سونداي-اق بۇل كۇنى اسا كورنەكتى كومپوزيتور نۇرعيسا تىلەنديەۆتىڭ 100 جىلدىعى مەن قازاقتىڭ ءبىرتۋار اقىنى تۇمانباي مولداعاليەۆتىڭ 90 جىلدىعى قاتار اتالىپ ءوتتى. مەرەكەلىك كەشتە ولاردىڭ رەپەرتۋارىنان «قايرات», «اققۋ كۇيلەرى, «قۇستار قايتقاندا», «كۋا بول», «الاتاۋ» اندەرى شىرقالدى. بۇدان باسقا دا بي كومپوزيتسيالارى ورىندالىپ, تىڭدارمان جۇرەگىن تەربەدى.
«قوناەۆ قالاسى وبلىس ورتالىعى بولعالى ءتۇرلى ءىس-شارالاردى ۇيىمداستىرۋدامىز. سونىڭ ىشىندە بۇگىنگىسى ەرەكشە اسەر قالدىرىپ وتىر. «قوناەۆ اۋەندەرى» ءانسامبلىنىڭ قۇرامىندا انشىلەر, بيشىلەر, كۇيشىلەر, ءتۇرلى اسپاپتا وينايتىن ونەرپازدار بار. بۇل ۇجىم الداعى ۋاقىتتا بارلىق مەرەكەلىك شاراعا قاتىسىپ, ەل مادەنيەتىن دامىتۋعا اتسالىسادى», دەدى قالا اكىمىنىڭ ورىنباسارى تولەگەن
كەنجەبەكوۆ.
مادەنيەتى مەن ادەبيەتى جاندانىپ, رۋحانيات ورتالىعىنا اينالعان شاھاردىڭ ونەرىن ورىستەتەر ءوز ءانسامبلى بولعانىنا جەرگىلىكتى تۇرعىندار دا قۋانىپ وتىر.
«بيىل قازاق دالاسىندا حالقىمىزدىڭ ماڭدايىنا بىتكەن حاكىم اباي قۇنانباي ۇلى باستاعان ۇلى تۇلعالاردىڭ, ادەبيەت پەن مادەنيەتتىڭ مارقاسقالارىنىڭ مەرەيتويلارى كەڭ كولەمدە اتاپ وتىلۋدە. وسىنداي يگى شارالارعا ءار بەرىپ, شىعارماشىلىق كەشتەردى شارىقتاتار «قوناەۆ اۋەندەرى» ءانسامبلىنىڭ قۇرىلعانىنا بالاشا قۋانىپ وتىرمىز. ەندى ءوز ونەر ۇجىمىمىز بار. قالامىزدىڭ 55 جىلدىعى قۇتتى بولسىن!», دەيدى قالا تۇرعىنى ايبەك ەرەجەپ.
الماتى وبلىسى
