كەڭەستە جاڭا اۆتوبۋس پاركتەرىن سالۋ, جىلجىمالى قۇرامدى قاجەتتى سەرۆيستىك ينفراقۇرىلىممەن قامتاماسىز ەتۋ جانە قوسىمشا اۆتوموبيلدىك گاز تولتىرۋ كومپرەسسورلىق ستانتسيالارىن سالۋ ماسەلەلەرى قارالدى.
اۆتوموبيلدىك گتكس-مەن بىرگە ارقايسىسى 300 اۆتوبۋس سىيىمدىلىعى بار ەكى اۆتوبۋس پاركىن سالۋ ءۇشىن جەر تەلىمدەرى مەن جەكە ينۆەستورلار انىقتالدى. ولاردىڭ ءبىرى قۇلجا تراكتىسىنىڭ اۋماعىندا, ەكىنشىسى - موڭكە بي كوشەسىنىڭ سولتۇستىگىندە ورنالاسادى.
قالا باسشىسى بەيىندى باسقارمالارعا جەر تەلىمدەرىن راسىمدەۋ جانە ينجەنەرلىك جەلىلەر بويىنشا تەحنيكالىق شارتتار بەرۋ ۇدەرىستەرىن جەدەلدەتۋدى تاپسىردى.
ەكى نىساننىڭ قۇرىلىسى كەلەسى جىلدىڭ ناۋرىز ايىندا اياقتالادى دەپ جوسپارلانىپ وتىر.
دارحان ساتىبالدى قازىرگى ۋاقىتتا الماتىدا اۆتوبۋستارعا جانارماي قۇيۋ جانە قىزمەت كورسەتۋ ينفراقۇرىلىمى جىلجىمالى قۇرامنىڭ سانىنا سايكەس كەلمەيتىنىن, سوندىقتان اۆتوبۋس پاركتەرى مەن ستانتسيالارىن سالۋ ماسەلەسى باقىلاۋدا بولاتىنىن ايتتى.
