مۋزەيدىڭ باس قور ساقتاۋشىسى ءلاززات ەرتاسوۆانىڭ ايتۋىنشا, باعا جەتپەس جادىگەرلەردىڭ ءبىرازىن كەزىندە گۇلنار مىرجاقىپقىزى اكەپ تاپسىرىپ, اماناتتاپ كەتكەن. قۇندى جادىگەرلەردىڭ ىشىندە مىرجاقىپتىڭ ۇلت ۇستازى احمەت بايتۇرسىن ۇلىنىڭ 50 جىلدىق مەرەيتويىنا ارناپ جازعان ورىس تىلىندەگى بايانداماسىنىڭ قولجازباسى, الاش ارىسىنىڭ اياۋلى جارى عاينيجامال دوسىمبەكوۆانىڭ توركىنىنەن كەلگەن ىدىس-اياعى بار.
«سونىمەن قاتار مىرجاقىپ دۋلات ۇلىنىڭ ورىنبورداعى ۇيىندە تۇرعان كونە اس ۇستەلى دە بۇگىندە مۋزەي تورىندە تۇر. گۇلنار اپاي 1922–1928 جىلدار ارالىعىندا وسى ۇستەلدىڭ باسىندا وتىرعان, وسى داستارقاننان ءدام تاتقان 200-دەن اسا قازاق زيالىسىنىڭ ءتىزىمىن بەرگەن. ول ءتىزىم, مىنە, قابىرعادا ءىلۋلى تۇر. بۇل تىزىمنەن الاشتىڭ نەبىر جاقسى-جايساڭدارى وسى ۇستەلدىڭ باسىندا وتىرىپ ەل تاعدىرى جايىندا سىر شەرتكەنىن اڭعارامىز. ودان قالدى, مىرجاقىپ دۋلات ۇلىنىڭ ءوزى ۇستاعان جول سومكەسى, كىتاپ تۋمباسى, بالالارىنىڭ شاشىن الاتىن ارنايى ماشىڭكەسى, عاينيجامالدىڭ قوبديشالارى, اتلاس كورپەسى, زۇلقاينار ەسىمدى اعايىن ىنىسىنە ارناپ جاسالعان الاشتىڭ قۇپيا بەلگىسى, سولوۆەتسك لاگەرىندە مىرجاقىپتىڭ قىزىنا جاساپ بەرگەن فوتوراماسى, ءوزى تىككەن, اياقتالماي قالعان تاقياسى, مىرجاقىپتىڭ ۇلى الىبەكتىڭ قايىستان جاسالعان, كۇمىستەپ اشەكەيلەنگەن كىسە بەلبەۋى ساقتاۋلى تۇر», دەيدى قور ساقتاۋشى.
مۋزەي قورىنداعى قۇندى جادىگەرلەر قاتارىندا مىرجاقىپ ءومىرىنىڭ ءار كەزەڭىنەن سىر شەرتەتىن فوتوقۇجاتتار دا بارشىلىق. ولاردىڭ ىشىندە مىرجاقىپتىڭ وتباسىمەن بىرگە تۇسكەن سۋرەتتەر, سولوۆەتسك لاگەرىندە تۇسكەن فوتوسۋرەت, الاش ارىستارىنىڭ ورتاسىندا تۇرعان فوتوقۇجاتتار كوزگە ىستىق كورىنەدى.
قوستاناي وبلىسى
