30 قىركۇيەك كۇنى الماتىدا چەمپيوندار ليگاسىنىڭ ەكىنشى تۋرىنداعى ماتچ ءوتتى. وندا «قايرات» ءوز الاڭىندا مادريدتىك «رەالدى» قابىلدادى. يسپاندىق كوماندانىڭ باس باپكەرى حابي الونسو نەگىزگى قۇرامدى الاڭعا شىعاردى, ونىڭ قاتارىندا كيليان مباپپە دە بولدى. فرانتسۋز شابۋىلشىسى حەت-تريك جاساپ, چەمپيوندار ليگاسىنداعى گولدار سانىن 60-قا جەتكىزدى. كەيىن ول الاڭنان الماستىرىلدى. كەزدەسۋ ناتيجەسى – ەۋروپانىڭ ەڭ اتاقتى كلۋبىنىڭ پايداسىنا 5:0.
ويىننان كەيىن مباپپە ءوز اسەرىمەن ءبولىسىپ, «قايراتتىڭ» ويىنى مەن ستاديونداعى اتموسفەرانى ەرەكشە اتاپ ءوتتى.
– «قايرات» – ساپالى كوماندا. چەمپيوندار ليگاسىندا وسىنداي كلۋبتاردىڭ بولۋى جاقسى دەپ ويلايمىن. بۇل ءتۋرنيردىڭ كەز كەلگەن بەلگىلى ءبىر دەڭگەيگە جەتكەن كوماندالارعا اشىق ەكەنىن كورسەتەدى. جانكۇيەرلەردىڭ قولداۋى كەرەمەت بولدى. بۇل مەن ءۇشىن تاماشا تاجىريبە بولدى, – دەدى ول.
فرانتسۋز شابۋىلشىسى جەكە ستاتيستيكادان گورى كوماندا جەتىستىگىنىڭ ماڭىزدى ەكەنىن اتاپ ءوتتى.
– چەمپيوندار ليگاسىنداعى 60 گول – بۇل ماڭىزدى كورسەتكىش. بىراق الدا ءالى كوپتەگەن ويىن بار. ماعان كوبىرەك گول سوعىپ, كوماندالىق مىندەتتەردى شەشۋگە كومەكتەسۋ قاجەت, – دەدى مباپپە.
ايتا كەتەيىك, الماتىدا جاساعان حەت-تريگىنىڭ ارقاسىندا مباپپە بيىلعى ماۋسىمداعى چەمپيوندار ليگاسىنىڭ بومبارديرلەر جارىسىندا كوش باستاپ تۇر. ول وسىعان دەيىن ءتورت گولى بار ميۋنحەندىك «باۆاريانىڭ» شابۋىلشىسى حارري كەيندى ارتتا قالدىردى.
