كورەرمەنگە لىق تولى فيلارمونيا زالىندا ەكى كۇن بويى ينە شانشار جەر بولعان جوق. بەكزات ونەرگە سۋساپ قالعان كوپشىلىك تەاتر ترۋپپاسىن تىك تۇرىپ قارسى الىپ, قويىلىم بارىسىندا قوشەمەتكە كومىپ وتىردى. گاسترولدىك ساپار اياسىنداعى العاشقى كەشتە قالىڭ كورەرمەن جورج بيزەنىڭ ايگىلى «كارمەن» وپەراسىنىڭ نەگىزىندە حورەوگراف البەرتو الونسو ساحنالاعان ءبىر اكتىلى «كارمەن-سيۋيتا» بالەتىن تاماشالادى. كەزىندە روديون ششەدرين وركەسترگە لايىقتاعان, مايا پليسەتسكايا ءۇشىن ارنايى قويىلعان اتاقتى تۋىندى كورەرمەن قاۋىمعا ەرەكشە اسەر سىيلادى.
وسى كەشتىڭ ەكىنشى ءبولىمى ەلىمىزگە بەلگىلى كومپوزيتور كارينا ابدۋللينانىڭ مۋزىكاسىنا مۋكارام اۆاحري قويعان «تاعدىر بۇلتارىستارى» سپەكتاكلىنە جالعاستى. جان تەبىرەنتكەن اسەرلى كەش تەاتردىڭ باس ديريجەرى ارمان ورازعاليەۆتىڭ جەتەكشىلىگىندەگى سيمفونيالىق وركەستردىڭ سۇيەمەلدەۋىمەن وتكەنىن دە ايتا كەتكەن ءجون.
كەلەسى كۇنى بالەت تەاترى ىنتىق كورەرمەنىنە قازاقستاننىڭ ەڭبەك سىڭىرگەن قايراتكەرى ايگۇل ءتاتي قويعان « ۇلى دالا مۇراسى» ۇلتتىق ديۆەرتيسمەنتىن تارتۋ ەتتى. ءبىر ءسات تاريح بەدەرىنەن كەرۋەن بوپ كوشكەن سان كەزەڭنىڭ تىنىسى, سايىن دالا توسىندە سالتانات قۇرعان كوشپەلىلەر مادەنيەتى بۇتىندەي ءبىر ساحناعا سىيىپ كەتكەندەي. تەاتر ۇجىمىنىڭ وسىنشاما كولەمدى دۇنيەنى ءبىر ساعاتتىڭ ىشىندە تالعامپاز كورەرمەننىڭ كوكىرەك تورىنە قوندىرا العانىنا ءتانتى بولاسىز. ساحناداعى سان الۋان حورەوگرافيالىق مينياتيۋرالار, اسقان تالعاممەن تىگىلگەن اسەم ۇلتتىق كيىم ۇلگىلەرى, ءداستۇر مەن قازىرگى زاماننىڭ ۇيلەسىمى, بيشىلەردىڭ عاجايىپ قوزعالىسى – ءبارى-ءبارى كوپشىلىكتى قايران قالدىرىپ, ەرەكشە ءبىر عاجايىپ كۇيگە شومدىرعانى انىق.
«قازاقستاننىڭ ەڭبەك سىڭىرگەن قايراتكەرى ايگۇل ءتاتي قويعان « ۇلى دالا مۇراسى» قويىلىمىن تاماشالاپ, تىلمەن ايتىپ جەتكىزە المايتىن عاجايىپ اسەر الىپ شىقتىق. ۇلتتىق بالەتتىڭ سونشالىقتى بيىك دەڭگەيدە ەكەنىنە كوزىمىز جەتتى. ساحناداعى كوزدىڭ جاۋىن الاتىن اسەم كوستيۋمدەر, بيشىلەر قوزعالىسىنداعى قايتالانباس پلاستيكا, ۇيلەسىمدىلىككە ءتانتى بولدىم. ارتىستەر دە بوي-تۇلعاسى, ءتۇر-سىمباتى جاعىنان ءبىر-بىرىمەن كەرەمەت ۇيلەسىم تاپقان. مۇنداي اسا كۇردەلى ءارى كوركەم تۋىندىنى ساحناعا الىپ شىعۋ ءۇشىن, ءسوز جوق, اسقان دارىن, تاباندى ەڭبەك, جوعارى تالعام كەرەك دەپ بىلەمىن. سونداي-اق قوزى كورپەش پەن بايان سۇلۋدىڭ سۇيىسپەنشىلىك تاريحىن باياندايتىن قويىلىمدا باس كەيىپكەردىڭ باس ءانشىسى ورىس قىزى بولدى. ءوز ءرولىن وتە تاماشا ورىنداپ شىقتى. بۇل دا ماعان قاتتى اسەر ەتتى. وسىنداي اسەرلى كەش, ۇمىتىلماس مەرەكە سىيلاعان «استانا بالەت» تەاترى ۇجىمىنا شىن جۇرەكتەن العىس بىلدىرەمىن», دەيدى كورەرمەننىڭ ءبىرى لەيلا يساەۆا.
قوستاناي وبلىسى
