قاراعاندى وبلىسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسى مەن اباي اۋداندىق پوليتسيا باسقارماسىنىڭ جەرگىلىكتى پوليتسيا قىزمەتكەرلەرى بىرلەسكەن رەيد بارىسىندا 41 جاستاعى كۇدىكتىنىڭ ءۇي اۋلاسىنان ەسىرتكى زاتتارىنىڭ ءىرى كولەمىن انىقتادى.
تەكسەرۋ كەزىندە پوليتسەيلەر 40 ءتۇپ كەپتىرىلگەن ماريحۋانانى تاركىلەدى. ولاردىڭ جالپى سالماعى شامامەن 5 كەلىنى قۇرادى. بۇعان قوسا, ساتۋعا دايىندالعان تاعى 5 كەلى كەپتىرىلگەن ماريحۋانا تابىلدى. سونىمەن قاتار اۋلادان 68 ءتۇپ وسىرىلگەن قاراسورا پلانتاتسياسى انىقتالدى.
اتالعان دەرەك بويىنشا اسا ءىرى كولەمدە ەسىرتكى زاتتارىن زاڭسىز ءوسىرۋ جانە ساقتاۋ فاكتىسى بويىنشا قىلمىستىق ءىس قوزعالدى. تاركىلەنگەن زاتتار ساراپتاماعا جىبەرىلدى.
قازىرگى ۋاقىتتا تەرگەۋ امالدارى جۇرگىزىلۋدە.
«قاراسورا» جەدەل-الدىن الۋ ءىس-شاراسى جالعاسىپ جاتىر. پوليتسيا ورگاندارى وڭىردە ەسىرتكىنىڭ زاڭسىز اينالىمىنا قاتىستى كەز كەلگەن دەرەكتى قاتاڭ باقىلاۋدا ۇستايتىنىن اتاپ ءوتتى.
