بالا تابيعاتىن تانىپ, كىشكەنتاي وقىرماننىڭ جۇرەك ءلۇپىلىن ءدوپ باساتىن شىعارما جازۋ, كەشەگى ەرتەگىنى بۇگىنگى ومىردەن كورىپ جۇرگەن تەحنوكراتتىق ءداۋىر جەتكىنشەكتەرىن تاڭعالدىرۋ كەز كەلگەن قالامگەردىڭ وڭتايىنا كەلە بەرمەيدى. تۇركى ەلدەرىنىڭ جاس وقىرمانىنا ساپالى, مازمۇنى تەرەڭ, ءتىلى كوركەم شىعارمالار ۇسىنعان قالامگەرلەرگە بەرىلەتىن مارتەبەلى سىيلىق بيىل جازۋشى ساۋلە دوسجانعا بۇيىرعانىن سۇيىنشىلەگەنىمىز ءجون.
تۇرىك ءتىل قوعامى بۇل ماراپاتتى 2022 جىلدان بەرى تابىستاپ كەلەدى. قولتاڭباسىندا حالقىمىزدىڭ باي بولمىسىن, ۇلتتىق تاربيە, ادامگەرشىلىك پەن ىزگىلىكتى ارقاۋ ەتكەن جازۋشىنىڭ ايتۋلى جەتىستىگىن تۇتاس قازاق ادەبيەتىنە بەرىلگەن قۇرمەت دەپ قابىلدادىق.
انكاراداعى اتاتۇرىك مادەنيەت, ءتىل جانە تاريح جوعارى مەكەمەسىنىڭ بيلكەنت كامپۋسىندا وتكەن سالتاناتتى راسىمگە تانىمال عالىمدار, قالامگەرلەر مەن مادەنيەت مايتالماندارى قاتىستى. سىيلىق يەگەرلەرى قاتارىندا ساۋلە دوسجانمەن قاتار, ازەربايجاندىق زاحيد حاليلوۆ, قىرعىزستاندىق سۇلەيمان رىسباەۆ, وزبەكستاندىق ميرازيز ازام جانە سولتۇستىك كيپر تۇرىك رەسپۋبليكاسىنان شىرىن زافەرجۇلدىزى زايماعوعلۋ بار.
سالتاناتتى ءراسىمدى اشقان تۇرىك ءتىل قوعامىنىڭ توراعاسى وسمان مەرت: «بالالار ادەبيەتى – تەك ادەبيەت ەمەس, حالىقتىڭ ەرتەڭى. سەبەبى بالا بويىنا ءدان سەبەتىن العاشقى كۇش – ءسوز. ال سول ءسوزدىڭ جۇيەسىن تۇزەپ, جۇرەككە جەتكىزەتىن – بالالارعا ارنالعان ساپالى ادەبيەت», دەپ, تۇركى حالىقتارىنىڭ ادەبي كەڭىستىگىن ورتاق باعىتقا ۇيىستىرۋ جاس ۇرپاققا ورتاق قۇندىلىق دارىتۋ جولىنداعى ماڭىزدى قادام ەكەنىن اتاپ ءوتتى.
ادەبيەت ارقىلى رۋحاني بىرلىگىمىزدى نىعايتۋعا باعىتتالعان بەدەلدى سىيلىققا يە بولعان ساۋلە دوسجاننىڭ بالالار ادەبيەتىندەگى ورنى – جەكە توقتالۋعا تۇرارلىق. جازۋشى وقيعالاردى بايانداپ قانا قويماي, جاس وقىرماننىڭ جاندۇنيەسىن تاربيەلەۋگە, ولاردىڭ بويىنا مەيىرىم مەن ادامگەرشىلىك, ادىلەت پەن وتانسۇيگىشتىك سەكىلدى اسىل قاسيەتتەر ورنىقتىرۋعا دەن قويعان, «بالالارمەن ءبىر تىلدە سويلەسە الاتىن» قالامگەر. بۇل – ونىڭ شىعارماشىلىق جولىنا بەرىلگەن لايىقتى باعا عانا ەمەس, تۇركى دۇنيەسىنە ورتاق قۇندىلىقتاردى دارىپتەۋ جولىنداعى تاباندى ەڭبەگىنىڭ جەمىسى.
وسى ورايدا, قازاقستاننىڭ تۇركياداعى ەلشىلىگى مەن «TURKTAV» قورىنىڭ ۇيىتقى بولۋىمەن جازۋشىنىڭ «اۋىلدان شىققان ميلليونەر» اتتى كىتابىنىڭ تۇرىك تىلىنە تارجىمەلەنگەن باسىلىمىنىڭ تۇساۋكەسەرى ءوتتى.
الماتى
