فوتو: gov.kz
قازىر جاساندى ينتەللەكت ەلەمەنتتەرى بار تسيفرلىق شەشىمدەردى ءبىلىم بەرۋ پروتسەسىنە تاجىريبەلىك تۇرعىدا ەنگىزۋ سىناقتان وتكىزىلىپ جاتىر. ساباقتار وقۋشىلاردىڭ جاس ەرەكشەلىكتەرىن ەسكەرە وتىرىپ ۇيىمداستىرىلادى. باستاۋىش سىنىپتاردا ءتۇسىندىرۋ ويىن جانە كورنەكىلىك ادىستەرى ارقىلى جۇرگىزىلسە, جوعارى سىنىپتاردا وقۋشىلار چات-بوتتار قۇرۋ, دەرەكتەردى تالداۋ جانە ەتيكالىق جاعدايلاردى شەشۋ سياقتى جوبالىق تاپسىرمالاردى ورىندايدى.
مۇنداي شەشىمدەر ەلىمىزدىڭ بىرنەشە مەكتەبىندە, سونىڭ ىشىندە استانا قالاسىنداعى №101 «كەلەشەك مەكتەبىندە» پيلوتتىق نەگىزدە قولدانىستا. بۇل مەكتەپتە جاساندى ينتەللەكتپەن جۇمىس ىستەۋگە ارنالعان زاماناۋي تسيفرلىق قۇرالدار مەن ادىستەر سىناقتان ءوتىپ جاتىر. ءبىلىم بەرۋ ورتاسىنا كەزەڭ-كەزەڭىمەن Roqed AI, Aqyl, Google Workspace for Education جانە جاساندى ينتەللەكت نەگىزىندەگى Kahoot سياقتى شەشىمدەر جۇزەگە اسىرىلادى.
«جاساندى ينتەللەكت قازىرگى تاڭدا تەك وقىتۋ قۇرالى عانا ەمەس, سونىمەن قاتار مۇعالىمنىڭ كومەكشىسى, وقۋشىنىڭ سەرىكتەسىنە اينالۋدا. ءبىز تەحنولوگيالار ويلاۋ, كوممۋنيكاتسيا جانە جەكە جاۋاپكەرشىلىك داعدىلارىن دامىتۋعا قىزمەت ەتەتىن ءبىلىم بەرۋ ورتاسىن قالىپتاستىرىپ جاتىرمىز», دەدى ى. التىنسارين اتىنداعى ۇلتتىق ءبىلىم اكادەمياسىنىڭ جەتەكشى ساراپشىسى اسەم سارىبەكوۆا.
سونداي-اق, ءبىلىم بەرۋ ۇيىمدارىنا ى. التىنسارين اتىنداعى ۇلتتىق ءبىلىم اكادەمياسى ازىرلەگەن, جاساندى ينتەللەكتتى قولدانۋدىڭ ەتيكالىق ستاندارتتارىن قامتيتىن نورماتيۆتىك قۇجاتتار جولدانعان.
