانكى ارقىلى ءجۇرىپ جاتىر. بۇل جۇمىسقا حالىقارالىق قارجى ۇيىمدارى مەن ەكىنشى دەڭگەيلى بانكتەر تارتىلعان. ال كوممۋنالدىق جانە كۆازيمەملەكەتتىك سەكتوردا قازاقستان تۇرعىن ءۇي كومپانياسى ارقىلى جەرگىلىكتى اتقارۋشى ورگانداردىڭ وبليگاتسيالارىن ساتىپ الۋ تەتىگى قولدانىلادى», دەيدى ءاليا مۇرزاعاليەۆا.
مۇنداي ءتاسىل ينجەنەرلىك جەلىلەر مەن جابدىقتاردى تەز ارادا جاڭارتۋعا جول اشادى, سونىمەن قاتار قىزمەت ساپاسىنا قويىلاتىن تالاپتار ەش وزگەرىسسىز ساقتالادى. ۇلتتىق جوبا اياسىندا ارنايى ەلەكتروندىق پلاتفورما ازىرلەنىپ جاتىر. بۇل جۇيە تابيعي مونوپوليا سۋبەكتىلەرىنىڭ وتىنىمدەرىن قابىلداۋدان باستاپ, مەردىگەرلەردى تاڭداۋ, ساتىپ الۋ راسىمدەرىن جۇرگىزۋ جانە كەلىسىمشارتتاردى راسىمدەۋگە دەيىنگى بارلىق ۇدەرىستى تولىق ونلاين فورماتتا بىرىكتىرەدى. پلاتفورما تولىق ىسكە قوسىلعانعا دەيىن ۋاقىتشا ونلاين bgov.kz پورتالىندا جۇمىس ىستەپ تۇر. بۇگىنگى كۇنگە دەيىن جالپى سوماسى 182,8 ملرد تەڭگەنى قۇرايتىن 28 جوبا تىركەلىپ, ولار «بايتەرەك» حولدينگىنىڭ ەنشىلەس ۇيىمدارىنا قاراۋعا جىبەرىلدى.
«قارجىلاندىرۋدىڭ العاشقى ناتيجەلەرى دە كورىنىس بەرە باستادى. قازاقستان تۇرعىن ءۇي كومپانياسى قاراعاندى, پاۆلودار, باتىس قازاقستان جانە سولتۇستىك قازاقستان وبلىستارى اكىمدىكتەرىنىڭ وبليگاتسيالارىن 22,5 ملرد تەڭگەگە ساتىپ الدى. بۇل قاراجات جىلۋ, سۋ, ەلەكترمەن جابدىقتاۋ جانە سۋمەن تازارتۋ بويىنشا ون نىساندى جاڭعىرتۋعا باعىتتالعان. وسى جوبالار جۇزەگە اسقاندا, ايماقتارداعى جۇزدەگەن مىڭ تۇرعىننىڭ تۇرمىس ساپاسى جاقسارادى, جەلىلەردەگى اپاتتار ازايادى جانە كوممۋنالدىق قىزمەتتەردىڭ سەنىمدىلىگى ارتادى», دەيدى ساراپشى.
سونىمەن قاتار مەملەكەت پەن بيزنەس اراسىنداعى سەرىكتەستىك تە جاڭا دەڭگەيگە شىعىپ وتىر. جەكە سەكتوردىڭ قاتىسۋى تۇرعىن ءۇي-كوممۋنالدىق شارۋاشىلىق سالاسىنداعى ءىرى جوبالاردى جۇزەگە اسىرۋ قارقىنىن كۇشەيتەدى. ينۆەستورلار ءۇشىن قولايلى جاعداي جاسالىپ, ۇزاق مەرزىمدى ارىپتەستىك ورناتىلادى.
