ايتىسكەر اقىننىڭ مەرەيتويى ءبىلىم العان مەكتەبىندە باستالدى. ءبىلىم شاڭىراعىنا اقىن ەسىمى جازىلعان ەسكەرتكىش-تاقتا ءىلىندى. ەسكە الۋ شاراسىنا جيىلعان ءسوز زەرگەرلەرى مەن ايتىس ونەرىنىڭ مايتالماندارى وت اۋىزدى ورازالىنىڭ وتىزعا تولماي, قامشىنىڭ سابىنداي عۇمىردا حالقىمىزدىڭ رۋحاني قازىناسىنا قايتالانباس مول مۇرا قالدىرىپ, ايتىس ونەرىندە وزىندىك مەكتەپ قالىپتاستىرعانىن ەستەلىك-اڭگىمەگە ارقاۋ ەتتى. ءتىپتى بالا ورازالىنى باس-تاۋىش سىنىپتان باپتاعان ۇستازى دا ونىڭ ك ۇلىمدەپ تۇراتىن جىپ-جىلى بەينەسىن ەلجىرەي ەسكە الدى.
«مەكتەپ تابالدىرىعىن اتتاعاننان ورازالى وتە زەرەك بولدى. وقۋشىلار «بالدىرعان» جۋرنالىنا جازىلاتىن. ونداعى تاقپاق, جاڭىلتپاشتاردى تەز جاتتاپ الاتىن. ىلعي جىميىپ جۇرەتىن ەدى. كوپبالالى وتباسىنان شىققان ورازدىڭ جۇزىنە مەيىرىم ۇيالاپ تۇراتىن», دەيدى باستاۋىش سىنىپ مۇعالىمى باقىتگۇل راحىموۆا.
ءسۇيىنبايدىڭ 170 جىلدىق تويىندا وزىنەن جاسى الدەقايدا كىشى ورازالىنى شابىسىنان تانىپ, شىن تالانتقا باتاسىن بەرگەن ايتىس ونەرىنىڭ بۇگىنگى اقساقالى شورابەك ايدار ۇلى: «مىنا زاڭعار تاۋلارى بار ولكەدە ورازالىداي كەڭ تىنىستى, ۇلكەن جۇرەكتى اقىننىڭ تۋماۋى مۇمكىن ەمەس ەكەن. «تۇلپار ءىزىن تاي باسار», ۇرپاقتار جالعاسا بەرسىن», دەپ ىزگى تىلەگىن ءبىلدىردى.
وت اۋىزدى, وراق ءتىلدى ورازالىنىڭ شەشەندىك ونەرى مەن ءومىرىن ارقاۋ ەتكەن ءىس-شارادا ءسوز تيەگى اساۋ وزەندەي اعىتىلدى. ايتىس الەمىنە قاناتىن قومداعان بالا ورازالىنى قولىنان جەتەكتەپ, قولداۋ بىلدىرگەن ەل اعالارى, رايىمبەك اۋدانىنىڭ قۇرمەتتى ازاماتى ىزعاربەك بەكتۇرسىنوۆ, جازۋشىلار وداعىنىڭ مۇشەسى, «مۇقاعالي» جۋرنالىنىڭ باس رەداكتورى دۇيسەن ماعلۇموۆ, زەينەتكەر ۇستازدار داۋلەت شاكەنوۆ, جاناتكۇل داۋقاباقوۆا جانە مارقۇمنىڭ سىنىپتاس, كۋرستاستارى دا ەستەلىكتەرىن ايتتى. سونداي-اق اقىن اتىنداعى قوعامدىق قوردىڭ ۇيىتقى بولۋىمەن ورازالى دوسبوسىنوۆتىڭ ايتىستارى توپتاستىرىلعان «اقىنمىن ءسوزى جەتەر سان عاسىرعا» اتتى كىتاپتىڭ تۇساۋى كەسىلىپ, وقىرمانعا جول تارتتى.
«ورنىندا بار وڭالار» دەمەكشى, ايتىس اقتاڭگەرىنىڭ ارتىندا قالعان قىزى نۇرايشا مەن ۇلى نۇرسۇلتانعا ەل-جۇرتى ات مىنگىزدى. ءان مەن كۇي توگىلتتى. مەكتەپ جانىنداعى ساياباققا اعاشتار وتىرعىزىلدى.
وسىلايشا, ءتاڭىرتاۋ اياسىن دۇبىرگە بولەگەن مەرەيتوي كەلەسى كۇنى نارىنقول اۋىلىنداعى باققوجا مۇقاي اتىنداعى اۋداندىق مادەنيەت ۇيىندە وتكەن «قۇلمامبەتتىڭ ق ۇلىنى» اتتى وقۋشىلار اراسىنداعى رەسپۋبليكالىق ايتىسقا ۇلاستى. وعان ەلىمىزدىڭ ءار وڭىرىنەن كەلگەن 20-عا جۋىق جاس ايتىسكەر قاتىسىپ, ءوزارا باق سىناستى. ايتىس قورىتىندىسىندا شاشاسىنا شاڭ جۇقتىرماعان شىن جۇيرىكتەر انىقتالىپ, قارجىلاي سىيلىقتار تابىس ەتىلدى.
الماتى وبلىسى
