«وتىرىستىڭ كۇن تارتىبىنە قويىلىپ وتىرعان ماسەلە – قوستاناي وبلىسىنداعى وڭىرلىك عىلىمدى دامىتۋدى شيكىزات وڭدەۋ مەن ايماق ەكونوميكاسىنىڭ تۇراقتى دامۋىن قامتاماسىز ەتۋ ماسەلەلەرىمەن ۇيلەستىرە وتىرىپ قاراۋ. بۇل تۇيتكىلدەر كۇن تارتىبىنە كەزدەيسوق قويىلعان جوق. سەبەبى ولار قازىر ەڭ وزەكتى ماسەلەلەردىڭ بىرىنە اينالىپ وتىر. وڭىردە وڭدەۋ سالاسىندا قوسىمشا قۇن قالىپتاستىرۋدىڭ پايدالانىلماعان زور الەۋەتى بار. بۇل ءوندىرىس تيىمدىلىگىن ودان ءارى ارتتىرۋعا جانە جۇيەلى نەگىزدە يمپورتتى الماستىرۋ ماسەلەسىن شەشۋگە مۇمكىندىك بەرەدى. مەملەكەت باسشىسى وسى ماسەلەگە ەرەكشە نازار اۋدارىپ, ءۇش جىل ىشىندە اگروونەركاسىپ كەشەنىندەگى (اوك) وڭدەلگەن ءونىم ۇلەسىن 70%-عا دەيىن ارتتىرۋ مىندەتىن قويدى. قوستاناي وبلىسى – اۋىل شارۋاشىلىعى جەر كولەمى 10 ملن گەكتاردان اساتىن, ەلىمىزدەگى ەڭ ءىرى اگرارلىق وڭىرلەردىڭ ءبىرى جانە ەلەۋلى يندۋستريالىق الەۋەتكە يە. ءوڭىردىڭ ورنىقتى دامۋى عىلىمي تۇرعىدان نەگىزدەلگەن شەشىمدەردى, كليماتتىق تاۋەكەلدەرگە بەيىمدەلۋدى, رەسۋرستاردى ۇتىمدى پايدالانۋدى, ەميسسيانى ازايتۋدى جانە ەكولوگيالىق تەحنولوگيالاردى ەنگىزۋدى قاجەت ەتەدى», دەدى پرەزيدەنت جانىنداعى ۇعا پرەزيدەنتى اقىلبەك كۇرىشباەۆ.
اكادەميا ءوڭىردى دامىتۋعا باعىتتالعان بىرقاتار شەشىمدى ۇسىندى. ماسەلەن, وڭىردە عىلىمي-يننوۆاتسيالىق قور قۇرىلىپ, وبلىستىڭ ناقتى قاجەتىنە نەگىزدەلگەن عىلىمي زەرتتەۋلەردى ماقساتتى قارجىلاندىرۋ تەتىگى ەنگىزىلەدى. وسى ورايدا باسىم عىلىمي باعىتتاردى وبلىس اكىمدىگى اكادەميامەن بىرلەسە بەلگىلەيدى. وسىلايشا, وندىرىستىك تسيكلدىڭ بارلىق كەزەڭى – جاڭا سورتتار مەن تۇقىمداردى شىعارۋدان باستاپ, تەرەڭ وڭدەۋدىڭ كەشەندى تەحنولوگيالارى مەن ءتيىمدى باسقارۋ شەشىمدەرىن ەنگىزۋگە دەيىن عىلىمي-تەحنولوگيالىق تۇرعىدان سۇيەمەلدەنەدى.
وبلىس اكىمى قۇمار اقساقالوۆتىڭ ايتۋىنشا, اوك سالاسىندا كەلەسى جىلدان باستاپ 12 جاڭا ءسۇت-تاۋار فەرماسى پايدالانۋعا بەرىلەدى. ءوڭىر باسشىلىعى ءونىمدى قايتا وڭدەۋگە, ىشكى نارىققا شىعارۋعا, جاڭا جۇمىس ورىندارىن قۇرۋعا ەكپىن قويماق.
كوشپەلى وتىرىس اياسىندا عىلىمي-يننوۆاتسيالىق كورمە ۇيىمداستىرىلىپ, شەتەلدەن, ورتالىقتان كەلگەن جانە جەرگىلىكتى عالىمداردىڭ, بيزنەس پەن مەملەكەتتىك قىزمەت وكىلدەرىنىڭ قاتىسۋىمەن فورسايت-سەسسيا ءوتتى. قاتىسۋشىلار عىلىمي قاۋىمداستىق پەن ونەركاسىپ اراسىنداعى ءوزارا ءىس-قيمىلدىڭ مۇمكىندىكتەرىن تالقىلادى.
قوستاناي وبلىسى
