فوتو: سۋ رەسۋرستارى جانە يرريگاتسيا مينيسترلىگى
الماتى وبلىسىندا 136 مىڭ گەكتار جەر سۋارىلىپ, شارۋالاردىڭ قاجەتىنە 1,6 ملرد تەكشە مەتر سۋ الىندى. جەتىسۋدا 140 مىڭ گەكتار ەگىستىك القاپتارى سۋارىلىپ, سۋ الۋ كولەمى 1,2 ملرد تەكشە مەتر بولدى. جامبىل ايماعىندا شامامەن 79 مىڭ گەكتار جەر سۋارىلدى, ال شارۋالارعا تاسوتكەل سۋ قويماسىنان جانە شۋ, تالاس وزەندەرىنەن بارلىعى 1 ملرد تەكشە مەتر شاماسىندا سۋ الىنعان.
قىزىلوردا وڭىرىندە 3,5 ملرد تەكشە مەتر سۋ پايدالانىلىپ, 125 مىڭ گەكتار ەگىستىك جەر سۋارىلعان. تۇركىستان وبلىسىندا شامامەن 400 مىڭ گەكتار جەرگە سۋ بەرىلىپ, جالپى كولەمى 3,4 ملرد تەكشە مەتر سۋ الىندى.
سالا ءمينيسترى ن.نۇرجىگىتوۆتىڭ ايتۋىنشا وڭتۇستىك وڭىرلەردە بيىلعى ۆەگەتاتسيا كەزەڭى كۇردەلى كليماتتىق جاعدايدا ءوتتى. سوعان قاراماستان, مينيسترلىك, جەرگىلىكتى اتقارۋشى ورگاندار جانە شارۋالاردىڭ ۇيلەسىمدى جۇمىسىنىڭ ناتيجەسىندە سۋارۋ ماۋسىمى تۇراقتى ءوتتى.
ء«بىز وڭتۇستىك وڭىرلەردە سۋدىڭ ءادىل ءبولىنۋىن قامتاماسىز ەتۋ ءۇشىن ءتورت جۇمىس توبىن قۇردىق. سونىمەن قاتار كانالدار ارقىلى سۋدى كەزەكپەن بەرۋ كەستەلەرى بەكىتىلدى, سورعى قوندىرعىلارى مەن تىك درەناج جۇيەلەرى ىسكە قوسىلدى, سۋ شارۋاشىلىعىنداعى جاعداي تۇراقتى باقىلاۋدا بولدى. كوللەكتورلىق-درەناجدىق سۋ دا قايتا پايدالانىلدى», دەدى ن.نۇرجىگىتوۆ.
