كوللاجدى جاساعان قونىسباي شەجىمباي, «EQ»
مينيستر ەكونوميكانى كولەڭكەدەن شىعارۋ ءۇشىن جاساندى ينتەللەكت پەن تسيفرلىق تەڭگە پايدالانىلىپ جاتقانىن ايتتى.
جوبانىڭ نەگىزگى وزەگى مول دەرەكتەر اۋقىمىن تالداپ, سالىق تولەۋدەن جالتارۋ سحەمالارىن انىقتاۋ جانە سالىق تولەۋشىنىڭ تسيفرلىق بەيىنىن قالىپتاستىرۋ ماقساتىندا جاساندى ينتەللەكت قۇرالدارىن پايدالاناتىن Smart Data Finance جۇيەسى بولىپ وتىر.
«ەلەكتروندى شوت-فاكتۋرالار بەرۋ كەزىندە بيومەتريالىق جەكە باسىن انىقتاۋ تالابىنىڭ ەنگىزىلۋى 33 ميلليارد تەڭگەدەن استام سوماعا جالعان شوت-فاكتۋرالار جازۋ ارەكەتىنىڭ الدىن الدى. ە-تاڭبا جوباسى ارقىلى ەنگىزىلگەن اۆتوماتتاندىرىلعان قاداعالاۋ جۇيەسى ققس تەڭگەرىمىن تەكسەرۋگە جانە «سۇر» سحەمالاردى ەرتە باستان انىقتاپ, جولىن كەسۋگە مۇمكىندىك بەرىپ وتىر. قازىردىڭ وزىندە 250 ملن ەلەكتروندىق شوت-فاكتۋرا جانە 500 ملن تولەم وڭدەلدى. جوبا ناتيجەسىندە بيۋدجەتكە جىلىنا 100 ملرد تەڭگەگە دەيىن ءتۇسىم تۇسەدى دەپ بولجانىپ وتىر. ودان بولەك ۇلتتىق بانكپەن بىرلەسىپ «تسيفرلىق قوسىلعان قۇن سالىعى» پيلوتتىق جوباسىن جۇزەگە اسىرىپ جاتىرمىز. تسيفرلىق تەڭگەمەن ەسەپ ايىرىسۋ اقشانى كولەڭكەگە جاسىرۋ جولىن بۇعاتتاپ, بارلىق جەتكىزۋ تىزبەگىن اشىق ەتەدى», دەدى ءمادي تاكيەۆ.
مينيسترلىك تسيفرلىق تەڭگەنى باسقا دا سەكتورلارعا, سونىڭ ىشىندە مەملەكەتتىك ساتىپ الۋ سالاسىنا دا, كەڭىنەن ەنگىزۋدى ۇسىنىپ وتىر. تسيفرلاندىرۋ كەدەندىك اكىمشىلەندىرۋ سالاسىنا دا قارقىندى تۇردە ەنگىزىلۋدە. جي-تەحنولوگيالاردى ينسپەكتسيالىق-قاراپ تەكسەرۋ كەشەندەرىندە پايدالانۋ دۇرىس دەكلاراتسيالانباعان تاۋارلاردى انىقتاۋعا مۇمكىندىك بەرىپ, كەدەندىك باقىلاۋداعى ادامي فاكتوردى بارىنشا ازايتادى.
