فوتو: الماتى قالاسى اكىمدىگىنىڭ ءباسپاسوز قىزمەتى
پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ جەتەكشىلىگىمەن وتكەن كەڭەستە ينفلياتسيانى تەجەۋ ماسەلەلەرى قارالدى. جيىن بارىسىندا جىل سوڭىنا دەيىن باعانى تۇراقتاندىرۋعا باعىتتالعان ناقتى قادامدار ءسوز بولدى.
«جىلدىق ينفلياتسيانىڭ نەگىزگى قوزعاۋشىسى – اقىلى قىزمەتتەر. قىركۇيەكتە اقىلى قىزمەتتەردىڭ ءوسۋ قارقىنى باسەڭدەپ, تامىزداعى 1,4%-بەن سالىستىرعاندا 1%-عا دەيىن تومەندەگەن. ويتكەنى 2025 جىلعا جوسپارلانعان كوممۋنالدىق قىزمەت تاريفتەرىن تۇزەتۋ شارالارى اياقتالدى. بۇعان دەيىن ايتىلعانداي, قازان ايىنان باستاپ كوممۋنالدىق قىزمەت تاريفتەرىن كوتەرۋ جوسپاردا جوق. الەۋمەتتىك ماڭىزى بار ازىق-ت ۇلىك تاۋارلارىنىڭ باعاسى دا تۇراقتالۋدا. قىركۇيەكتىڭ سوڭعى اپتاسىندا الەۋمەتتىك ماڭىزى بار ازىق-ت ۇلىك يندەكسى وسپەدى. قانت, تۇز, ماكارون, كۇرىش, ءسۇت جانە الەۋمەتتىك ماڭىزى بار كوكونىستەردىڭ باعاسى ارزاندادى», دەلىنگەن حابارلامادا.
جالپى اي قورىتىندىسىندا نان-توقاش ونىمدەرى مەن جارمالار 0,1%-عا, ەت 0,2%-عا, ماي 0,2%-عا, جۇمىرتقا 3,1%-عا, جەمىس پەن كوكونىس 1,9%-عا ارزانداعان.
اسىرەسە قىرىققابات باعاسىنىڭ ايتارلىقتاي تومەندەۋى ەرەكشە نازارعا الىندى. جىلدىڭ العاشقى جارتىسىندا ەداۋىر قىمباتتاعان بۇل ءونىم مامىر ايىمەن سالىستىرعاندا 52%-عا ارزانداعان. باسقا دا ماۋسىمدىق ونىمدەردىڭ باعاسى تومەندەۋ ءۇردىسىن كورسەتتى.
ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆانىڭ ايتۋىنشا, بارلىق وڭىرلەردە وندىرۋشىلەرمەن الەۋمەتتىك ماڭىزى بار ازىق-ت ۇلىكتىڭ باعاسىن جىل سوڭىنا دەيىن ۇستاپ تۇرۋ جونىندە كەلىسىمدەر جاسالدى. قازان مەن جەلتوقسان ارالىعىندا ەل بويىنشا اپتاسىنا كەمىندە ءبىر رەت, دەمالىس پەن مەرەكەلىك كۇندەردى قوسا ەسەپتەگەندە, بارلىعى 1619 اۋىل شارۋاشىلىعى جارمەڭكەسى وتەدى.
استانادا ءىرى ساۋدا جەلىلەرى اۋىل شارۋاشىلىعى مينيسترلىگىمەن بىرگە سيىر ەتىن وندىرۋشىلەردەن تىكەلەي ساتىپ الۋ تاجىريبەسىن ىسكە اسىردى. تيىمدىلىگىن دالەلدەگەن بۇل باستاما ەندى ايماقتارعا كەڭەيتىلەتىن بولادى.
«بەرەكە Fest» اكتسياسى اياسىندا ەلىمىزدىڭ 80 ساۋدا جەلىسى اگروفيرمالارعا ەت پەن باسقا دا الەۋمەتتىك ماڭىزدى ونىمدەردى تىكەلەي سۋپەرماركەت سورەلەرىنە جەتكىزۋگە مۇمكىندىك بەردى. ساۋدا جەلىلەرى الەۋمەتتىك جاۋاپكەرشىلىك تانىتىپ, وسىنداي ونىمدەر ءۇشىن ارنايى بۇرىشتار ۇيىمداستىردى. قازىر اكىمدىكتەر جانە بيزنەس وكىلدەرىمەن بىرلەسىپ, رەسپۋبليكا كۇنىنە ارنالعان مەرەكەلىك جارمەڭكەلەر مەن اكتسيالاردى ۇيىمداستىرۋ ۇستىندەمىز», دەدى ايجان بيجانوۆا.
اۋىل شارۋاشىلىعى مينيسترلىگىنىڭ دەرەگىنشە, وڭىرلەردىڭ باسىم بولىگى تۇراقتاندىرۋ قورىنا جاڭا ءونىم جەتكىزۋ جونىندەگى كەلىسىمدەردى اياقتادى. قورعا بارلىعى 245 مىڭ توننا ءونىم قابىلدانباق, ونىڭ ىشىندە 146,7 مىڭ توننا كارتوپ, 35,3 مىڭ توننا ءسابىز, 27,4 مىڭ توننا پياز جانە 36 مىڭ توننا قىرىققابات بار. الايدا اقتوبە جانە ۇلىتاۋ وبلىستارىندا قىرىققابات ساتىپ الۋ كولەمى 50%-دان ءسال عانا اسقاندىقتان, كەشەۋىلدەۋ بايقالادى. وسىعان وراي ۆيتسە-پرەمەر مينيسترلىككە اتالعان وڭىرلەرگە جەتكىزۋشىلەر تابۋعا قولداۋ كورسەتۋدى تاپسىردى.
