الماتىلىق كلۋبتىڭ ايگىلى «رەال مادريد» فۋتبولشىلارىنا قارسى تارتىسى دا تاريح جىلناماسىنا جازىلدى. ماتچتا «قايرات» ويىنشىلارىنىڭ 0-5 ەسەبىمەن ۇتىلۋى ەلدەگى فۋتبولدىڭ دەڭگەيى قاي شامادا ەكەنىن اڭعارتتى. دەسە دە الماتىلىق كلۋبتىڭ ەلگە فۋتبول مەرەكەسىن تارتۋ ەتىپ, ۋەفا چەمپيوندار ليگاسىنىڭ جالپى كەزەڭىنە ات بايلاۋى دا زور مارتەبە.
24-مينۋتتا كيليان مباپپە پەنالتيدەن گول سوعىپ, ەسەپ اشقان سوڭ دا, «كورولدىك كلۋب» ايىلىن جيعان جوق. كەرىسىنشە, 1-تايمنىڭ سوڭىنا دەيىن باسىمدىقتى ۇستەمەلەپ, قىسىمدى كۇشەيتە ءتۇستى. 2-تايمدا سوعىلعان 4 گول دا قورعانىستا وينايتىن فۋتبولشىلاردىڭ قاۋقارسىزدىعىن ايگىلەپ بەردى. جاسىنداي جارقىلداعان مباپپە 52-مينۋتتا ەكىنشى, 73-مينۋتتا ءۇشىنشى گولىن سوعىپ, ەنشىسىنە حەت-تريك جازدى. كاماۆينگا 83-مينۋتتا ەسەپ ايىرماسىن 0-4-كە جەتكىزدى. تەگەۋرىنگە ودان بەتەر ەكپىن قوسقان برايم دياس 90+3-مينۋتتا بەسىنشى گولدى سوقتى.
«قايراتتىڭ» جاس قاقپاشىسى شەرحان قالمىرزا جاۋاپتى ماتچتا وراسان قىسىمعا شىداس بەردى. سىن ساتتە شەبەرلىك تانىتىپ, بىرنەشە جويقىن سوققىلاردى قايتاردى. جانكۇيەردىڭ ىستىق ىقىلاسىنا بولەنگەن بوزبالاعا ويىننان كەيىن «رەال ءمادريدتىڭ» قاقپاشىسى تيبو كۋرتۋا جەيدەسىن بەردى. بۇل جىلى كورىنىستى جانكۇيەرلەر جاقسى ىرىمعا بالادى.
جەتىستىگى جەتپىس اتاننىڭ بەلىن قايىستىرار دەڭگەيدەگى كلۋبپەن تارتىسقا تۇسكەن فۋتبولشىلارىمىزعا بۇل دودا شىڭدالۋ مەكتەبى بولعانى انىق. اسىرەسە «قايرات» اكادەمياسى تۇلەكتەرىنىڭ فۋتبول سكاۋتتارىنىڭ نازارىنا ىلىنۋىنە زور مۇمكىندىك تۋدى. ماتچتان كەيىنگى ءباسپاسوز ءماسليحاتىندا «قايراتتىڭ» باس باپكەرى رافاەل ۋرازباحتين مۇنداي تەگەۋرىندى ۇجىمعا قارسى ويناپ, وراسان تاجىريبە جيناعانىنا توقتالدى.
«ەكى كلۋبتىڭ اراسالماعى, دەڭگەيى جەر مەن كوكتەي. ءبىز مۇمكىندىگىنشە قارىمتا شابۋىلدى ورىستەتۋگە ۇمتىلدىق. جىگىتتەر «رەال مادريد» كلۋبىنىڭ قورعانىسىن سىنالاپ بۇزۋعا تىرىستى. دوپقا يەلىك ەتۋدە, پاس بەرۋدە, الاڭدى كورە بىلۋدە ولار كلاسسيكالىق ويىن ۇلگىسىن كورسەتتى. ويىنشىلارىمىز الەمنىڭ تاڭداۋلى فۋتبولشىلارىمەن تارتىسقا ءتۇسىپ, شەبەرلىگىن شىڭدادى. ارينە, ءىرى ەسەپپەن جەڭىلگەنىمىز جانىمىزعا باتادى. بىزگە جۇكتەلگەن مىندەت – بيىلعى ماۋسىمدا ەل چەمپيونى اتانۋ. الدا پرەمەر-ليگانىڭ ءۇش ماڭىزدى ماتچى بار. قالايدا مول ۇپاي ەنشىلەپ, ىشكى چەمپيوناتتا ۇزدىك اتانۋعا بارىمىزدى سالامىز. ودان بولەك, ۋەفا چەمپيوندار ليگاسىنىڭ جالپى كەزەڭىندەگى ويىندار دا بار. جىگىتتەر بىرەر كۇن تىنىعىپ, جاتتىعۋعا قايتا كىرىسەدى. سەنىم ارتقان باسشىلىقتىڭ, جانكۇيەردىڭ ءۇمىتىن اقتاۋعا بارىمىزدى سالامىز», دەدى ر.ۋرازباحتين.
«رەال مادريد» كلۋبىنىڭ باس باپكەرى حابي الونسو «قايرات» فۋتبولشىلارىنىڭ جىگەرىنە ءتانتى ەتكەنىن ايتتى. ء«بىزدىڭ جىگىتتەر ويىننىڭ باستاپقى مەزەتىندە ابدىراپ تا قالدى. ستاديونعا جينالعان جانكۇيەردىڭ ءوز كومانداسىنا قولداۋى دا ەرەكشە بولدى. الماتىلىق كلۋبتىڭ چەمپيوندار ليگاسىنداعى ساپارىنا ساتتىلىك تىلەپ, تىلەۋلەستىگىمدى بىلدىرەمىن. الماتىعا كەلگەننەن باستاپ زور ىقىلاسپەن قارسى الىپ, ەرەكشە قوناقجايلىلىق تانىتتى, تاماشا اۋرانى سەزىندىك», دەگەن ح.الونسو الماتىنىڭ تابيعاتى دا ەرەكشە اسەر ەتكەنىن جەتكىزدى.
1992 جىلدان ۇلتتىق قۇرامانىڭ, «قايراتتىڭ» كاپيتانى بولعان فۋتبول ارداگەرى اسقار قوجابەرگەنوۆ تالانتتى ءىزباسارلارىنىڭ جەتىستىگىنە ءاردايىم ماقتاناتىنىن, كوماندانىڭ چەمپيوندار ليگاسىنىڭ جالپى كەزەڭىندە ويناپ, تاريحي ناتيجەگە قول جەتكىزگەنى ەل فۋتبولىنىڭ مەرەيى ەكەنىن ايتتى.
«فۋتبول تويىندا الەمدىك دەڭگەيدەگى جۇلدىزدار جانكۇيەرلەرگە ەرەكشە كوڭىل-كۇي سىيلادى. ماتچ الدىندا سۇحبات العان جۋرناليستەرگە قورعانىسقا بۇركەنىپ جاتىپ الماي, شابۋىلداۋ قاجەت ەكەنىن ايتىپ ەدىم. «رەال مادريد» الەمدەگى ۇزدىك كلۋبتاردىڭ قاتارىنداعى وتە تەگەۋرىندى ۇجىم. ۋەفا چەمپيوندار ليگاسىن 15 مارتە ەنشىلەگەن كلۋب. بىراق اتاعىنان قايمىقپاي, قارىمتا شابۋىلدى ۇدەتىپ, مىنەز تانىتۋ كەرەك ەكەنىن ءبارى دە ۇعىندى. جىگىتتەر بارىن سالىپ وينادى. قارسىلاس كلۋب ويىنشىلارىنىڭ داڭقىنان دا قايمىققان جوق, شابۋىلداپ, ۇرىمتال ءساتتى ءمۇلت جىبەرمەۋگە تىرىستى», دەدى ا.قوجابەرگەنوۆ. فۋتبول ارداگەرى كوماندا قاقپاشىلارىنىڭ الەم نازارىن اۋدارۋى كلۋبتاعى قاقپاشىلاردى باپتايتىن ۇجىم ەڭبەگىنىڭ ناتيجەسى ەكەنىن دە اتاپ ءوتتى.
«قايرات» ۋەفا چەمپيوندار ليگاسىنىڭ جالپى كەزەڭىندەگى ءۇشىنشى تۋر ماتچىن ءوز الاڭىندا وتكىزەدى. 21 قازاندا كيپرلىك «پافوس» كلۋبىن قابىلدايدى.
