فوتو: اشىق دەرەككوز
جيىنعا قازاقستان ساۋدا جەلىلەرى قاۋىمداستىعى, وبلىس اكىمدەرىنىڭ ورىنباسارلارى, سونداي-اق Magnum Cash&Carry, Small&Skif سىندى ساۋدا جەلىلەرىنىڭ وكىلدەرى دە قاتىستى.
ارمان شاققاليەۆ ۇكىمەت بەكىتكەن الەۋمەتتىك ماڭىزى بار تاۋارلارعا 15% مولشەرىندەگى ساۋدا ۇستەمەسىن ساقتاۋ تۋرالى ءسوز قوزعاپ, بۇزۋشىلىق بولعان جاعدايدا قاتاڭ شارالار قولدانىلاتىنىن ەسكەرتتى.
جىل باسىنان بەرى مينيسترلىكتىڭ اۋماقتىق دەپارتامەنتتەرى 2562 اكىمشىلىك قاۋلى قابىلداعان, ونىڭ ىشىندە 1360-ى – 56,5 ملن تەڭگەدەن استام سوماعا ايىپپۇل سالىنسا, 1202 كاسىپكەرگە ەسكەرتۋ جاسالعان. ال الەۋمەتتىك ماڭىزى بار ازىق-ت ۇلىك تاۋارلارىنىڭ ساۋدا ۇستەمەسىن اسىرىپ جىبەرگەنى ءۇشىن 2191 قاۋلى شىعارىلعان, سونىڭ ىشىندە 1020-سىنا – 39,6 ملن تەڭگەگە ايىپپۇل سالىنعان.
ەت ونىمدەرى نارىعىندا بەلگىلەنگەن ساۋدا ۇستەمەسىنىڭ ساقتالۋىنا ەرەكشە نازار اۋدارىلىپ وتىر. الەۋمەتتىك ماڭىزى بار سيىر ەتىنە ۇستەمە باعانى اسىرعانى ءۇشىن 45 قاۋلى راسىمدەلگەن, ونىڭ 33-ءى – ايىپپۇل. ساۋدا مينيسترلىگى اۋىل شارۋاشىلىعى مينيسترلىگىمەن بىرلەسىپ, ەت ونىمدەرىن ساۋدا ورىندارىنا جەتكىزۋ كەزىندە ۇستەمە باعانىڭ ساقتالۋىن باقىلاۋ ءۇشىن قوسىمشا مونيتورينگتىك توپتار قۇرىلىپ جاتقانىن حابارلادى. سونداي-اق الەۋمەتتىك ماڭىزى بار ازىق-ت ۇلىك تاۋارلارىن وتكىزۋدە جاسىرىن قىمباتتاۋ سحەمالارىن جانە رەترو-بونۋستاردى الىپ تاستاۋعا باعىتتالعان زاڭنامالىق وزگەرىستەر دايىندالىپ جاتىر.
ايماقتىق كوميسسيالاردىڭ جۇمىسى اياسىندا جىل باسىنان بەرى 747 وتىرىس وتكىزىلىپ, 2301 بۇزۋشىلىق فاكتىسى انىقتالعان.1956 اكىمشىلىك قاۋلى قابىلدانىپ, 345 ناقتى ءونىمى جوق دەلدالدار الىنىپ تاستالعان. ەلەكتروندى شوت-فاكتۋرالاردى تالداۋ بارىسىندا 9015 مىڭ تاۋارلىق تىزبەكتىڭ ىشىنەن 823 تاۋەكەلدى بۇزۋشىلىق بەلگىلى بولعان.
مينيسترلىك ەلىمىزدەگى ءىرى ساۋدا جەلىلەرىندە «بەرەكە Fest» اكتسياسى باستالاتىنىن دا مالىمدەدى. اكتسيا اياسىندا جاڭا ونىمدەر, اسىرەسە حالىقتىڭ سۇرانىسىنا يە جاڭا پىسكەن كوكونىستەر, جەمىستەر مەن سيىر ەتى ۇسىنىلادى. ساۋدا جەلىلەرى قازاقستاندىق وندىرۋشىلەر ءۇشىن ارنايى ورىندار ءبولىپ, ونىمدەردى نارىقتان تومەن باعادا ساتۋعا مۇمكىندىك بەرەدى.
