كوركەم قولتاڭباسىمەن تانىلعان شەبەر شابىتىن قازاق حالقىنىڭ باي مادەني ءداستۇرى مەن ءومىر سالتىنان الىپ, ۇلتتىق بولمىسىمىزدى مايلى بوياۋ ارقىلى شەبەر بەينەلەي ءبىلدى. ونىڭ تۋىندىلارىنداعى باستى كەيىپكەرلەر – ۇلتتىق كيىم كيگەن قىز-كەلىنشەكتەر مەن كيمەشەك جامىلعان, جاۋلىق تاققان اجەلەر. سۋرەتشى ولاردىڭ قاراپايىم كۇندەلىكتى تۇرمىسىن نازىك ليريكامەن جانە كوركەمدىك تالعاممەن جەتكىزدى. كورمەگە قويىلعان ءار كارتينا حالقىمىزدىڭ قاتپار تاريحىنان سىر شەرتەدى.
"شىعارماشىلىق جولىنىڭ العاشقى كەزەڭدەرىندە سۋرەتشى ءومىر شىندىعىن, ءوز اسەرىن مەيلىنشە شىنايى بەرۋگە تىرىستى. باتىرلار, اڭىز-ءاپسانالار مەن ميفتەر تاقىرىبى ونىڭ قيالىن وياتىپ, ولاردى وزىندىك كوركەمدىك تىلمەن بەينەلەۋ ارقىلى ەرەكشە وبرازدار جاسادى. ۋاقىت وتە كەلە ول فيلوسوفيالىق ءارى سيمۆوليكالىق تاقىرىپتارعا دا بەت بۇرىپ, ءومىردىڭ مانىنە تەرەڭ ۇڭىلە باستادى. ونىڭ تۋىندىلارىندا قازاق مادەنيەتىنىڭ اجىراماس بەلگىلەرى — ۇلتتىق ورنەكتەر, كەڭ دالا, تۇرمىس-سالت بەينەلەرى انىق كورىنىس تاپتى. وسى ارقىلى ول كۇندەلىكتى بولمىستى عانا ەمەس, اتا-بابا رۋحىمەن جالعاسقان تەرەڭ رۋحاني بايلانىستى دا شەبەر جەتكىزدى", -دەيدى ونەرتانۋشىلار.
نۇربازار قوجين شىعارماشىلىعىنا رەاليزم مەن ناتۋراليزم باعىتتارى, سونداي-اق يمپرەسسيونيزم ەلەمەنتتەرى ءتان. سۋرەتشىنىڭ تۋىندىلارى قازاقستاننان بولەك, اقش, گەرمانيا, فرانتسيا, قىتاي, جاپونيا, رەسەي جانە باسقا دا ەلدەردىڭ جەكە كوللەكتسيالارىندا ساقتاۋلى.
كورمەنىڭ اشىلۋ سالتاناتىندا بەلگىلى ونەر قايراتكەرلەرى سۋرەتشى شىعارماشىلىعى حاقىنداعى ءوز ويلارىمەن ءبولىسىپ, ونىڭ ءومىر-تىنىسى, ازاماتتىق بولمىسى تۋرالى جارقىن ەستەلىكتەر ايتتى.
