حايۋاناتتار باعى قىزمەتكەرلەرىنىڭ ايتۋىنشا, 6 جاسار بەنتلي مەن 5 جاستاعى ايكي ەسىمدى امۋر جولبارىسى جۇبىنان تۋعان كۇشىكتەردىڭ (شونجىك) ەكەۋى دە ەركەك. بۇل – سوڭعى جىلدارداعى العاشقى شونجىكتەر ءارى «قىزىل كىتاپقا» ەنگەن سيرەك ءتۇردى ساقتاۋعا قوسىلعان ەرەكشە ۇلەس.
جولبارىستار تابيعاتىنان جالعىز جۇرەتىن جىرتقىش بولعاندىقتان, ولاردى جۇپتاستىرۋ وڭاي ەمەس. زووباق ماماندارى ساۋ شونجىك الۋ ءۇشىن قىرۋار شارۋا اتقارىلعانىن ايتادى. سەبەبى كوزىن اشقان كۇشىكتەر جەتىلگەنشە كوپ كۇتىمدى قاجەت ەتەدى. كىشكەنتاي جىرتقىشتار العاشقى ايلارىن ارنايى تىنىش ايماقتا وتكىزدى. بۇل – شۋ مەن سىرتقى دىبىستى وقشاۋلايتىن ارنايى ۆولەر. مۇنداي جاعداي ۇرعاشى جولبارىستىڭ كۇيزەلىسىن تومەندەتىپ, كۇشىكتەردىڭ دۇرىس دامۋى ءۇشىن قاجەت.
«امۋر جولبارىستارىنىڭ انالىقتارى اسقان سەزىمتال. سوندىقتان كۇشىكتەگەننەن كەيىن ولاردى وقشاۋلاۋ ماڭىزدى. جولبارىستار العاشقى ايلاردا شونجىگىن قورعاۋ ءۇشىن كەز كەلگەن سىرتقى دىبىس پەن كوزگە تۇسەتىن اسەرلەرگە سەزىمتال بولادى. سوندىقتان ءبىز وعان اكۋستيكالىق, ۆيزۋالدىق اسەرى تومەن ورتا جاسادىق. ءۇش ايعا دەيىن جولبارىس كۇشىكتەرى «سەزىمتال كەزەڭنەن» ءوتتى. بۇل ۋاقىتتا ارتىق دىبىس پەن ءيىس انالىقتىڭ مازاسىزدانۋىنا, سونىڭ سالدارىنان ءتولدىڭ دامۋىنا اسەر ەتۋى مۇمكىن. وسى ۋاقىت بويى جولبارىستار كۇندەلىكتى ۆەتەرينارلىق باقىلاۋدا بولدى. قازىر كارانتين اياقتالدى, كۇشىكتەردىڭ جاعدايى جاقسى, ناعىز جولبارىسقا ءتان قىلىقتارىن كورسەتە باستادى», – دەيدى زووباقتىڭ باس ۆەتەرينارى ۆيتالي ساچكوۆ.
كۇنى كەشە ولار جاڭا ۆولەرگە كوشىرىلدى. ەندى حايۋاناتتار باعىنىڭ قوناقتارى زووباقتىڭ وسى جاڭالىعىمەن ەركىن تانىسا الادى.
الماتى
