كورشى ەلدە بولىپ جاتقان جاڭالىققا ءبىز بەكەر توقتالىپ وتىرعان جوقپىز. ايتجان – وزبەكستاندا تۋىپ-وسكەن ءوز قانداسىمىز. بالا كەزىنەن بالۋاندىق ونەرگە دەن قويعان ول بىردەن دارا تالانتىمەن وقشاۋلاندى. اۋەلى قالماحانوۆ 2022 جىلى ريمدە جاسوسپىرىمدەر جانە بيىل سوفيادا جالاۋى جەلبىرەگەن جاستار اراسىنداعى الەم بىرىنشىلىكتەرىندە قارسىلاس شىداتپاي, جەڭىس تۇعىرىنىڭ ەڭ بيىك ساتىسىنا كوتەرىلدى. ۇستىمىزدەگى جىلدىڭ مامىر ايىندا امماندا ەرەسەكتەر اراسىندا ازيا چەمپيونى اتاندى.
زاگرەبتەگى دۇنيەجۇزىلىك دودادا 63 كگ سالماق دارەجەسىندە كۇش سىناسقان ايتجاننىڭ اسقان شەبەرلىگىنە ءتانتى بولدىق. 19 جاستاعى قانداسىمىز تۇساۋكەسەر كەزدەسۋىندە ەۋروپا چەمپيوناتىنىڭ ەكى دۇركىن جۇلدەگەرى, ۋكراينالىق الەكساندر گرۋشيندە ويسىراتا ۇتسا, شيرەك فينالدا قازاقستان قۇراما كومانداسىنىڭ بەلدى مۇشەسى, الەم چەمپيوناتىنىڭ ءفيناليسى, ازيا چەمپيونى ەرجان جارىلقاسىنوۆتى مەرزىمنەن بۇرىن جەڭدى. جارتىلاي فينالدا جاستار اراسىنداعى الەم بىرىنشىلىگىنىڭ جەڭىمپازى, ەرەسەكتەردىڭ ەۋروپا چەمپيوناتىنىڭ قولا جۇلدەگەرى, مولدوۆالىق ۆيتالي ەرەمەنكونى وڭاي ەڭسەرگەن قالماحانوۆ باس جۇلدە ءۇشىن تارتىستا وڭتۇستىك كورەيانىڭ وعىلانى, ازيا ويىندارىنىڭ قولا مەدالىسى حاندجە چۋندى دا وڭدىرمادى. وسىلايشا, وزىنەن الدەقايدا ەرەسەك ءارى تاجىريبەلەرى ابدەن تولىسقان ساقا سپورتشىلارعا سان سوقتىرعان قازاق بالۋانى تورتكۇل دۇنيەنىڭ تەڭدەسسىزى دەپ تانىلدى.
ەگەر وتكەنگە زەر سالساق, كۇرەستىڭ بۇل تۇرىنەن وزبەكستان بالۋاندارىنىڭ التىن الماعانىنا تابانى كۇرەكتەي 24 جىل بولعان ەكەن. وسىلايشا, قازاقتىڭ قايسار ۇلى ايتجان قالماحانوۆتىڭ ارقاسىندا «الا شاپاندى» اعايىندارىمىز شيرەك عاسىر بويى اڭساعان ارماندارىنا قول جەتكىزدى. جارايسىڭ, جايسانىم!
