سەرىك جۇمانعاريننىڭ ايتۋىنشا, بيزنەس-قوعامداستىق وكىلدەرىمەن كەزدەسۋ تسيفرلىق تاڭبالاۋدى ەنگىزۋدىڭ پراكتيكالىق اسپەكتىسىن تالقىلاۋعا مۇمكىندىك بەرەدى.
ء«بىز مىندەتتى تسيفرلىق تاڭبالاۋدى كولەڭكەلى ەكونوميكانىڭ ۇلەسىن تومەندەتۋ مەن تاۋار نارىعىنىڭ اشىقتىعىن ارتتىرۋداعى پارمەندى قۇرال دەپ سانايمىز. بۇل ۇدەرىستە سىرا قايناتۋ سالاسىنا ەرەكشە نازار اۋدارىلادى. مۇندا تسيفرلىق تاڭبالاۋ ءتاسىلدىڭ تيىمدىلىگىن تاجىريبە جۇزىندە باعالاۋعا مۇمكىندىك بەرەدى. سىرا قايناتۋ ءونىمىن تاڭبالاۋدى ەنگىزۋ زاڭسىز ءونىم كولەمىن قىسقارتۋعا جانە نارىقتىڭ وسى سەگمەنتىن 25%-دان استام دەڭگەيدە «كولەڭكەلى ەكونوميكادان شىعارۋعا» مۇمكىندىك بەرەدى», دەدى.
ۇكىمەتتىڭ ءىس-قيمىل باعدارلاماسىنا سايكەس, سىرا قايناتۋ ونىمدەرىن مىندەتتى تاڭبالاۋدى 2026 جىلعى اقپاننان باستاۋ جوسپارلانعان. سونىمەن قاتار بيزنەسكە جۇكتەمەنى ازايتۋ ءۇشىن بوتەلكە مەن بانكانى تاڭبالاۋدى ەنگىزۋدى 2027 جىلعى قاڭتارعا دەيىن شەگەرۋ تۋرالى شەشىم قابىلداندى. بۇل كاسىپورىندارعا جابدىققا كەزەڭ-كەزەڭىمەن ينۆەستيتسيا سالۋعا جانە ءوز اقپاراتتىق جۇيەلەرىن جەتىلدىرۋگە مۇمكىندىك بەرەدى.
قازاقستانداعى امەريكالىق ساۋدا پالاتاسىنىڭ اتقارۋشى ديرەكتورى دجەفف ەرليح ەلدەگى ءىرى جوبالاردى جۇزەگە اسىراتىن حالىقارالىق كومپانيالار تاڭبالاۋ جۇيەسىن تابىستى جانە كەزەڭ-كەزەڭىمەن جۇزەگە اسىرۋعا مۇددەلى ەكەنىن اتاپ ءوتتى. سونىمەن قاتار بيزنەس-قوعامداستىق تۇراقتى ينۆەستيتسيالىق بەلسەندىلىكتى ساقتاۋ ءۇشىن تەڭگەرىمدى جۇزەگە اسىرۋ مەرزىمىن قامتاماسىز ەتۋدىڭ ماڭىزدىلىعىنا نازار اۋدارادى. «Efes Kazakhstan» كورپوراتيۆتىك ماسەلەلەر جونىندەگى ديرەكتورى شىڭعىس قاسكەەۆ بيزنەستىڭ تسيفرلىق تاڭبالاۋدى ەنگىزۋدى قولدايتىنىن جانە ۇكىمەتتىڭ كەزەڭگە ءبولىپ قولدانۋ ءتاسىلىن وڭ باعالايتىنىن ايتتى. تاڭبالاۋدىڭ ءبىرىنشى كەزەڭى 2026 جىلعى اقپاننان باستاپ جۇرگىزىلىپ, بوشكەلەر مەن بوتەلكەلەر, ەكىنشىسى كەزەڭدە 2027 جىلعى قاڭتاردان باستاپ بانكالار تاڭبالانادى. سونىمەن قاتار جابدىقتى جەتكىزۋ مەرزىمى مەن ءوندىرىستىڭ ماۋسىمدىق ەرەكشەلىگىن ەسكەرە وتىرىپ, كومپانيا ىسكە قوسۋدى 2026 جىلعى قاراشاعا اۋىستىرۋ مۇمكىندىگىن قاراستىرۋدى ۇسىندى.
سەرىك جۇمانعارين ۇكىمەتتىڭ تاڭبالاۋدى ەنگىزۋدەگى ناقتى جوسپارى بارىن جانە نارىق قاتىسۋشىلارى ۋاقتىلى دايىندالۋى ءۇشىن مەرزىمدى بەكىتۋ ماڭىزدى ەكەنىن ايتتى.
ء«بىز بوتەلكەلەر مەن بانكالاردى تاڭبالاۋدى 2027 جىلعى قاڭتارعا اۋىستىرۋعا دايىنبىز. بىراق سىرا قايناتۋ سالاسىنىڭ ماۋسىمدىق ەرەكشەلىگىن ەسكەرە وتىرىپ, كەگتى تاڭبالاۋ 2026 جىلعى قىركۇيەكتە جۇرگىزىلەدى. كەگتەردى تاڭبالاۋ اۆتوماتتاندىرۋدى قاجەت ەتپەيدى جانە ايتارلىقتاي شىعىن اكەلمەيدى», دەدى.
ۆيتسە-پرەمەر جاڭا سالىق كودەكسى شەڭبەرىندە ۇكىمەت تاڭبالاۋدى ەنگىزۋگە جۇمسالاتىن ناقتى شىعىننان اساتىن سالىق شەگەرىمى ارقىلى بيزنەستى قوسىمشا ىنتالاندىرۋ مۇمكىندىگىن قاراستىرۋعا دايىن ەكەنىن جەتكىزدى. وسى تەتىكتى پىسىقتاۋ ءۇشىن ول ۇلتتىق ەكونوميكا مينيسترلىگى مەن قارجى مينيسترلىگىنە تاڭبالاۋ ۇدەرىسىنىڭ نارىق قاتىسۋشىلارى ءۇشىن ەكونوميكالىق ءتيىمدى بولۋىن قامتاماسىز ەتەتىن ءتيىستى ۇسىنىس دايىنداۋدى تاپسىردى.
ايتا كەتەيىك, ەلىمىزدە تسيفرلىق تاڭبالاۋ قولدانىلاتىن ەلدەرگە سىرا ەكسپورتىنىڭ ءوسۋى بايقالادى. 2025 جىلعى ءبىرىنشى جارتىجىلدىقتاعى ەكسپورت كولەمى 12,6 ملن ليتر بولعان. بۇل وتكەن جىلعى سايكەس كەزەڭمەن سالىستىرعاندا 33%-عا ارتىق. رەسەيلىك كومپانيالار بۇرىن رەسەي نارىعىندا بولماعان قازاقستاندىق سىرا قايناتۋ زاۋىتتارىنىڭ ءونىمىن سەرتيفيكاتتاۋدى باستادى. بۇل وتاندىق وندىرۋشىلەردىڭ ەكسپورتتىق الەۋەتى مەن تەحنيكالىق دايىندىعىن كورسەتەدى.
