ءىس-شاراعا عىلىم ورداسىنىڭ باس ديرەكتورى ۇلار مۇقاجانوۆ, مۋزەي مەڭگەرۋشىلەرى, عىلىمي قىزمەتكەرلەر, رەستاۆراتورلار, سونداي-اق ءال-فارابي اتىنداعى قازۇۋ مەن زوولوگيا ينستيتۋتىنىڭ عالىمدارى قاتىستى. سەمينار عىلىم جانە جوعارى ءبىلىم مينيسترلىگىنىڭ نىسانالى قارجىلاندىرۋ جوباسى اياسىندا ۇيىمداستىرىلدى. جوبا جەتەكشىسى – PhD, ەتنوگراف اينۇر بەيسەعۇلوۆا.
ءىس-شارا بارىسىندا بيولوگيا جانە زوولوگيا سالاسىندا ءجيى قولدانىلاتىن تەرميندەردىڭ قازاق تىلىندەگى بالامالارى تالقىلانىپ, تابيعات مۋزەيى مەن ارحەولوگيا مۋزەيىنىڭ قالىپتاسۋ تاريحى, سونداي-اق عىلىمي زەرتحانا نەگىزىندە وقۋ-وندىرىستىك پراكتيكا ۇيىمداستىرۋ تاجىريبەسى ءسوز بولدى. بۇدان بولەك, ارحەوگرافيالىق كوللەكتسيالاردىڭ قالىپتاسۋ ەرەكشەلىكتەرى, تابيعات مۋزەيىنىڭ جادىگەرلەرى, ارحەولوگيالىق جانە ارحەوگرافيالىق قورلاردى قالپىنا كەلتىرۋ مەن جاڭعىرتۋ ماسەلەلەرى قاراستىرىلدى.
«قازاق عىلىمىنىڭ قارا شاڭىراعى سانالاتىن عىلىم ورداسى بۇگىندە عىلىمي ينستيتۋت رەتىندە قالىپتاسىپ كەلەدى. بۇل جوبا – مۋزەيلەردىڭ عىلىمي الەۋەتىن ارتتىرۋعا, قور جيناقتارىن جۇيەلى زەرتتەپ, جاڭعىرتۋعا باعىتتالعان ماڭىزدى قادام. ءبىز حالىقارالىق دەڭگەيدەگى وزىق تاجىريبە مەن زاماناۋي تەحنولوگيالاردى ءتيىمدى پايدالانا وتىرىپ, مۋزەي قىزمەتىن دامىتۋ جانە مامانداردىڭ بىلىكتىلىگىن ارتتىرۋ جۇمىستارىن جالعاستىرامىز» دەپ اتاپ ءوتتى ۇلار مۇقاجانوۆ.
سەمينار اياسىندا پالەونتولوگيالىق, ارحەولوگيالىق جانە ارحەوگرافيالىق جيناقتاردىڭ كورمەسى مەن شەبەرلىك ساباعى ۇيىمداستىرىلىپ, قاتىسۋشىلار كوللەكتسيالاردى ساقتاۋ, قالپىنا كەلتىرۋ جانە عىلىمي كاتالوگ جاساۋ بويىنشا تاجىريبە الماستى.
الماتى
