80 ۇمىتكەر قاتىسقان بايقاۋدىڭ جەڭىمپازدارى مەن جۇلدەگەرلەرىن ماراپاتتاۋ راسىمىنە قمدب توراعاسى, باس ءمۇفتي ناۋرىزباي قاجى تاعان ۇلى, ساۋاپتى ءىس-شاراعا دەمەۋشىلىك جاساعان باحاريدين ابلازيموۆ, زيالى قاۋىم وكىلدەرى مەن قالا تۇرعىندارى قاتىستى.
«ەلىمىزدە جىل ساناپ قاريلارىمىزدىڭ قاتارى ارتىپ كەلەدى. تاۋەلسىزدىك العان جىلدارى قۇران وقي الاتىن ادامدارعا توردەن ورىن بەرسەك, ودان كەيىن ونىڭ بىرنەشە پاراسىن جاتتاپ العان, تاعى ءبىر كەزەڭدە قۇراندى تولىق جاتتاعان قاريلارعا ايرىقشا قۇرمەت كورسەتىلدى. ال بۇگىنگى تاڭدا قۇران وقۋدان يجازاسى بار قاري كورسەك, جۇرەگىمىز ەلجىرەيدى. وسى بايقاۋدى وتكىزۋگە دەمەۋشى بولعان باحاريدين نۇعمان ۇلىنا, دانيار جۇماباەۆ قاريىمىز باستاعان ادىلقازى مۇشەلەرىنە العىسىمدى بىلدىرەمىن. بايقاۋعا قاتىسقان قاريلارىمىزدىڭ ءبارى جەڭىمپاز اتاندى دەپ سانايمىن. ويتكەنى بۇل بايقاۋ ءاربىر قاريعا ۇلكەن جىگەر سىيلادى. جۇلدەلەرىڭىز قۇتتى بولسىن» دەدى باس ءمۇفتي ماراپاتتاۋ راسىمىندە.
سونىمەن قازىلار القاسىنىڭ شەشىمىمەن قۇراندى تولىق جاتتاۋ بويىنشا 1-ورىندى الماتىلىق ەسىمبەك ارسەن يەلەنىپ, اۆتوكولىك يەگەرى اتاندى. ەكىنشى ورىندى جامبىل وبلىسىنان كەلگەن حۋسەي راسۋل, ءۇشىنشى ورىندى اقمولالىق ىعىلمان مۇحاممەد جەڭىپ الدى. بۇلارعا جانە 4, 5 ورىنداردى العان قاريلارعا اقشالاي سىيلىقتار تابىستالدى.
قۇراننىڭ 20 پاراسىن جاتقا وقۋ بويىنشا باس جۇلدەنى شىمكەنتتەن كەلگەن مۇحاممادالي شاكىروۆ, 10 پارانى جاتقا وقۋ بويىنشا جەرگىلىكتى جەتىسۋ وبلىسىنىڭ قاريى الايدار بەكبولات, قۇراندى مانەرلەپ وقۋ بويىنشا اتىراۋ وبلىسىنىڭ ۇمىتكەرى بالتاباي ۇلان جەڭىپ الدى.
سونداي-اق 10 پارا بويىنشا سايىسقا تۇسكەن ەڭ جاس قاري قۇرالباي ءمۇحامماد (بقو, 6 جاستا) «كورەرمەن كوزايىمى» نوميناتسياسىمەن (200 000 تگ.) ماراپاتتالدى. جارىسقا قاتىسىپ, جۇلدە الماعان ۇمىتكەرلەردىڭ ارقايسىنا 70 000 تەڭگەدەن بەرىلدى.
