مەرەكە اياسىنداعى ماڭىزدى وقيعالاردىڭ ءبىرى – « ۇلى دالا جورىعى» رەسپۋبليكالىق ات مارافونى. وسىلايشا, 5 كۇندە ەلىمىزدەگى 13 ءوڭىردىڭ, قازاقستان حالقى اسسامبلەياسىنىڭ, سونداي-اق قىرعىزستان جانە رەسەي مەملەكەتتەرىنىڭ نامىسىن قورعايتىن كوماندالارداعى 90 شاباندوز توبىل-تورعاي دالاسىن دۇبىرلەتىپ, 500 شاقىرىم قاشىقتىقتى ءجۇرىپ وتەدى.
ءماجىلىس سپيكەرى ەرلان قوشانوۆ قۇتتىقتاۋ سوزىندە « ۇلى دالا جورىعىنىڭ» وتكىزىلۋى – ۇلتتىق سپورت تۇرلەرى جاندانىپ كەلە جاتقانىنىڭ جارقىن دالەلى ەكەنىن مالىمدەدى. ول حالقىمىزعا كوپتەگەن كورنەكتى مادەني جانە قوعام قايراتكەرلەرىن تارتۋ ەتكەن قاسيەتتى تورعاي جەرىندە ات مارافونىن وتكىزۋدىڭ سيمۆولدىق ءمانىن ايرىقشا اتاپ ءوتتى. ولاردىڭ اراسىندا مىرجاقىپ دۋلات ۇلى ەرەكشە ورىن الادى.
«مەملەكەت باسشىسى قاسىم-جومارت توقاەۆ ۇلتتىق سپورت تۇرلەرىن دامىتۋعا كوپ كوڭىل بولەتىنى بەلگىلى. ەل پرەزيدەنتىنىڭ قولداۋىمەن بىلتىر دۇنيەجۇزىلىك كوشپەندىلەر ويىندارى ويداعىداي ءوتتى. ال قازىر مىرجاقىپ دۋلات ۇلىنىڭ 140 جىلدىعىنا وراي اۋقىمدى ات جارىسى مەن اقىننىڭ شىعارماشىلىعىنا نازار اۋدارۋعا مۇمكىندىك بەرەتىن وزگە دە كوپتەگەن ءىس-شارالار وتكىزىلۋدە. قازاق حالقىنىڭ ۇلى پەرزەنتى دە اتقۇمار, ساياتشى بولعانى, جيرەن قاسقا الاكوز اتىن جانىنداي قاستەرلەگەنى ءمالىم. شاباندوزداردى تاريحي ورىنداردى باسىپ وتەتىن تارتىسقا تولى ۇزاق جول كۇتىپ تۇر. بارشا قاتىسۋشىعا ساتتىلىك تىلەيمىن», – دەدى ەرلان قوشانوۆ.
ءماجىلىس سپيكەرى ۇلتتىق سپورت تۇرلەرىن قولداۋ باعىتىندا مەملەكەت تاراپىنان اۋقىمدى جۇمىس اتقارىلىپ جاتقانىن اتاپ ءوتتى. ەلوردادا ۇلتتىق سپورت ۋنيۆەرسيتەتىنىڭ ىرگەتاسى قالاندى, اقتوبەدە جىلقى شارۋاشىلىعى ينستيتۋتى اشىلدى. بىلتىر ەل پرەزيدەنتى وتاندىق جىلقىلاردىڭ تۇقىمدارىن ساقتاۋ جانە ءوسىمىن مولايتۋ ماسەلەلەرى بويىنشا ارنايى زاڭعا قول قويدى. سوعان سايكەس, جىلقىلاردى, سونىڭ ىشىندە اتاقتى قوستاناي تۇقىمىن سۇرىپتاۋ بويىنشا جۇيەلى جۇمىس باستالدى. يگى ىسكە «AMANAT» پارتياسى دا ءوز ۇلەسىن قوسۋدا. ماسەلەن, وسىمەن التىنشى مارتە وتكىزىلىپ وتىرعان جانە قوعامنىڭ ۇلكەن قىزىعۋشىلىعىن وياتقان « ۇلى دالا جورىعى» سىندى جوبالارعا قولداۋ كورسەتۋدە.
بيىل العاش رەت ات مارافونىنا قازاقستان حالقى اسسامبلەياسىنىڭ «بىرلىك» كومانداسى قاتىسۋدا. ءوز ونەرىن شاباندوزدار وسى جىلى اتاپ وتىلەتىن قحا-نىڭ 30 جىلدىعىنا ارنادى.
وسى كۇنى تورعاي توپىراعى ەلىمىزدىڭ ۇزدىك اقىندارى باس قوسقان رەسپۋبليكالىق اقىندار ايتىسىنىڭ الىپ ساحناسىنا اينالدى. اقىندار سايىسى ناعىز ونەر مەرەكەسىنە اينالىپ, كوزىقاراقتى كورەرمەن مىرجاقىپ دۋلات ۇلىنىڭ مول مۇراسىن جاڭا قىرىنان تانىدى.
«ايتىس – تەك ءسوز ونەرى عانا ەمەس, تارلان تاريحىمىز بەن رۋحاني قازىنامىزدىڭ ايناسى. بارلىق قۋعىن-سۇرگىن مەن سىناقتارعا قاراماستان, حالىق مىرجاقىپ دۋلات ۇلىنىڭ ەسىمىن جۇرەگىندە ساقتاپ قالدى. بۇگىن ءبىز ونىڭ ماڭگىلىك مۇراسىنا قايتا جۇگىنىپ, تورعاي توپىراعى ەلىمىزدىڭ رۋحاني ورتالىعى بولعانىن جانە سولاي بولىپ قالا بەرەتىنىن كورىپ وتىرمىز. جولداۋدا مەملەكەت باسشىسى قاسىم-جومارت توقاەۆ وسى ءوڭىردىڭ دامۋىنا ەرەكشە نازار اۋدارۋدى تاپسىردى. تورعاي ولكەسىنىڭ بولاشاعى زور ەكەنىنە جانە كوپ ۇزاماي ول حالقىمىزدىڭ رۋحاني-مادەني جاڭعىرۋىندا قايتادان وزىندىك ورنىن الارىنا سەنىمدىمىن», – دەدى ەرلان قوشانوۆ.
ايتا كەتەيىك, مەرەيتويلىق ءىس-شارالار اياسىندا قوستانايدا مىرجاقىپ دۋلات ۇلىنىڭ ەسكەرتكىشى اشىلدى, ال تورعايدا اقىن ءارى ويشىلدىڭ مۇراسىنا ارنالعان عىلىمي كونفەرەنتسيا ءوتتى. دەپۋتاتتار مەن قوعام بەلسەندىلەرى بيدايىق اۋىلىنداعى اقىننىڭ شاعىن وتانىندا ورنالاسقان مۇراجايعا باردى.
