جيىنعا كەلگەن قارتتارعا «OpenAI» كومپانياسى ازىرلەگەن, جاساندى ينتەللەكتىگە نەگىزدەلگەن, سۇراقتارعا ناقتى ءارى مازمۇندى جاۋاپ بەرەتىن اقىلدى چات-بوت – ChatGPT تانىستىرىلدى. كوپشىلىك بۇل «اقىلدى» باعدارلامانى قىزىعۋشىلىقپەن قابىلداپ, وزدەرىنىڭ ۇيالى تەلەفوندارىندا قولدانىپ كوردى. قوسىمشا ارقىلى سۇراق قويىپ, ناقتى ءارى مازمۇندى جاۋاپ العان اقساقالدار ريزاشىلىقتارىن جەتكىزىپ, جاڭا تەحنولوگيانىڭ ارتىقشىلىقتارىنا كوز جەتكىزىپ, تاڭدانىستارىن ءبىلدىردى.
جاستار ChatGPT, Google Gemini, Copilot سەكىلدى جاساندى ينتەللەكت پلاتفورمالارىنىڭ ءمانى مەن مۇمكىندىكتەرى تۋرالى كەڭىنەن بايانداپ, ارداگەرلەرگە ونى كۇندەلىكتى ومىردە قالاي قولدانۋعا بولاتىنى جونىندە ناقتى مىسالدار كەلتىردى. جاساندى ينتەللەكتىنىڭ قوعامعا اكەلەتىن پايداسى, تيىمدىلىگى مەن ىقتيمال تاۋەكەلدەرى, قاۋىپسىزدىك شارالارى جونىندە كەڭىنەن اڭگىمەلەدى. جاڭا تەحنولوگيا تۋرالى ۇعىنىقتى تۇردە ءارى قولجەتىمدى فورماتتا اقپارات بەردى. ولاردىڭ اۋىل تۇرعىندارىنا قانداي پايدا اكەلە الاتىنىن ءتۇسىندىردى. جاساندى ينتەللەكتىگە نەگىزدەلگەن جۇيەلەردىڭ كومەگىمەن ارداگەرلەر كۇندەلىكتى ومىردە قاجەتتى اقپاراتتى جىلدام تابۋ, مەديتسينالىق كەڭەس الۋ, الەۋمەتتىك قىزمەتتەرگە قول جەتكىزۋ سەكىلدى باعىتتار بويىنشا ناقتى مالىمەت الدى.
جيىنعا قاتىسقان ارداگەر, قالامگەر اڭعار سماعۇل قارتتاردى قادىرلەپ, جاڭا تەحنولوگيانى مەڭگەرۋگە جول اشقان ءىس-شارانى ۇيىمداستىرعان ازاماتتارعا العىسىن ءبىلدىردى.
– ءبىز قارت ادامدار جاڭا تەحنولوگيا مۇمكىندىكتەرىن ۇيرەنۋدىڭ جولىن بىلمەي قينالاتىن كەزدەرىمىز بولادى. بۇگىنگى كەزدەسۋدە جاستار سونىڭ ءتيىمدى ءارى توتە جولىن نۇسقادى. اقىلدى اقساقالدان عانا ەمەس, جاستاردان سۇرايتىن ۋاقىت كەلدى. پرەزيدەنتىمىزدىڭ بيىلعى جولداۋىندا نەگىزگى تاقىرىپ بولعان جاساندى ينتەللەكتىنىڭ قانشالىقتى ماڭىزدى ەكەنىن جاستارىمىز ءبىر عانا كەزدەسۋدىڭ اياسىندا ناقتى تاجىريبەدە ءتۇسىندىرىپ بەردى, – دەيدى ارداگەر جۋرناليست.
«اۋىل» پارتياسى قاراعاندى وبلىسى بويىنشا وڭىرلىك فيليالىنىڭ توراعاسى رۋسلان نيكانوۆيچ اقىلدى جۇيەنىڭ اۋىلدى تەك «تۇرمىستىق كەڭىستىك» ەمەس, تەحنولوگيالىق مۇمكىندىكتەر كەڭىستىگىنە اينالدىرادى دەيدى.
«جاساندى ينتەللەكت اۋىل ءومىرىن جەڭىلدەتىپ, ساپاسىن ارتتىرۋدا, اتاپ ايتقاندا اۋىل شارۋاشىلىعىندا – ەگىستىك القاپتاردىڭ جاعدايىن مونيتورينگتەۋ, مالدىڭ جاي-كۇيىن باقىلاۋ, اۋا رايىن بولجاۋ, ونىمدىلىك دەڭگەيىن ارتتىرۋدا, سونىمەن قاتار ءبىلىم بەرۋدە, دەنساۋلىق ساقتاۋ سالاسىندا, كاسىپكەرلىك پەن ساۋدادا ناقتى ۇلەس قوسا الادى. تەحنولوگيالىق دامۋ ادام ءومىرىنىڭ بارلىق سالاسىنا اسەر ەتەدى. ال اۋىلدى دامىتپاي, ەلىمىزدى جاڭعىرتۋ مۇمكىن ەمەس. سول سەبەپتى, «اۋىل» پارتياسى بۇل ماسەلەگە ەرەكشە دەن قويىپ وتىر. ماقسات – اۋىل تۇرعىندارىن جاڭا زاماننىڭ تىلىمەن سويلەتۋ, تسيفرلىق ساۋاتتىلىقتى ارتتىرۋ جانە تەحنولوگيانى كۇندەلىكتى ومىردە قولدانۋعا بەيىمدەۋ, اۋىلدى اقپاراتتىق قوعام كوشىنەن قالدىرماۋ», دەيدى پارتيانىڭ وڭىردەگى جەتەكشىسى.
وسى جيىن ينتەللەكتۋالدى قوندىرعىنىڭ كومەگىن تەك جاستار عانا ەمەس, ارداگەرلەر دە الا الاتىنىن دالەلدەدى.
قاراعاندى وبلىسى
