الدىن الا ەسەپ بويىنشا جەڭىلدەتىلگەن دەكلاراتسيا نەگىزىندەگى سالىق جۇيەسىن سالىق تولەۋشىلەردىڭ 70%-ى قولدانادى. سەرىك جۇمانعارين ايتقانداي, وڭايلاتىلعان رەجىممەن جەكە تۇلعالارعا بولشەك ساۋدا قىزمەتىن كورسەتەتىن كاسىپكەرلەر عانا جۇمىس ىستەي الادى. زاڭدى تۇلعالارمەن جۇمىس ىستەيتىن كومپانيالار تولىققاندى بۋحگالتەرلىك ەسەپ پەن شەگەرىم قولدانىلۋى قاجەت جالپى سالىق سالۋ رەجىمىمەن جۇمىس ىستەيدى.
«تىيىم سالۋ دەپ اتالاتىن تىزىمگە بيزنەسكە ارنالعان تاۋار ءوندىرىپ, قىزمەت كورسەتەتىن سالا كىرەدى. بۇل سالاداعى جيىنتىق اينالىمنىڭ 76%-دان استامى – جالپىعا بىردەي رەجىمدى قولداناتىن سالىق تولەۋشىلەر», دەدى ۇلتتىق ەكونوميكا ءمينيسترى.
جەڭىلدەتىلگەن سالىق رەجىمى بارلىق كاسىپ تۇرىنە بەرىلمەيدى. بۇل تىزىمگە وڭدەۋ ونەركاسىبى, قۇرىلىس, جەر قويناۋىن پايدالانۋ, تابيعي مونوپوليالار, اۋماعى 2 مىڭ شارشى مەتردەن اساتىن كوتەرمە جانە ءىرى بولشەك ساۋدا كاسىپورىندارى كىرەدى. سونداي-اق شەكتەۋ تەلەكوممۋنيكاتسيا, ينتەرنەت پەن IT, قارجى جانە ساقتاندىرۋ, كونسالتينگ, كاسىبي جانە اگەنتتىك قىزمەتتەر, عىلىمي زەرتتەۋلەر مەن ازىرلەمەلەر سالاسىنا دا قولدانىلادى.
جەڭىلدەتىلگەن سالىق رەجىمى ساقتالاتىن ەكىنشى توپتا بيزنەستىڭ 300-دەن استام ءتۇرى – 2 مىڭ شارشى مەترگە دەيىنگى ساۋدا الاڭدارىنداعى بولشەك ساۋدا, ءدارىحانالار, قوعامدىق تاماقتانۋ نىساندارى, قوناقۇيلەر, تۇرعىن ءۇي مەن كولىكتى جالعا الۋ, جەڭىل جانە تاماق ونەركاسىبى كاسىپورىندارى, جولاۋشىلار تاسىمالى, بالاباقشالار مەن ۇيىرمەلەر, مەديتسينالىق جانە الەۋمەتتىك قىزمەتتەر بار.
«تىزىمدەردىڭ جوباسى ءالى دە ازىرلەنىپ جاتىر. الدىن الا ءتىزىمدى «اشىق نقا» پورتالىندا ورنالاستىرۋدى جوسپارلاپ وتىرمىز. ول جاريالانعاننان كەيىن بيزنەسپەن جانە ساراپشىلارمەن تالقىلاۋ جالعاسادى», دەدى ۆيتسە-پرەمەر.
قارجى ءمينيسترى ءمادي تاكيەۆتىڭ ايتۋىنشا, جاڭا سالىق كودەكسىندەگى ماڭىزدى وزگەرىس – بانكتىك شوتتاردى اۆتوماتتى تۇردە بۇعاتتاۋدان باس تارتۋ.
«قاراستىرىلعان وزگەرىستەر كاسىپكەرلەردىڭ جۇمىسىن ەداۋىر جەڭىلدەتەدى. سالىق ەسەپتىلىگىن ازايتۋ مەن سالىقتى ازايتۋ بيزنەسكە قاعازباستىلىققا ەمەس, دامۋعا نازار اۋدارۋعا مۇمكىندىك بەرەدى. شوتتاردى اۆتوماتتى تۇردە بۇعاتتاۋدان باس تارتۋ – ءادىل جانە اشىق قارىم-قاتىناسقا قاراي جاسالعان ماڭىزدى قادام», دەپ اتاپ ءوتتى ءمادي تاكيەۆ.
جاڭا سالىق كودەكسىندە بىرقاتار وزگەرىس قاراستىرىلعان. ولاردىڭ ىشىندە سارالانعان سالىق مولشەرلەمەسىن ەنگىزۋ, پروگرەسسيۆتى جەكە تابىس سالىعى, ءسان-سالتانات سالىعى جانە ارنايى سالىق رەجىمىندەگى جاڭالىقتار بار.
ازاماتتارعا قاتىستى وزگەرىستەردىڭ ىشىندە ماڭىزدىسى – زەينەتاقى تولەمدەرىنىڭ جەكە تابىس سالىعىنان بوساتىلۋى. سونداي-اق 10 جىلدان اسقان اۆتوكولىكتەر ءۇشىن كولىك سالىعى تومەندەيدى. مۇگەدەكتىگى بار ادامدارعا ارنالعان سالىقتىق شەگەرىمدەر كەڭەيتىلەدى. الەۋمەتتىك ماڭىزى بار مەديتسينالىق قىزمەت تۇرلەرىنە قوسىلعان قۇن سالىعى بويىنشا جەڭىلدىك ەنگىزىلەدى. بيزنەس ءۇشىن دە وزگەرىستەر بار. ارنايى سالىق رەجىمدەرى وڭتايلاندىرىلىپ, ەندى تەك ءۇش ءتۇرى عانا قالادى. ولار – ءوزىن-ءوزى جۇمىسپەن قامتىعاندارعا ارنالعان رەجىم, جەڭىلدەتىلگەن دەكلاراتسيا نەگىزىندەگى شاعىن بيزنەسكە ارنالعان رەجىم جانە فەرمەرلەر ءۇشىن ارنالعان رەجىم.
