حالىقارالىق فەستيۆالگە تۇركيا, ازەربايجان, قىرعىزستان, وزبەكستان, تاجىكستان, قىتاي جانە رەسەي ەلدەرىنەن 100-گە جۋىق قولونەرشى كەلدى. ەلىمىزدىڭ ءار وڭىرىنەن 300-گە جۋىق قولونەر شەبەرى قاتىستى. World Craft Council حالىقارالىق ۇيىمىنىڭ قۇرمەتتى ەلشىسى ازيز مۋرتازاەۆ تۇركىستان «تۇركىستان– قولونەرشىلەر قالاسى» مارتەبەسى كۋالىگىن تابىستادى.
– بيىل مەملەكەت باسشىسى قاسىم-جومارت توقاەۆ «تۇركىستان قالاسىنىڭ ەرەكشە مارتەبەسى تۋرالى» ارنايى زاڭعا قول قويدى. قابىلدانعان زاڭدا قولونەر سالاسىنداعى شەبەرلەرگە مەملەكەتتىك قولداۋ شارالارى كۇشەيتىلىپ, جەرگىلىكتى قولونەرشىلەردىڭ كاسىبىن دامىتۋعا جول اشىلدى. ۇلتتىق ءداستۇردى قولداۋ ماقساتىندا قولونەر قالاشىعىنىڭ قۇرىلىسىن جۇرگىزدىك. بۇگىن «Turkistan World Craft Fest» حالىقارالىق فەستيۆالىنە ارنايى جينالعان الەم شەبەرلەرى ەرەكشە ورتالىقتىڭ جۇمىسىنا جاڭاشا سەرپىن بەرەدى دەپ سەنەمىز. ۇلى جىبەك جولىنىڭ بويىندا ورنالاسقان تاريحي شاھار ەجەلدەن قولونەر مەن ساۋدا ورتالىعى بولعان. قازىرگى تاڭدا وبلىسىمىزدا 130-دان استام شەبەر ەڭبەك ەتۋدە. كەشەندە ۇلتتىق قولونەردىڭ سان ءتۇرلى باعىتتارى توعىسىپ, وڭىرىمىزگە كەلەتىن تۋريستەر ءۇشىن جاڭا مادەني ورتالىققا اينالادى. قالاشىق تەك ساۋدا-ساتتىق ورنى عانا ەمەس. بۇل – شەبەرلەردىڭ تاجىريبە الماساتىن, جاڭا تۋىندىلارىن ۇسىناتىن, جاستاردى ونەرگە ۇيرەتەتىن ۇلكەن ورتالىق, – دەدى سالتاناتتى راسىمدە وبلىس اكىمى نۇرالحان كوشەروۆ.
بىرەگەي كەشەن – ۇلتتىق قولونەردى جاڭعىرتۋ, ءتۋريزمدى دامىتۋ جانە شەبەرلەرگە قولداۋ كورسەتۋ ماقساتىندا جۇزەگە اسقان ماڭىزدى جوبا. تۋريستىك جانە مادەني باعىتتاعى كەشەن 8 نەگىزگى فۋنكتسيونالدى بولىكتەن تۇرادى. 20 شەبەرحانا, كورمە زالدارى, 2 شوۋرۋم, مەيرامحانا, قوناقۇي جانە تۋريستىك ينفراقۇرىلىمى بار قالاشىق 2,5 گەكتار اۋماقتى الىپ جاتىر. مۇندا شەبەرلەر ۇلتتىق ناقىشتاعى بۇيىمدارىن جاساپ, كوپشىلىككە ۇسىنىپ قانا قويماي, تەجىريبە الماسادى. ەرەكشە كەشەن جەكە ينۆەستيتسيا ەسەبىنەن سالىنعان.
سالتاناتتى شارا اياسىندا 100 كەراميكا شەبەرى ءبىر مەزگىلدە قۇمىرا جاسادى. قولونەر بۇيىمدارىنىڭ كورمەلەرى, شەبەرلىك ساعاتتارى, ۇلتتىق كيىمدەر مەن بۇيىمدار جارمەڭكەسى, مادەني-تانىمدىق جانە كونتسەرتتىك باعدارلامالار كوپشىلىك نازارىنا ۇسىنىلدى. «Fashion» ەتنو ءسان ۇلگىسىنىڭ كورسەتىلىمى ءوتتى. تانىمال انشىلەر اۋەزدى اندەردى شىرقادى.
فەستيۆال دوستىق ۇيىندە «تۇركىستان قولونەر مۇراسى جانە ءتۋريزىمنىڭ بولاشاعى» اتتى حالىقارالىق قولونەرشىلەر فورۋمىنا ۇلاستى. قازاقستاندىق جانە شەتەلدىك ۇيىم باسشىلارى باس قوسقان فورۋمعا ازيا-تىنىق مۇحيتى ايماعى بويىنشا دۇنيەجۇزىلىك قولونەر كەڭەسىنىڭ ۆيتسە-پرەزيدەنتى ايدارحان كاليەۆ مودەراتور بولدى. وتاندىق قولونەرشىلەرگە شەتەلدىك شەبەرلەرمەن تاجىربيە الماسۋعا, ونىمدەرىن حالىقارالىق دەڭگەيدە ناسيحاتتاۋعا جانە جاڭا سەرىكتەستىك بايلانىستار ورناتۋعا مۇمكىندىك جاساۋدى ماقسات ەتكەن فورۋمعا 70-تەن استام شەتەلدىك قوناق, ءتۇرلى ۇيىم وكىلدەرى, قولونەرشىلەر قاتىستى.
فورۋمدا ءسوز العان قاتىسۋشىلار ۇلتتىق ونەردى ۇلىقتاۋعا شاقىردى. تۇركىستاندى حالىقارالىق دەڭگەيدە ءىرى تۋريزم ورتالىعىنا اينالدىرۋ, قولونەردى جامىتۋ باعىتىنداعى يدەيالارىن ورتاعا سالدى.
تۇركىستان
