ءدال وسى اۋدانعا 1978 جىلى قازاقستاننىڭ مەملەكەت جانە قوعام قايراتكەرى, سول كەزدەگى ءبىرىنشى حاتشى دىنمۇحامەد قوناەۆ كەلىپتى. جەرگىلىكتى باسشىلار يندەربور – قاراباۋ جولىنىڭ بويىنداعى «وڭداسىن جالىندا» اۋدانداعى قازبا بايلىقتىڭ سان تۇرىنەن ارنايى كورمە ۇيىمداستىرىپ, يگەرۋ ماسەلەسىن كوتەرىپتى. سودان كەيىن تۇرعىندار بۇل ءدوڭدى «ديماش توبە» دەپ اتايتىن بولدى.
اۋداندىق قۇرىلىس ءبولىمىنىڭ باسشىسى دارىن ءىلياسوۆتىڭ ايتۋىنشا, اڭىز تۇلعا ايالداعان توبەدە اشىق اسپان استىنداعى مۇراجاي سالىنىپ جاتىر. نىساننىڭ قۇرىلىسى 2023 جىلى قاراشادا باستالدى. ونى جىل سوڭىنا دەيىن اياقتاۋ جوسپارلانىپتى.
«بۇل – يندەربور كەنتىنەن 8 شاقىرىم قاشىقتا ورنالاسقان تاريحي ورىن. وبلىس اكىمىنىڭ ۇسىنىسىمەن اتالعان تاريحي ورىندى قايتا جاڭعىرتىپ, اشىق اسپان استىنداعى مۇراجايعا اينالدىرۋدى كوزدەدىك. سول سەبەپتەن, بۇل ورىندى وڭىرلىك تۋريستىك كارتاعا ەنگىزۋ ماقساتىندا جاڭا جوبا دايىندالدى. جوباعا سايكەس اشىق مۇراجايعا كىرەر تۇستاعى ماڭدايشاعا «ديماش توبە» اتاۋى جازىلادى», دەيدى دارىن ءىلياسوۆ.
ونىڭ دەرەگىنە قاراعاندا, مۇراجاي ماڭدايشاسى دوعا پىشىندەس بولادى. ماڭدايشانىڭ سول جاق باعانىنا سول كەزدە تۇسىرىلگەن تاريحي فوتونىڭ كوشىرمەسى قويىلىپ, وڭ جاعىنا نىسان جونىندە اقپارات بەرىلەدى. ال مۇراجايدىڭ اۋماعىنا دەندەر كۇمبەزىندەگى قازبا بايلىقتىڭ تۇرلەرى, ونىڭ ىشىندە مينەرال تاستار مەن رۋدالار سالىنعان بىرنەشە جاشىك ورناتۋ كوزدەلگەن. جاشىكتەر تاستان جاسالادى. سونداي-اق ەكى ۇلكەن كۇمبەزدى كومپوزيتسيا ورناتىلادى.
«بۇل كەشەن يندەر اۋدانىنداعى تابيعي بايلىقتىڭ ەرەكشەلىگىن تانىتاتىن ءارى تۋريستەردى كوپتەپ تارتۋعا ىقپال ەتەتىن نىسان بولادى. سول سەبەپتەن, «ديماش توبەنى» ءوڭىردىڭ تاريحي-تانىمدىق جانە تۋريستىك الەۋەتىن ارتتىراتىن تانىمال ورىنعا اينالدىرۋدى جوسپارلاپ وتىرمىز. ويتكەنى بۇل كەشەن ءبىر اۋداننىڭ عانا ەمەس, وڭىردەگى ارحەولوگيالىق جادىگەرلەردى, مينەرال تاستار مەن تاريحي-مادەني مۇرالاردى جيناقتايتىن بىرەگەي ورتالىققا اينالادى», دەيدى د.ءىلياسوۆ.
جاڭا كەشەننىڭ اۋماعى – 1750 شارشى مەتر. نىساننىڭ قۇرىلىسىن «سك ليرا» جشس جۇرگىزىپ جاتىر.
اتىراۋ وبلىسى
