فوتو: admaer.ru
قاربالاس شاقتا ەلوردادا ەڭسەرىلىپ جاتقان ەڭبەك تۋرالى ايتۋعا «استانا سۋ ارناسى» مەكەمەسىنىڭ جەتەكشى جىلۋ ينجەنەرى ماۋلەت ابدراحمانوۆ از-كەم ۋاقىتىن ارنادى. سانالى عۇمىرىنىڭ 38 جىلىن جىلۋ جەلىلەرىنىڭ قاۋىپسىز ءارى قالتقىسىز قىزمەت ەتۋىنە ارناعان مامان تارماقتالعان قۇبىرلاردى ءبىرتۇتاس ادام اعزاسىنا بالايدى. سالانى تامىرشىداي تاپ بىلەتىن جەتەكشى جىلۋ ينجەنەرىنىڭ پايىمداۋىنشا, ءتاننىڭ ءبىر تۇسى سىزداسا, تۇتاس جان قالىپتى تىنىسىنان ايىرىلاتىنىنداي, ءبىر جىلۋ جەلىسىنەن اقاۋ شىقسا, وزگە ارنالارعا دا كەرى اسەرىن بايقاتپاي تۇرمايدى. سوندىقتان, ادام بالاسى دەنساۋلىعىن ءار مينۋتتا قۋاتپەن قامتىپ, اۋرۋدىڭ الدىن الۋ ءۇشىن قامدانسا, جىلۋ ماماندارى جىل ون ەكى اي قۇبىرلاردىڭ قىسىمىن, سۋ تەمپەراتۋراسىن ىجداعاتپەن باقىلايدى.
«قاراپايىم تۇرعىندار جىلۋ ماماندارىنىڭ جۇمىسى تەك قىستا عانا قىزادى دەپ جاڭساق ويلاپ جاتادى. بۇل استە شىندىققا جاناسپايدى. «قىستىڭ قامىن جازدا ويلايتىن» ءبىر سالا بولسا, ول جىلۋمەن قامتۋ سالاسى. سەبەبى كوكتەمدە جىلۋ ماۋسىمى توقتاتىلعاندا-اق ءار قۇبىردىڭ جايىن باعامداۋ, كەلەسى ماۋسىمعا جارامدىلىعىن باجايلاۋ ىلە-شالا باستالادى. قازاندىقتار مەن نەگىزگى جابدىقتاردىڭ جۇمىس ءريتمى دە تياناقتى تەكسەرىلەدى. ال جازدا انىقتالعان اقاۋلاردى جوندەۋ, قالپىنا كەلتىرۋ جۇمىستارىنا بىلەك سىبانا كىرەسەمىز», دەگەن ماۋلەت ايسان ۇلى قىستا تۇرعىندارعا قولايسىزدىق تۋدىرماۋ ءار جۇمىسشىنىڭ ماقساتى ەكەنىن تىلگە تيەك ەتتى.
«الا جازداي تەككەن ءتوردىڭ جەمىسى قىستا انىق كورىنەدى. سوندىقتان بىزگە جوندەۋ جۇمىستارىن جازدا 100 پايىزدىق دەڭگەيدە اياقتاۋ جۇكتەلەدى. ال قىستا قۇبىرداعى سۋ تەمپەراتۋراسىنىڭ شامادان تىس قىزىپ كەتپەۋىن, ولاردىڭ ۇزدىكسىز جۇمىس ىستەۋىن قاداعالايمىز. جۇمىس بارىسىندا قىستا قۇبىرلاردان اقاۋ شىققان كەزدەر دە كەزدەستى. مۇنداي ساتتە تۇرعىنداردى دەرەۋ قۇلاعدار ەتىپ, سول اۋماقتاعى قۇبىرلاردى بەكىتىپ, سۋ تەمپەراتۋراسىن تۇسىرۋگە كۇش سالامىز. ۋاقىت-ساعاتپەن ساناسپاي جىلۋ بەرىلگەنشە تەر توگەمىز», دەدى «استانا سۋ ارناسى» مەكەمەسىنىڭ جەتەكشى جىلۋ ينجەنەرى.
ماۋلەت ايسان ۇلى استاناداعى جاڭادان بوي كوتەرىپ جاتقان نىساندارىن جىلۋمەن قامتۋ باعىتىنداعى ەسەپ توبىندا دا قىزمەت اتقارادى. كەيىپكەرىمىز نىساننىڭ اۋماعىنا قاراي قازاندىقتاردىڭ ورنالاسۋ اراقاشىقتىعىن انىقتايدى. ول بۇعان دەيىن جەزقازان, قاراعاندى قالالارىندا تاجىريبەسىن تولىستىرعان جىلۋ ينجەنەرى رەتىندە سالانىڭ قىر-سىرىن مەڭگەرۋ كوبىرەك تالاپتانۋمەن ۋىسقا تۇسەتىنىن ايتتى.
