باپكەردىڭ ايتۋىنشا, جانكۇيەرلەر عانا ەمەس, وزدەرىن بۇكىل ەل قولدايتىنىن كوماندا بىلەدى. بۇل فۋتبولشىلارعا كۇش-قۋات بەرىپ, جەڭىسكە جەتەلەمەك.
ء«بىز جانكۇيەرلەردىڭ ءۇمىتىن اقتاۋعا تىرىسامىز. ءبىز لايىقتى ونەر كورسەتۋىمىز كەرەك. قازىر كەسىپ-ءپىشىپ ەشتەڭە ايتقىم كەلمەيدى, جاقسى ويىن كورسەتۋىمىز كەرەك نە بولسا دا. مۇندايدا «قايراتتىڭ» جانكۇيەرلەرى عانا ەمەس, بۇكىل قازاقستان بىرىگەدى دەپ ويلايمىن. ءبىز بۇل قولداۋدى چەمپيوندار ليگاسىنداعى ماتچتاردا-اق سەزدىك», دەپ وي ءبولىستى رافاەل ۋرازباحتين.
مباپپە, ۆينيسيۋس نەمەسە بەللينگەم سياقتى اتاعى جەر جارعان مىقتىلاردىڭ مىسى باسپاي ما دەگەن سۇراققا باپكەر بىلاي دەپ جاۋاپ بەردى:
«ول جاقتا دا وسىنداي ادامدار وينايدى. ولار 7–8 كۇندە ءۇش ماتچ ويناپ, ۇزاق ساپارعا شىعادى, بىلەمىز ولاردىڭ اۋىر كەستەسىن. مۇنىڭ شەت جاعاسىن ءوزىمىز دە سەزىندىك. ارينە, مۇنداي ويىنشىلاردىڭ كەلۋى — ءبىزدىڭ جىگىتتەردى ىنتالاندىراتىنى ءسوزسىز. ولارمەن سالىستىرىپ, ءوزىمىزدى دە شىڭداي تۇسەمىز, ساباق الامىز سوسىن وسى ويىننان», دەيدى باپكەر.
رافاەل ۋرازباحتين «رەالمەن» ماتچقا ارنالعان ناقتى قۇرام ءالى انىقتالماعانىن, ول ويىنشىلاردىڭ دايىندىعى مەن پسيحولوگيالىق جاعدايىنا بايلانىستى جاقىن كۇندەرى انىق بولىپ قالاتىنىن ايتتى.
ء«بىز قۇرامنىڭ قانداي بولارىن بولجاپ ايتا المايمىز, سەبەبى نەشە ءتۇرلى نارسە بولۋى مۇمكىن: جاراقات الادى بىرەۋ, اۋىرىپ قالادى دەگەندەي. ءبىز ويىنشىلاردىڭ كوڭىل-كۇيىنە قاراي جۇمىس ىستەيمىز», دەيدى باپكەر.
كوماندانىڭ نەگىزگى قاقپاشىسى تەمىرلان اناربەكوۆتىڭ جاراقاتى دا ءسوز بولدى. باپكەردىڭ ايتۋىنشا, ونىڭ جاعدايى جاقسارىپ كەلە جاتىر.
«تەمىرلان اۋرۋحانادان شىعىپ, بازاعا كەلىپ ءجۇر. قازىر گيپسپەن ءجۇر, گيپستى شەشكەن سوڭ, كوپ ۇزاماي جاتتىعۋعا شىعا باستايدى», دەدى ۋرازباحتين.
قازىرگى تاڭدا نەگىزگى قاقپاشى — شەرحان قالمۇرزا. سونىمەن قاتار, قۇرامدا الداعى كۇندەرى جاتتىعۋعا كىرىسەتىن الەكساندر زارۋتسكي دە بار. باپكەر ماتچ بويى تەك قورعانىسپەن شەكتەلىپ قالمايتىندارىن اتاپ ءوتتى.
«مۇنداي قارسىلاسپەن كەزدەسكەندە بىردەن شابۋىلعا شىعىپ نەمەسە قورعانىپ قانا وتىرا بەرۋگە دە بولمايدى. بالانس بولۋى ءتيىس. ارينە, ولاردا شەبەرلىگى جوعارى ويىنشىلار بار. بىراق ءبىز قورعانىپ قانا وتىرۋدى جوسپارلاپ وتىرعان جوقپىز. شابۋىل مەن قورعانىستىڭ اراسىنداعى تەپە-تەڭدىكتى ساقتاۋعا تىرىسامىز. ونى سپورتينگپەن» وتكەن ماتچتىڭ ەكىنشى تايمىنداعى 15 مينۋتتا كورسەتتىك دەپ ويلايمىن», دەپ ءتۇسىندىردى باپكەر.
پورتۋگاليالىق «سپورتينگپەن» وتكەن ويىننان كەيىن باپكەرلىك شتاب ءبىراز وي ءتۇيىپ, شارشاۋ مەن كليماتقا بەيىمدەلۋ كومانداعا ەداۋىر اسەر ەتەتىنىن بايقاپتى. ءدال وسىنداي جاعدايعا «رەال» دا تاپ بولۋى مۇمكىن.
«90 مينۋت بويى ەسىل-دەرتىڭ الاڭدا بولۋى ءۇشىن سەرگەك بولۋ كەرەك. قازىر ءبىز ءوز الاڭىمىزدا وينايمىز, «جەتىسۋمەن» كەزدەسۋدى كەيىنگە شەگەردىك. قالىپقا كەلىپ, دايىندالىپ الۋىمىزعا سەگىز كۇندەي ۋاقىت بار», دەيدى ۋرازباحتين.
رافاەل ۋرازباحتين ليگا چەمپيوندارىنداعى ويىنداردا شەبەرلىك قانا ەمەس, كوماندالىق رۋح, ىنتا مەن جانكەشتىلىك تە كەرەك ەكەنىنە توقتالدى:
ء«يا, بىزدە 50 ميلليون ەۋرو تۇراتىن فۋتبولشىلار جوق. بىراق بىزدە ءتارتىپ, رۋح پەن جەڭىسكە دەگەن جىگەر بار. ءبىز وسىلاي ويناماقپىز. بۇل ماتچتىڭ ءوزى — ەرەكشە. «رەال مادريد» — چەمپيوندار ليگاسىندا ەڭ كوپ تيتۋل جەڭىپ العان كلۋب. سوندىقتان ءبىز بۇعان ەرەكشە دايىندالدىق. بۇل مۇلدەم باسقا دەڭگەي, باسقا اتموسفەرا. بارلىعى بار كۇشىن سالىپ وينايدى ەندى», دەدى ول.
كوماندانىڭ كاپيتانى ادىلەت سادىبەكوۆ «رەالمەن» كەزدەسۋ — بۇل سىناق قانا ەمەس, سونىمەن قاتار ءوسىپ-ونۋگە دە ۇلكەن مۇمكىندىك ەكەنىن ايتادى.
«قوبالجيسىڭ, ويتكەنى مۇنداي كەزدەسۋ ءجيى بولا بەرمەيدى عوي. بىراق ويىننىڭ بىزدە ءوتىپ جاتقانى جاقسى بولدى. بۇل سپورتتىڭ دامۋىنا ىقپال ەتۋى ءتيىس. قازىر دايىنالىپ جاتىرمىز. ءبىز ەل نامىسىن قورعاپ, جانكۇيەرلەردىڭ ءۇمىتىن اقتاۋعا تىرىسامىز وسى جولى», دەپ اعىنان جارىلدى كوماندا كاپيتانى.
