سۋرەتتى تۇسىرگەن – جانگەلدى ابدىعالىم
«شۇباركول كومىرىنىڭ» ورتاشا قۇنى (تونناسىنا) – 19 100 تەڭگە, «كۋزنەتسك» كومىرى – 16 500 تەڭگە, ال «مايكۇبىنىكى» – 16 000 تەڭگە شاماسىندا. «شۇباركول كومىرى» قاراعاندىنىڭ ءوز باسىندا 15 500-15 800 تەڭگە ارالىعىندا ساۋداعا ءتۇسىپ جاتىر. دەگەنمەن باعا تۇراقسىزدىعى دا بايقالادى. قالا ماڭىنداعى ەلدى مەكەندەرگە كومىر ارزان باعاعا جەتكىزىلسە, قاشىق اۋىلدارعا ءسال قىمباتقا تاسىمالدانادى. بىلايشا ايتقاندا, كومىردىڭ باعاسىنا وتىننىڭ ساپاسىنان گورى جولدىڭ الىستىعى اسەر ەتىپ وتىر. باعانىڭ قۇبىلۋىنا تاسىمالداۋ نۇكتەلەرىنىڭ قاشىقتىعى دا اسەر ەتەدى. مىسالى, نۇرا, اقتوعاي اۋداندارىنا ۆاگون-ۆاگون كومىر تاسيتىن تەمىرجول تۇيىعى جوق.
ءوڭىر تۇرعىندارىنا ساپالى كومىر جەتكىزىپ وتىرعان نەگىزگى قويمانىڭ ءبىرى – پريشاحتينسكىدەگى «پسۆ86» جشس ايلاعى. مۇندا جىل بويى «شۇباركول كومىرى» ساۋدالانادى. بۇل وتىننىڭ باسقا وتىنداردان ايىرماشىلىعى – قىزۋى قاتتى ءارى ك ۇلى از. قويمادا قازىردىڭ وزىندە شامامەن 5 مىڭ توننا كومىر بار. بۇعان قوسا, تاۋلىگىنە تاعى 500 تونناعا جۋىق جەتكىزىلەدى.
– ءبىزدىڭ قويما جىل ون ەكى اي جۇمىس ىستەيدى. جاز مەزگىلىندە دە كومىرگە سۇرانىس جوعارى. مونشا جاعىپ, تابىس تاباتىنداردىڭ بارلىعى ءبىزدىڭ كومىردى تۇتىنادى. قىزۋ جۇمىس ەندى باستالدى. قىسقا قامدانعان حالىقتىڭ قاراسى قالىڭ. قور جەتكىلىكتى. كۇنىنە كومىر تيەلگەن 100-150 جۇك كولىگىن جونەلتەمىز, – دەيدى قويما باسشىسى نيكيتا انوسوۆ.
مۇندا اتالعان كومىر 15 800 تەڭگەدەن ساۋدالانادى. بىلتىرعى باعادان ءسال جوعارى. قويما باسشىلىعى سەبەبىن تەمىرجول تاسىمالى تاريفتەرىنىڭ وسۋىنەن دەپ تۇسىندىرەدى. ايتسە دە, بەلگىلەنگەن شەكتى سومادان اسقان جوق. ءوڭىر اتىرابىنداعى كومىر ءوندىرۋدىڭ وزىندىك ەرەكشەلىگى بار كاسىپورىنداردىڭ ءبىرى – «راپيد» جشس. مۇندا قارا التىن اشىق ادىسپەن ەمەس, جەراستى تاسىلىمەن الىنادى. سول سەبەپتى, مۇنداعى كومىردىڭ باعاسى دا باسقالارعا قاراعاندا ەداۋىر جوعارى.
– ءبىزدىڭ كومپانيا ۇكىمەتپەن 2001 جىلدان بەرى كەلىسىمشارت نەگىزىندە جۇمىس ىستەپ كەلەدى. بۇرىن جابىلعان شاحتالاردىڭ ورنىندا قايتا قۇرىلىپ, قازىر جاڭا تەحنولوگيالاردى پايدالانىپ, جەراستى ادىسىمەن كومىر وندىرەمىز. كوبىنە ءبىزدىڭ ءونىمدى «اقتاۋ» تسەمەنت زاۋىتى تۇتىنادى. ساپا باعاعا ساي, – دەيدى كاسىپورىن باسشىسى اندرەي بەلوۆ.
قىسقاسى, قىسقى وتىننىڭ قورى جەتكىلىكتى مولشەردە. تەك, الىپساتارلار باعانى شارىقتاتپاسا يگى. دەلدال قالتانى قاعىپ, اۋىلدى قالتىراتپاسا, قويمالارداعى قارا التىن الداعى قىسقا جەتىپ-ارتىلعالى تۇر.
قاراعاندى وبلىسى
