وبلىس اكىمىنىڭ ورىنباسارى الىبەك الدەنەي مەن وبلىستىق سپورت باسقارماسىنىڭ باسشىسى سەرىك ساپيەۆ تە ارنايى كەلىپ, جىلى لەبىزىن ءبىلدىردى. كەنشىلەر شاھارىنىڭ تۇرعىندارى جانە جانكۇيەرلەر چەمپيونعا قوشەمەت كورسەتتى.
سونىمەن قوسا, ءا.مولداعۇلوۆا اتىنداعى مەكتەپ-ينتەرنات كوللەدجىنىڭ ديرەكتورى, وبلىستىق ءماسليحات دەپۋتاتى ەردەن حاليلين مەن وبلىستىق ۇلتتىق سپورت تۇرلەرى قاۋىمداستىعىنىڭ اتقارۋشى ديرەكتورى تەمىرحان ابىلاەۆ تا جەرلەسىمىزدى جارقىن جەڭىسىمەن قۇتتىقتادى.
ايدانىڭ اكەسى نۇرلان دجاپاركۋلوۆ پەن اناسى قارلىعاش ابيكەەۆا دا باتىر قىزدارىن قۋانىشپەن قارسى الدى.
– ماعان جانكۇيەر بولىپ, قولداۋ كورسەتكەن بارشا قازاق ەلىنە العىسىمدى ايتامىن. ءبارىڭىزدىڭ قولداۋىڭىز سەزىلدى. اۋەلى باسقارما باسشىلىعىنا, فەدەراتسياعا العىسىمدى بىلدىرەمىن. قولداۋ كورسەتىپ, سەنىم ارتتى. جاتتىقتىرۋشىلارىم بارلىق قارسىلاسىما جەكە-جەكە تاكتيكا قويدى. سونىڭ ناتيجەسىندە جەڭىسكە جەتتىم. وسى تۇستا جاتتىقتىرۋشىلارىما العىس ايتامىن. كەلەر جىلى ازيا ويىندارى بار. سوعان دايىندالامىن. ودان كەيىن وليمپيادا ويىندارى كۇتىپ تۇر, – دەدى چەمپيون.
