تاتيانا سەرگەەۆنانىڭ ءتىلى قازاقشا شىعىپتى. سودان ءوزى دە قازاق مەكتەبىندە وقۋدى ارماندايدى. قىزىلوردا قالاسىنداعى №179 قازاق ورتا مەكتەبىنىڭ تابالدىرىعىن اتتاپ, مەكتەبىنىڭ «جۇلدىزىنا» اينالىپ شىعا كەلەدى. وقۋ ۇلگەرىمى بويىنشا دا ۇزدىك, قوعامدىق ءىس-شارالارعا دا بەلسەندى بولادى. قارشادايىنان قازاق ءتىلىن سۇيگەن ول ولەڭ-جىرعا قۇمارتىپ وسەدى. كىتاپ وقۋ سۇيىكتى ىسىنە اينالادى. وسىلايشا, مەكتەپتە ءجۇرىپ-اق مۇعالىم بولۋدى ومىرلىك ماقساتى ەتەدى. اسىرەسە سۇيىكتى ۇستازدارى – باستاۋىش سىنىپ مۇعالىمى باعىمگۇل ۇسەنعاليەۆا مەن قازاق ءتىلى جانە ادەبيەتى ءپانىنىڭ مۇعالىمى ماليكا اسامۇراتوۆا وسى ءبىر مارتەبەلى ماماندىقتى تاڭداۋعا ۇلكەن ۇلەسىن قوسىپ, جول كورسەتىپتى.
ە.بوكەتوۆ اتىنداعى قاراعاندى ۋنيۆەرسيتەتى, سونىڭ ىشىندە فيلولوگيا فاكۋلتەتىندە مىقتى ماماندار شوعىرلانعانى, جالپى داۋىرلەپ تۇرعانى جەر-جەرگە تارايدى. مۇنى ەستىپ العان جاپ-جاس تاتيانا قالايدا وسى وقۋ ورنىنىڭ ستۋدەنتى اتانۋدى ويلاپ, بارىن سالادى. قىزىلوردادان ارمان قۋىپ قاراعاندىعا كەلگەن تاتيانا سەرگەەۆنا وسىلايشا, وقۋعا ءتۇسىپ, ەسىمىنە سىرتتاي قانىق بولىپ وسكەن ەلگە بەلگىلى عالىم-ۇستازداردان ءتالىم الادى.
ۋنيۆەرسيتەت ۇستازدارى دا جالىنداپ تۇرعان ۋكراين قىزىنىڭ قازاق تىلىنە دەگەن ماحابباتىن, قۇرمەتىن بىردەن سەزىنىپ, ىقىلاسپەن قابىلدايدى. سول ءبىر ساۋلەلى ساتتەرىن ۇلاعاتتى ۇستاز بىلاي ەسىنە الادى:
«قاراعاندىعا كەلگەنىمدە ۇلكەن قورقىنىش بولدى. بىراق ۇستاز بولۋ دەگەن ۇلى ارمانىم سونىڭ ءبارىن جەڭە ءبىلدى. ۋنيۆەرسيتەت وقىتۋشىلارى العاشىندا اڭ-تاڭ بولعانى بار. كادىمگى قازاق قىزدارىنان كەم سويلەمەيتىنىمدى كورىپ, قولداۋ كورسەتتى. اسىرەسە قازاق ءتىلى گرامماتيكاسىنان ساباق بەرگەن شاپاعات جالماحانوۆ اكەمدەي قامقورلىق كورسەتتى. ول كەزدە فاكۋلتەت دەكانىنىڭ ورىنباسارى ەدى. ساباق بەرۋ مەتوديكاسى, ءتىل ستيليستيكاسى, گرامماتيكاسى, ءتىل مادەنيەتى سالالارى بويىنشا ساۋاتىمىزدى اشتى. ءار دارىسىندە تاپتىشتەپ تۇسىندىرەتىن ەدى. سول وقىعانىمىزدىڭ بارلىعى ۇستازدىق جولىمىزدا كادەگە جاراپ كەلەدى. ءسويتىپ, سۇيىكتى ۋنيۆەرسيتەتىمىزدەن تەك مۇعالىم عانا ەمەس, قازاق ءتىلىنىڭ جاناشىرى ءارى زەرتتەۋشىسى بولىپ شىقتىق», دەيدى تاتيانا.
تالاپتى تاتيانانىڭ قاراعاندىعا كەلگەن قادامى قۇت بولىپ, قۇدايبەرگەن اۋلەتىنە كەلىن بولادى. ومىرلىك جولداسى سابيتپەن جولىعىپ, شاڭىراق قۇرادى. قازىر اۋلەتىندە ونەگەلى كەلىن, اياۋلى جار, ارداقتى انا.
ۋنيۆەرسيتەتتى ۇزدىك بىتىرگەن جاس ماماندى ءارى جاس عالىمدى كەز كەلگەن مەكتەپ قۇشاق جايا قارسى الادى ەمەس پە؟ وسىلايشا, ەڭبەك جولىن قاراعاندىداعى №47 مەكتەپتە باستاعان ول اباي اۋدانىنداعى №10 مەكتەپ-گيمنازياسىندا, №14 مەكتەپ-ليتسەيىندە شاكىرتتەرىنە ءبىلىم بەرەدى. ودان سوڭ ءومىرىنىڭ ءبىر بولشەگىندەي بولعان عىلىم سالاسىنا دا ويىسۋدى ويلاستىرىپ, ادىلەت مينيسترلىگىنىڭ زاڭناما جانە قۇقىقتىق اقپارات ينستيتۋتىندا ەڭبەك جولىن جالعاستىرادى.
قازىر قاراعاندىداعى «ادىلەت» بولاشاق مەكتەبىندە قازاق ءتىلى مەن ادەبيەتى ءپانىنىڭ مۇعالىمى بولىپ, ساباق بەرىپ ءجۇر. ونىمەن قوسا, اتالعان مەكتەپ ديرەكتورىنىڭ وقۋ-تاربيە جونىندەگى ورىنباسارى. عىلىمعا باۋلىعان شاكىرتتەرىنىڭ الدى بەدەلدى ۇستازعا اينالىپ ۇلگەرگەن.
قازىر دە قازاق ءتىلىنىڭ مارتەبەسىن كوتەرۋدە دە اۋقىمدى جۇمىس اتقارىپ ءجۇر. عىلىم مەن ءبىلىمدى قاتار ۇشتاستىرىپ جۇرگەن ۇلاعاتتى ۇستازدىڭ ۇستانىمى دا ۇلى: انا تىلگە قۇرمەت – الاشقا قۇرمەت!
قاراعاندى وبلىسى
