12 قازان كۇنى سەمەيلىكتەر قالا اكىمى سايلاۋىندا ءوز تاڭداۋىن جاسايتىن بولادى. بۇل – ەلىمىزدەگى قالا اكىمدەرى تىكەلەي سايلاناتىن العاشقى سايلاۋ. باستاپقىدا سايلاۋعا قاتىسۋعا سەگىز كانديدات نيەت بىلدىرگەن بولاتىن. الايدا, ءۇش ۇمىتكەر مەملەكەتتىك قىزمەت ىستەرى اگەنتتىگىنىڭ اباي وبلىسى بويىنشا دەپارتامەنتىنىڭ تالاپتارىنا ساي ەمەس بولىپ شىقتى. ال تاعى ءبىر كانديدات ءوز ەركىمەن كانديداتۋراسىنان باس تارتىپتى دەپ ەستىدىك.
– بۇل ەلىمىزدە تۇڭعىش رەت وتكىزىلىپ جاتقان وبلىس ورتالىعىنداعى قالا اكىمىنىڭ سايلاۋى. بىلتىر ەكى اۋدان – كۋرچاتوۆ قالاسىندا جانە اباي اۋدانىندا سىناق جوبا رەتىندە اۋدان اكىمدەرىن سايلاۋ ناۋقانى وتكەن. بىراق 2025 جىلى 1 قاڭتاردان باستاپ بۇل زاڭ كۇشىنە ەنىپ, تۇنعىش رەت وبلىس ورتالىعىندا سايلاۋ وتكىزىلىپ وتىر. باسقا ەشقانداي ەرەكشەلىك جوق, الگوريتمى بارلىق سايلاۋلارمەن بىردەي, – دەيدى سەمەي قالاسىنىڭ اۋماقتىق سايلاۋ كوميسسياسىنىڭ ءتورايىمى گۇلجان قۋانىشەۆا.
وسىلايشا, اۋماقتىق سايلاۋ كوميسسياسىنا ءتورت ۇمىتكەر تىركەلدى. ولار ايبولات بەكجاساروۆ, ادىلەت قوجانباەۆ, قۋانىش تولەۋوۆ, قانات شاپاتوۆ. كانديداتتارى قىسقاشا تانىستىرا كەتسەك, 1. شاپاتوۆ قانات مۇرات ۇلى – بالالار مەن جاستاردىڭ شىعارماشىلىق سارايى ديرەكتورى (1971 جىلى تۋعان, سەمەي قالاسىندا تۇرادى); 2. تولەۋوۆ قانىش ماقسۇت ۇلى – گەودەزيا, كارتوگرافيا جانە قۇرىلىس جوعارى كوللەدجىنىڭ ديرەكتورى (1972 جىلى تۋعان, سەمەي قالاسىندا تۇرادى); 3. بەكجاساروۆ ايبولات قايركەش ۇلى – ۋاقىتشا جۇمىسسىز (1963 جىلى تۋعان, سەمەي قالاسىندا تۇرادى); 4. قوجانباەۆ ادىلەت نۇرساعات ۇلى – كوكپەكتى اۋدانىنىڭ اكىمى (1980 جىلى تۋعان, كوكپەكتى اۋىلىندا تۇرادى). سونىمەن تىركەلگەن كانديداتتارعا ءوز باعدارلامالارىن سايلاۋشىلارعا تانىستىرۋ ءۇشىن 11 قازان, تۇنگى ساعات 12:00-گە دەيىن ۋاقىت بەرىلدى. 11 قازان كۇنى كەز كەلگەن ۇگىت-ناسيحاتقا تىيىم سالىنادى.
– 16 قىركۇيەكتەن 18:01-دەن وسى 4 كانديدات ۇگىت-ناسيحات جۇمىستارىن باستاي بەرۋگە قۇقىلى. ۇگىت-ناسيحات, كەزدەسۋ ورىندارى بارلىعى قالا اكىمدىگىنىڭ سايتىندا كورسەتىلگەن. ءاربىر كانديداتتىڭ ءوزىنىڭ شتابى جۇمىس ىستەيدى. سول شتاب قالاي جۇمىس ىستەيدى, ۇگىت-ناسيحات سولاي جۇرەدى, – دەدى گ. قۋانىشەۆا.
سايلاۋ كۇنى سەمەي قالاسىندا 128 سايلاۋ بولىمشەسى جۇمىس ىستەيدى. ونىڭ 110-ى اشىق, 18-ءى جابىق. قازىر وسى ۋچاسكەلەردە دايىندىق جۇمىستارى ءجۇرىلىپ جاتىر. سايلاۋعا شامامەن 220 مىڭ سايلاۋشى قاتىسادى ەكەن.
اباي وبىلسى
