مەرەيتوي بيدايىق اۋىلىندا, قايراتكەردىڭ كەسەنەسى ماڭىندا قايتا جاڭعىرتىلعان مىرجاقىپ مۋزەي-ءۇيىنىڭ سالتاناتتى اشىلۋ راسىمىنەن باستاۋ الادى. ودان ءارى مەرەكەلىك باعدارلاما تورعاي وڭىرىندە جالعاسىپ, قوستاناي قالاسىنىڭ ورتالىعىندا مىرجاقىپ دۋلات ۇلىنا ارنالعان جاڭا ەسكەرتكىش بوي كوتەرمەك.
تورعايدىڭ ىرگەسىندە 70-تەن اسا اق شاڭقان كيىز ءۇي تىگىلدى. ارقالىق قالاسى 6, قارابالىق اۋدانى 4, اۋليەكول اۋدانى 5 كيىز ءۇي تىگىپ, تويعا ۇلەس قوستى.
– مىرجاقىپ اتامىزدىڭ تويىنا ەل قاتارلى ۇلەس قوسۋ – پارىزىمىز. مەملەكەت باسشىسى قاسىم-جومارت توقاەۆ سوڭعى جىلدارى تورعاي ايماعىن دامىتۋ جونىندە كەلەلى ماسەلەلەردى كوتەرىپ كەلەدى. پرەزيدەنت جولداۋىندا بۇل ءوڭىردىڭ الەۋمەتتىك-ەكونوميكالىق دامۋى ۇكىمەتتىڭ ايرىقشا نازارىندا بولاتىنىن اتاپ ءوتتى. ءبىز تويعا ءوز ۇلەسىمىزدى قوسۋ ءۇشىن بەس كيىز ءۇي تىگىپ قويدىق. جۇزدەن اسا قوناقتى قارسى الۋعا دايىنبىز. ارنايى كونتسەرتتىك باعدارلامامىز بەن كورمەمىزدى اكەلدىك, – دەدى اۋليەكول اۋدانى اكىمىنىڭ ورىنباسارى جۇماتاي كاكىمجانوۆ.
مەرەكەلىك باعدارلاما اياسىندا تورعاي تورىندە «مىرجاقىپ دۋلات ۇلى جانە ۇلت رۋحانياتى» اتتى رەسپۋبليكالىق عىلىمي-تاجىريبەلىك كونفەرەنتسيا وتەدى. جيىنعا ەلىمىزدىڭ بەلگىلى عالىمدارى قاتىسپاق.
سونىمەن قاتار جىرشى-تەرمەشىلەردىڭ رەسپۋبليكالىق بايقاۋى, اقىندار ايتىسى, كوكپار, بايگە, قازاق كۇرەسى سياقتى ۇلتتىق سپورت تۇرلەرىنەن رەسپۋبليكالىق جارىستار ۇيىمداستىرىلادى.
اسىرەسە, مەرەكەنىڭ ەڭ قىزىقتى بولىگى رەتىندە « ۇلى دالا جورىعى» حالىقارالىق مارافون-بايگەسى وتەدى. ۇزىندىعى 500 شاقىرىمدىق دودا تورعاي مەن ارقالىق اراسىندا ۇيىمداستىرىلىپ, وعان قازاقستاننىڭ بارلىق وڭىرىنەن, سونداي-اق رەسەي مەن قىرعىزستاننان كەلگەن كوماندالار قاتىسادى.
